Studimet tregojnë se goditja e fëmijëve është e dëmshme/ Çfarë duhet të bëjnë prindërit?

14 Gusht 2022, 14:15, Blog Daryl Higgins & Sophie Havighurst

Studimet tregojnë se goditja e fëmijëve është e

Sot, nëse një prind e godet fëmijën me shpullë në pjesë të ndryshme të trupit, gjatë kohë që ndodhet në një supermarket, ka të ngjarë të kritikohet nga klientët e tjerë. Ky lloj ndëshkimi për një sjellje të gabuar nuk është aq i pranueshëm nga shoqëria sa dikur.

Studimet e fundit tregojnë se vetëm 15 për qind e njerëzve të moshës 16-24 vjeç e shohin dhunën fizike si të nevojshme për të rritur siç duhet një fëmijë. Te njerëzit mbi 65 vjeç kjo normë është 38 për qind.

Në fakt dhuna fizike ndaj fëmijëve ndodh ende, dhe është shumë e dëmshme për ta. Në vitin 2017, komisioni mbretëror për abuzimin seksual ndaj fëmijëve rekomandoi një studim kombëtar se sa i zakonshëm është abuzimi me fëmijët në Australi. Gjetjet e hershme të publikuara muajin e kaluar, zbuluan se 61 për qind e të rinjve të moshës 16-24 vjeç thanë se ishin dhunuar dhe goditur fizikisht 4 ose më shumë herë gjatë fëmijërisë së tyre.

Studimi zbuloi se ata që ishin dhunuar dikur, ishin gati 2 herë më të rrezikuar nga depresioni dhe ankthi. Kjo pjesërisht sepse ata që ishin goditur që fëmijë, mund të kenë përjetuar edhe forma të tjera keqtrajtimi, si reagime të ashpra prindërore, neglizhencë ose mbështetje të pamjaftueshme. Aktualisht 63 vende e kanë të ndaluar me ligj ndëshkimin trupor për fëmijët, duke përfshirë Zelandën e Re, Suedinë, Danimarkën, Korenë e Jugut, Uellsin, Skocinë, Francën dhe Japoninë.

Rritja e fëmijëve mund të jetë sfiduese në jo pak raste. Fëmijët sillen keq ose mund të mos i kontrollojnë dot emocionet e tyre. Prandaj prindërit duhet të ndihmohen të gjejnë metoda alternative për disiplinimit të fëmijëve të tyre, dhe e çfarë është një sjellje e përshtatshme.

Ja cilat janë 7 këshillat e ekspertëve:

1. Tregojani qartë se ku janë limitet dhe atë që ju prisni nga fëmija

Fëmijët duhet ta dinë se si dëshironi që ai të sillet, dhe që kjo gjë të jetë e qartë. Një shembull mund të jetë fjalia: “Nuk është morale ta godasësh vëllain tënd” ose “Nuk mund të marrësh çokollatat nga raftet e supermarketeve pa më pyetur më parë”.

2. Menaxhoni emocionet tuaja

Zemërimi është ngjitës si ndjenjë, ndaj përpiquni të mos e humbni durimin para fëmijëve tuaj. Në vend të kësaj, ndaloni një moment para se të reagoni: merrni frymë thellë 3 herë, pini një pije të ftohtë ose dilni jashtë për një moment.

3. Bëhuni një model i mirë për fëmijën tuaj, edhe kur nuk i mirëmenaxhoni situatat

Prindërit duhet të tregojnë se si i menaxhojnë emocionet e tyre, ose të korrigjohen kur veprojnë në mënyra të papërshtatshme. Prindërit duhet të jenë mjaft të guximshëm për t’i thënë fëmijës “Më fal që u zemërova dhe të bërtita. Nuk u tregova shumë i duruar!”.

4. Zbuloni emocionet që qëndrojnë pas sjelljes së gabuar të fëmijës suaj

Fëmijët mund të jenë të pasigurt ose të hutuar nga emocionet e tyre. Prandaj, përpiquni t'i ndihmoni ata të kuptojnë ndjenjat e tyre. Kjo mund të përfshijë thënien e diçkaje të tipit “Unë e kuptoj që u ndjeve si i lënë pas dore, ndaj u bëre xheloz”. Po ashtu vërtetoni gjithashtu emocionet e tyre sepse kjo i ndihmon ata të ndihen të pranuar nga ju, ndërsa mësojnë të kuptojnë dhe menaxhojnë ndjenjat e tyre.

Për shembull, mund t’i thoni: “Është e vështirë kur ndodh kjo”. Dhe kur të jenë më të qetë, mund të zbuloni ndjenja të tjera që kanë nxitur veprimeve të tyre. Kjo ka të bëjë me ndarjen e ndjenjave (xhelozi, zhgënjim) nga sjellja (goditja). Të gjitha ndjenjat mund të jenë normale në një situatë të caktuar, por jo të gjitha sjelljet.

5. Zgjidhini problemet kur të gjithë të jenë më të qetë

Askush nuk mund të mendojë, flasë apo dëgjojë siç duhet nëse është i mërzitur. Ndaj merrni kohë për të marrë frymë thellë ose bëni diçka qetësuese me fëmijën tuaj. Ose ndoshta këta të fundit kanë nevojë të vrapojnë pak për të çliruar emocionet e forta.

6. Mbështeteni fëmijën që të korrigjojë sjelljet e veta

Kur të gjithë janë më të qetë, ndihmojini fëmijët tuja të gjejnë zgjidhjen apo hapin tjetër. Kjo u mëson atyre se si t'i zgjidhin situatat, të riparojnë marrëdhëniet dhe të marrin përgjegjësinë për sjelljen e tyre. Ju mund të thoni diçka të tipit: “Mund të jetë e sikletshme t’i kërkosh falje dikujt me të cilin ke qenë i zemëruar. Çfarë mendon se mund të ndihmojë?”

7. Zbuloni pasojat natyrore

Nëse diçka është prishur, fëmijët mund të kenë nevojë ta rregullojnë atë, të përdorin para nga kutia e tyre e kursimit për ta zëvendësuar atë, ose të mendojnë se çfarë mund ta bëjnë për ta përmirësuar situatën. Fëmijët kanë nevojë për rregulla familjare në lidhje me sjelljen, dhe mund të jetë e dobishme të diskutohet se çfarë duhet të ndodhë nëse ato shkelen.

Përkthyer dhe përshtatur nga CNA.al