Sula akuza të rënda kundrejt Krifcës/ “Kur ishe drejtoreshë e AZHBR-së, sa milion euro i ke dhënë ish-punëdhënësit tënd?”

20 Korrik 2023, 18:13, Politikë CNA

Sula akuza të rënda kundrejt Krifcës/ “Kur ishe

Deputeti demokrat Dashnor Sula gjatë fjalës së tij në Kuvend ditën e sotme ka shigjetuar ministren e Bujqësisë Frida Krifcën, në sajë të debateve të ashpra mes opozitës dhe Krifcës, të iniciuara nga pezullimi I fondeve të BE-së për Shqipërinë në sektorin e bujqësisë, pas dyshimeve për korrupsion dhe shpërdorim të fondeve.

Sula ka nënkuptuar përfshirjen e ministres në korrupsion gjatë mandatit të saj në krye të AZHBR-së duke e pyetur se “kur ishe drejtoreshë e AZHBR-së, sa para i ke dhënë ish-punëdhënësit tënd, sa mln euro i ke dhënë ish-punëdhënësit tend?”.

Ndër të tjera deputeti kërkoi që të publikohet lista e përfituesve të AZHBR-së, pasi sipas tij janë bërë abuzime të mëdha dhe bëri thirrje që drejtësia të mos kursejë askënd që ka vjedhur paratë e shqiptarëve.

“Këtu skandali ndjek skandalin. Këto ditë bëhen edhe më nxehta me skandalet. Jam shumë i lumtur që më në fund drejtësia ka filluar të funksionojë në maksimum. Në emër të gjithë kolegëve të opozitës vlerësojë organin e SPAK. Sfidat tuaja janë të mëdha, por unë ju inkurajoj të mos ndaleni për të vendosur drejtësinë. Kemi një diferencë krahasuar me Bosnje Hercegovinën apo me Maqedoni për korrupsionin. Ish-drejtoresha e AZHBR-së, zonja Krifca, ministrja e Bujqësisë Krifca, kur ishte drejtoreshë e AZHBR-së, sa para i ke dhënë ish-punëdhënësit tënd, sa mln euro i ke dhënë ish-punëdhënësit tënd? Këto janë gjëra që t’i duhet t’i japësh përgjigje. Hapni listën e përfituesve të AZHBR, për të parë se kush janë, nxirrni listën e përfituesve. Ministrja e Bujqësisë, a e njeh zonjën Ada Demiri, Jurgen Dashin që kanë përfituar miliona euro nga AZHR. Ku i çuan këto para? Ministrja e Bujqësisë të na provojë që sera e inceneratorit të Tiranës për të mbjellë domate e speca nuk funksionon më. 1.1 mln euro të hedhur në Vilë Bashtovë, ka ngelur vetëm një godinë dhe ato e kanë marrë ato të inceneratorëve. Këto janë të vërteta për të cilat ministrja e Bujqësisë të japë përgjigje. Ku e keni sot njeriun që e kishit hyjnor, satelit qiellor, bravo i qoftë, iku të gëzojë paratë. Por të jeni të sigurt se drejtësia nuk do të harrojë ata që janë të përfshirë”, tha ndër të tjera deputeti Dashnor Sula, duke shtuar: “A ka nga mazhoranca ministra e deputetë që kanë marrë fonde nga AZHBR , po dhe shumë madje. Nxirrni listën.”-u shpreh Sula./CNA.al