web counter
LEXO PA REKLAMA!

SHKARKO APP

App Store
Google Play

E fundit!

x

Kafeina ju nxit të blini më shumë gjëra, veçanërisht produktet më të padobishme

13 Gusht 2022, 10:22, Blog CNA

Kafeina ju nxit të blini më shumë gjëra,

Kafeina është një stimulues i njohur. Por sipas një ekipi studiuesish nga disa institute amerikane, ajo mund të ndikojë edhe tek shpenzimet tona financiare. Në studimin e publikuar në “Journal of Marketing”, u ekzaminua efekti i marrjes së kafeinës me sasi që varionin nga 30 mg në 100 mg në ditë. Studiuesit zbuluan se vetë kafeina duket se rrit nivelet e impulsivitetit në lidhje me numrin e produkteve të blera.

Eksperimenti

Për të kryer eksperimentin e tyre, studiuesit ngritën një kioskë për prodhimin e kafes ekspres pranë dy dyqaneve me pakicë në dy qytete franceze, dhe jashtë një qendre tregtare në Spanjë. Në total, në eksperiment morën pjesë 300 persona: gjysmës së tyre iu ofrua një filxhan kafe falas me kafeinë, ndërsa gjysmës tjetër ujë ose kafe pa kafeinë.

Zbulimet

Studiuesit zbuluan se njerëzit që konsumonin kafe me kafeinë, shpenzonin shumë më tepër dhe blinin më shumë produkte sesa ata që pinin kafe pa kafeinë ose ujë. Për më tepër, kafeina dukej se kishte ndikim edhe mbi llojet e artikujve të blerë.

Kështu vullnetarët në eksperiment që kishin konsumuar kafeinë, blinin më shumë produkte “qejfi” apo argëtuese si qirinj aromatik dhe aromatizues. Ndërkohë, nuk kishte dallime në blerjen e produkteve të dobishme, si për shembull enët e kuzhinës. Në shumë dyqane dhe qendra tregtare ka gjithnjë e më shumë pika ku ofrohet kafe.

“Në përgjithësi, shitësit me pakicë mund të përfitojnë financiarisht nëse blerësit konsumojnë kafe para ose gjatë blerjeve, pasi efektet janë më të forta për blerjet impulsive dhe shpeshherë të panevojshme. Ndërkohë politikë-bërësit mund të dëshirojnë të informojnë konsumatorët për efektet e mundshme të kafeinës në shpenzime”- shpjegojnë studiuesit.

A është kafeina një stimulues?

Kafeina mund të konsiderohet si një nga stimuluesit më të fuqishëm të ligjshëm, që mund të gjendet kudo.

Ku është e pranishme kafeina përveç kafesë?

Përveç kafesë, kafeina është e pranishme edhe në çaj, disa pije të gazuara, disa pije energjike, çokollatë dhe disa ilaçe.

Çfarë efektesh ka kafeina në trupin e njeriut?

Kafeina rrit përqendrimin dhe vigjilencën, pasi vepron si stimulues në sistemin nervor qendror. Efekti më i dukshëm është ai që ju bën më vigjilent: ndiheni më zgjuar dhe më pak të lodhur. Për këtë arsye kafeina është përfshirë në disa ilaçe kundër përgjumjes, por edhe kundër dhimbjes së kokës dhe migrenës.

Cilat janë efektet e heqjes dorë nga kafeina?

Moskonsumimi i kafeinës mund t’iu shkaktojë dhimbje koke dhe simptoma të tjera si nervozizëm, ankth dhe përgjumje. Simptoma më të rralla mund të jenë dridhjet.

Çfarë ndodh nëse konsumoni shumë kafeinë?

Një mbidozë e vërtetë e kafeinës është një dukuri mjaft e rrallë, por kur ndodh ajo mund të shkaktojë të vjella, konfuzion, madje edhe halucinacione.

Përkthyer dhe përshtatur nga CNA.al





Lajmet e fundit nga