Velitërna në thatësirë/ Fermerët protestojnë për mungesën e ujit të vaditjes

13 Qershor 2025, 11:50, Qyteti im CNA

Velitërna në thatësirë/ Fermerët protestojnë

Një grup banorësh të fshatit Velitërnë, pjesë e njësisë administrative Pirg në Bashkinë e Maliqit, kanë protestuar sot për mungesën e ujit të vaditjes në këtë periudhë të nxehtë vere, duke ngritur alarmin për dëmtimin e të mbjellave dhe humbjen e investimeve bujqësore.

Sipas tyre, sasia aktuale që vjen përmes kanaleve vaditëse është shumë më e ulët se nevojat reale të kulturave bujqësore. Fermerët theksojnë se qepa dhe patatja, të mbjella në sipërfaqe të mëdha, janë në rrezik për tharje, ndërkohë që cikli i vaditjes kërkon ujë çdo ditë.

Banorët shprehen se kjo situatë përsëritet prej vitesh dhe se institucionet përgjegjëse nuk e menaxhojnë siç duhet shpërndarjen e ujit. Ata kërkojnë ndërhyrje urgjente për të parandaluar dëmtimin e prodhimeve bujqësore, veçanërisht në kulmin e sezonit.

"Ka 30 vjet që jetoj këtu në Veliternë, një avaz është gjithmonë. Ne na duhet ujë, unë duhet të vadit pataten sot, qepën sot, se sot e do ujin. I kemi thënë administratorit, nuk shkojnë dot këta t'i thonë Gëzim Topçiut, nuk e fajësoj dot kryetarin. Të tërë kërkojnë ujë dhe asnjë nuk del përballë. Mendoj se nuk e menaxhojnë mirë. Sot e lëshon, nesër e pret ai dhe nuk mbushen pritat. Ne duam ujë të vaditim çdo ditë. Po nuk i vaditëm, prodhimet mbaruan. Kemi hedhur miliona lekë, nga 15-20 milionë lekë të vjetër dhe jemi të mbaruar, mirë t’ia bëjnë këtij populli", tha një banor.

"Ujë ka po nuk menaxhohet mirë dhe po të shkosh tani në bashki apo në komunën e Pirgut, të tërë i ka futur partia me mik dhe ruajnë njëri-tjetrin dhe ne këtej mbetemi. Ky fshat këtë avaz ka pasur gjithmonë për ujin. Fermerët kanë hequr dorë, unë këtë vit, edhe pse kam 6 dynym, nuk kam mbjellë asgjë", u shpreh një tjetër banor.

"Problemet e bashkëfshatarëve janë serioze, kemi tërë këto vite që nuk kemi ujë për të vaditur. Të vijë drejtori i ujërave t'i japë zgjidhje, sepse isha për të vaditur dhe nuk vadita dot se s'kisha ujë. Ne duam zgjidhje", u shpreh banori.

"Unë jam fermer, kam mbjellë qepë e patate, rreth 2 ha. Këtu e kemi problemin me dekada që nuk vjen uji zakonisht. E marrim me dy zetora, e hedhim ujin për të plotësuar kushtet e qepës ose patates. Unë dua që ky problem të dëgjohet deri te drejtori dhe kryetari i bashkisë. Të na sigurojnë ujin për vaditje pastaj për shitje s'i dihet. Mund t'i hedhim nëpër kanale siç i kemi hedhur vit për vit", u shpreh fermeri.

Nga ana tjetër, Besnik Dervishaj, përgjegjës për menaxhimin e ujit në zonë, pohon se janë lëshuar rreth 100 litra ujë nga rezervuari dhe se sasia e të mbjellave është më e ulët krahasuar me vitet e kaluara.

Ai sqaroi se gjatë muajve të verës është e vështirë të rritet volumi i ujit në rrjet, për shkak të kërkesës së lartë njëkohësisht nga të gjithë fermerët.

"Janë lëshuar 100 litra ujë nga rezervuari dhe për momentin nuk ka shumë të mbjella krahasuar me vitet e tjera. Janë përgjysmuar prodhimet e mbjella si qepa e patatja. Mund të jenë 100-120 litra ujë. Janë disa fshatra, unë përpiqem të menaxhoj aq ujë sa më vjen. Tani është sezoni i vaditjes dhe të gjithë duan të vaditin njëherësh, por kjo është e pamundur. Këto dy vaditje janë vendimtare. Nuk mendoj se prodhimet do thahen se fermerët kanë 5-6 ditë që po vaditin. Këta kanë hallin e qepës, se qepa do vaditje më tepër se patatja. Këta përpiqen të vadisin me 40 orë për ta marrë ujin diku e për ta hedhur te tokat", tha Dervishaj.

Ndërsa tensioni mes banorëve dhe strukturave përgjegjëse rritet, mbetet e paqartë nëse do të merren masa urgjente për rritjen e sasisë së ujit dhe përmirësimin e sistemit të shpërndarjes, për të shmangur një sezon tjetër bujqësor të dështuar në zonën e Velitërnës.

Banorët paralajmërojnë se, nëse nuk merren masa të menjëhershme, dëmet do të jenë të konsiderueshme./ CNA