Korrigjimi i provimeve të Maturës/ Rezultatet në Shkodër plotësojnë pritshmërinë e stafit arsimor

14 Qershor 2025, 15:35, Qyteti im CNA

Korrigjimi i provimeve të Maturës/ Rezultatet në Shkodër

Pas provimeve të Maturës Shtetërore, ka përfunduar korrigjimi në testin e Gjuhës së Huaj për maturantët. Nga shpallja e këtyre rezultateve në Shkodër ka një rritje të mesatares së përgjithshme. Drejtorja e Zyrës Vendore të Arsimit, Brisela Kadia, shprehet se nga 1330 maturantë, 380 prej tyre morën notë maksimale, ndërsa vetëm 9 prej tyre rezultojnë mbetës.

Korrigjimi i provimeve të Maturës/ Rezultatet në Shkodër

“Kanë mbaruar dy provime të Maturës Shtetërore, ai i Gjuhës së Huaj dhe Gjuhës Shqipe, ndërkohë që kanë dalë edhe rezultatet për provimin e Gjuhës së Huaj. Rezultatet që kemi marrë në këtë provim sigurisht që janë në pritshmëritë tona, por ka edhe një korrelacion shumë pozitiv mbi atë që ne kemi pasur pritshmëri. Kemi pasur një rritje të notës mesatare në këto provime dhe kemi pasur një përfaqësim shumë më të mirë të nxënësve tanë në lëndën e gjuhës së huaj. Kemi pasur një numër të madh 10-ash. Sigurisht që ka edhe nota që variojnë 7 dhe 8 që është ajo nota që është hasur më shpesh. Në 1330 maturantë në provimin e Gjuhës së Huaj, kemi pasur vetëm nëntë 4-ra, që është një shifër e vogël e notës mbetëse dhe e pakonsiderueshme, që ndikon shumë pak në notën mesatare. Kemi pasur mbi 380 nota 10-ta në të gjitha gjimnazet tona publike, private dhe shkollat profesionale”,-tha Kadia.

Në provimin e Gjuhës së Huaj, shkolla e mesme “28 Nëntori” në Shkodër vazhdon që të jetë shkolla elitë e qytetit, duke mbajtur sërish vendin e parë në rezultatet e arritura në provimin e Gjuhës së Huaj.

Korrigjimi i provimeve të Maturës/ Rezultatet në Shkodër

“Kemi pasur një përfaqësim shumë të mirë të shkollës '28 Nëntori’ që vazhdon të mbajë në një nivel shumë të mirë rezultatet dhe notën mesatare, por edhe shkolla ‘Oso Kuka’, si dhe shkollat private që kanë arritur rezultate të mira. Kemi pasur një rritje sepse nota mesatare e përgjithshme është 7.3 dhe në Gjuhën e Huaj kemi arritur 7.87, që do të thotë se nxënësit tanë janë përfaqësuar shumë mirë dhe kanë reflekuar ato dije që ndoshta ne kemi qenë edhe të shtrënguar në notat e dhëna për maturantët”,-shprehet Kadia.

Kjo rritje e notës mesatare në Gjuhën e Huaj ka plotësuar pritshmëritë për stafet arsimore në Shkodër./CNA