"Festa e Trëndafilave"/ Tradita që mbahet gjallë prej vitesh në Pojan të Maliqit

12 Qershor 2025, 09:50, Qyteti im CNA

"Festa e Trëndafilave"/ Tradita që mbahet gjallë prej

Në fshatin Pojan të Maliqit, aty ku aroma e trëndafilave shoqëron çdo hap nëpër rrugicat e lagjeve, banorët janë mbledhur për të kremtuar një festë që lindi nga dashuria për lulen më të bukur dhe më simbolike, trëndafilin. Festa e Trëndafilave, e kthyer tashmë në një traditë vjetore, është një ngjarje që mbledh së bashku komunitetin, institucionet lokale dhe të gjitha grupmoshat në një ditë që përçon bukuri, aromë dhe shpresë.

Çdo shtëpi në Pojan ka të paktën një trëndafil të mbjellë në oborr, dhe kjo dashuri për lulet është bërë arsyeja për të festuar dhe për të ndarë këtë pasuri të përbashkët me njëri-tjetrin. Sheshi qendror u mbush me ngjyra, zëra dhe muzikë. Atmosfera u gjallërua nga këngë popullore, valle tradicionale dhe stenda me gatime të përgatitura nga zonjat e shtëpive, ato që, përveç kuzhinës, janë edhe mirëmbajtëset e oborreve plot me trëndafila.

Në fjalën e tij, Festim Tomorri, drejtor i Kulturës në Bashkinë Maliq, theksoi se kjo festë është shembull i një bashkëpunimi të suksesshëm mes komunitetit dhe institucioneve.

"Lindi nga ideja që në Pojan ka shumë trëndafila. Nëpër shtëpi ka trëndafila që zbukurojnë ambientin e jashtëm të tyre. Zonjat e shtëpisë u bëjnë shumë hyzmet trëndafilave. Është një festë që zhvillohet në bashkëpunim të ngushtë me Njësinë Administrative Pojan, me shkollen 9-vjeçare e të mesme të kësaj njësie. Mua më mbetet të them vetëm falënderime për organizimin e mirë, ku vijmë me një koncert artistik, i cili ka në përbërje këngë, valle, muzikë. Është festë, njerëzit duhet të festojnë, të jenë të kënaqur e të buzëqeshin. Trëndafilat japin aromë të mirë dhe buzëqeshje. Ky është mesazhi që japim ne nëpërmjet kësaj feste", tha Tomorri.

Xhafer Gjyshllari, kryeplaku i fshatit, e shikon këtë festë si një shenjë shprese dhe vazhdimësie për brezat e rinj.

"Kjo është festë e trëndafilave sepse gjithmonë trëndafilat janë lule dhe u japin shpresë fëmijëve, oksigjen sa më shumë. Është gjë e mirë që çdo familje në Pojan ka mbjellë nga një trëndafil. Ta gëzojmë këtë festë e ta vazhdojmë sa më shumë, edhe bashkia të marrë fuqi e të mbjellë trëndafila sa më shumë", u shpreh kryeplaku.

Në Pojan, aty ku çdo oborr ka nga një trëndafil dhe çdo banor një buzëqeshje për ta ndarë, festa nuk është thjesht një ditë në kalendar. Është kujtimi i përditshëm se gjërat e bukura rriten me dashuri, kujdes dhe përkushtim.

E ndërsa trëndafilat vazhdojnë të çelin në pragjet e shtëpive, në zemrat e njerëzve lulëzon krenaria për vendin e tyre dhe për një traditë që është gati t’i rezistojë kohës, me aromën dhe ngjyrat që vetëm një festë si kjo mund të sjellë./ CNA