DENONCIMI: Kraja një zuzar i ish-Sigurimit të Shtetit, Millonai një skllave e Ballës

9 Nëntor 2023, 14:29, Politikë CNA

DENONCIMI: Kraja një zuzar i ish-Sigurimit të Shtetit, Millonai

Ish-kryeministri Sali Berisha ka hedhur akuza sot ndaj prokurorëve të SPAK-ut, ku është shprehur se Edi Rama dhe larot e tij, Irena Gjoka, Arben Kraja dhe Enkeleda Millonai, shkelin Kushtetutën.

Krajën, Berisha e quajti një xhelat të Sigurimit të Shtetit, i cili sipas tij është një kriminel me të shkuar të zezë.

"Prokurori xhelat i Sigurimit të Shtetit, Kraja që është larguar nga drejtësia me ligjin e lustracionit, iniciativë e Sali Berishës, asokohe President republike dhe që qëndron sot në detyrë si një zuzar, pa ligj dhe moral, në dhunim flagrant të ligjit organik të prokurorisë, i cili i bazuar në nenin 6 të Kushtetutës, e nxjerr jashtë shërbimi këtë kriminel për të shkuarën e tij të zezë", u shpreh Berisha.

Ndërsa, për prokuroren Millonari ai nënvizon se ka lidhje me bandat e krimit dhe është një skllave e Taulant Ballës.

"Prokurorja Enkeleda Millonai, e denoncuar dhjetëra herë nga Sali Berisha për lidhjet e saj me bandën e Elbasanit, dhe që si skllave e Taulant Bego Yaris, mban prej vitesh në sirtar, në kundërshtim me Kushtetutën dhe Konventën Evropiane të të Drejtave të Njeriut, dosjen e padisë kundër Taulant të saj, duke i mohuar të drejtën kushtetuese qytetarit kundërshtar dhe paditës të Taulant Bego Yaris, në mënyrë që ai të mos ngrejë padi në Gjykatën Kushtetuese dhe më pas në Gjykatën Ndërkombëtare të Strasburgut për Taulantin e saj", shprehet Berisha.

Ai hodhi akuza edhe ndaj gjykatëses Irena Gjoka, e cila ka vendosur ndaj tij masën "detyrim paraqitje" për çështjen e privatizimit të ish-kompleksit "Partizani".

"Edi Rama me gjykatësen e shkarkuar për korrupsion nga Sali Berisha, lexoi një trakt të shkruar në zyrat e tij, sipas të cilit, masa e sigurimit personal, e detyrimit për t’u paraqitur në Policinë Gjyqësore, dhe masa e ndalimit për të dalë jashtë shtetit, të dhëna ndaj personit Sali Berisha, nuk përbëjnë heqje lirie personale, por një kufizim lirie për të dalë jashtë shtetit. Kjo deklaratë nuk është bërë në Fenianin e Kimit, por në Tiranën e bastardit të xhelatit Kristaq Rama dhe banorët e fermës së tij oruelliane, për të cilët lëvizja nuk është formë themelore e lirisë së individit, dhe për rrjedhojë ndalimi i lëvizjes së individit jashtë shtetit nuk është formë e heqjes së lirisë. Jo për Edi Ramën, edhe njëherë bastardin e xhelatit Kristaq Rama, as dhe për larot e tij Gjoka, Kraja, Millonai që shkelin Kushtetutën në germë dhe frymë, por në respekt të qytetarëve shqiptarë dhe në një proces gjyqësor shekulli kundër Edi Ramës, rikujtoj se Kushtetuta, në nenin 73, pika dy, sanksionon se deputetit nuk mund t’i hiqet liria në çfarëdolloj forme, pa autorizimin e Kuvendit të Shqipërisë", tha Berisha./CNA