E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Policia e Shtetit: “Truri” i inceneratorëve dhe bashkëpunëtorët në kërkim ndërkombëtar

4 Prill 2023, 14:57, Aktualitet CNA

Policia e Shtetit: “Truri” i inceneratorëve dhe

Foto ilustruese

Mirel Mërtiri, apo siç e ka quajtur SPAK "truri" i inceneratorëve dhe bashkëpunëtorët e tij, Stela Gugallja dhe Klodian Zoto janë shpallur në kërkim ndërkombëtar.

Këtë e ka konfirmuar ditën e sotme Policia e Shtetit në një përgjigje për CNA.

CNA iu drejtua Policisë së Shtetit nëse shtetasi Mirel Mërtiri ishte shpallur në kërkim ndërkombëtar, apo nëse shtetasit Mirel Mërtiri, Stela Gugallja, Klodian Zoto dhe Giuseppe Ciaffaglione ishin ndaluar dhe nëse kishin filluar procedurat e ekstradimit për znj. Gugallja.

Por për rreth 49 ditë nuk pati asnjë përgjigje.

Një ditë pas shkrimit të CNA që vinte në dukje faktin se Policia e Shtetit nuk kishte dalë zyrtarisht me një reagim, ka ardhur edhe përgjigjja nga ky institucion shtetëror.

Policia e Shtetit njofton se:

“Në zbatim të ligjit nr. 10193 “Për marrëdhëniet juridiksionale me autoritetet e huaja në çështjet penale”, të datës 03.12.2009, i ndryshuar, si dhe udhëzimit të përbashkët nr. 376, të datës 24.06.2022, ndërmjet Ministrisë së Brendshme, Prokurorisë së Përgjithshme dhe SPAK-ut, “Për shpalljen e personave në kërkim ndërkombëtar”, të tre shtetasit e përmendur më lart janë shpallur në kërkim ndërkombëtar nga Interpol Tirana. Shpallja në kërkim kombëtar dhe ndërkombëtar, bëhet mbi bazën e vendimit të Prokurorisë dhe të Gjykatës. Policia e Shtetit, me të marrë njoftimin për vendime të tilla, bën shpalljen në kërkim.

-Shtetasja Stela Gugallja është shpallur në kërkim ndërkombëtar nga ZQK Interpol Tirana, më datë 18.02.2022, në bazë të kërkesës së SPAK-ut, nr. 22 prot. K.B, të datës 18.02.2022 dhe në zbatim të urdhrit të prokurorit, për ekzekutimin e masës së sigurimit personal.

Si rezultat i bashkëpunimit me autoritetet homologe është bërë i mundur lokalizimi i kësaj shtetaseje, në Austri, dhe janë njoftuar institucionet përkatëse. Ministria e Drejtësisë në Shqipëri ka paraqitur me shkresën nr. 1664, prot. më datë 26.05.2022, kërkesën për ekstradim. Deri në datën 04.04.2023 nuk ka një konfirmim për arrestimin dhe miratimin e ekstradimit të kësaj shtetaseje.

-Shtetasi Klodian Zoto është shpallur në kërkim ndërkombëtar nga ZQK Interpol Tirana, më datë 18.02.2022, në bazë të kërkesës të SPAK-ut, nr. 21, prot. K.B, më datë 18.02.2022, dhe në zbatim të urdhrit të prokurorit, për ekzekutimin e masës të sigurimit personal.

Nuk është lokalizuar apo arrestuar me qëllim ekstradimin, deri në datën 04.04.2023.

-Shtetasi Mirel Mërtiri është shpallur në kërkim ndërkombëtar nga ZQK Interpol Tirana, më datë 09.02.2023, në bazë të kërkesës së SPAK-ut, nr. 25 prot. K.B, datë 09.02.2023, dhe në zbatim të urdhrit të prokurorit, për ekzekutimin e masës të sigurimit personal.

Nuk është lokalizuar apo arrestuar me qëllim ekstradimin, deri në datën 04.04.2023”, shprehet Policia e Shtetit për CNA.

Kujtojmë se CNA ka raportuar më parë se në mesditën e 9 shkurtit, Mërtiri u shpall në kërkim ndërkombëtar.

"Truri" i inceneratorëve akuzohet për aferën në inceneratorit e Elbasanit dhe të Fierit.

Ai dhe bashkëpunëtorët e tij Klodian Zoto, Stela Gugllja, Giuseppe Ciaffaglione kanë përfituar kontrata koncensionare prej afërsisht 480 milionë euro nga qeveria shqiptare./ CNA.al