web counter
LEXO PA REKLAMA!

SHKARKO APP

App Store
Google Play

E fundit!

x

Përfundon panairi “Philoxenia”/ Tri ditë promovim i Korçës dhe bukurive të saj

17 Nëntor 2024, 20:00, Qyteti im CNA

Ka përfunduar me sukses Panairi Ndërkombëtar i Turizmit Philoxenia, në Selanik të Greqisë, ku Shqipëria u përfaqësua këtë vit me juglindjen. Një iniciativë e Këshillit të Qarkut të Korçës, e cila bëri bashkë të gjashta bashkitë e juglindjes, që prezantuan paketën e tyre turistike duke promovuar atraksionet më të veçanta që ka çdo bashki.

CNA ka ndjekur për tri ditë radhazi zhvillimet në këtë panair, ku takimet me operatorët turistikë kanë qenë të shumta dhe është vënë re një interesim i lartë i shteteve të ndryshme të botës për të vizituar Shqipërinë dhe veçanërisht Korçën me rrethet e tjera të qarkut.

Në ditën e fundit të Philoxenia, atmosfera u bë mjaft e këndshme dhe e bukur me pjesëmarrjen e Grupit të Sazeve të Kolonjës dhe Grupin e Valltarëve të Devollit të cilët performuan për të gjithë pjesëmarrësit dhe i dhanë ngjyra të tjera këtij aktiviteti.

Përfundon panairi “Philoxenia”/ Tri ditë promovim i

Me tingujt e klarinetës nga mjeshtri Aleks Xhelili dhe pjesën tjetër të grupit, me këngët tradicionale të zonës së Kolonjës, si edhe me vallen devolliçe të interpretuar nga grupi i Devollit, të huajt patën mundësinë të shijojnë atmosferën e ngrohtë dhe të njohin anën artistike të këtyre dy zonave.

Për mjeshtrin e klarinetës, Aleks Xhelili, pjesëmarrja në këtë event madhështor ka një vlerë shumë të madhe, për të nxjerrë në pah trashëgiminë e pasur shpirtërore të popullit shqiptar, me këngë e valle të mrekullueshme. Xhelili sot ka ndier një kënaqësi të jashtëzakonshme në Panairin e organizuar në Selanik duke u shprehur se është krenar që është shqiptar.

Përfundon panairi “Philoxenia”/ Tri ditë promovim i
Mjeshtri Aleks Xhelili

“Kjo ka vërtet një vlerë shumë të madhe, dhe erdha këtu për të treguar, ndarë dhe shijuar këtë pasuri. Ajo që populli ynë ka është një trashëgimi e pasur shpirtërore, me këngë të bukura, valle të mrekullueshme, dhe vlera të veçanta nga qarku ynë i Korçës, por edhe nga e gjithë Shqipëria. Me mendimin tim, këto vlera duhen çmuar dhe përçuar si një pasuri e përbashkët e të gjithëve. Sot, ndjeva një krenari të jashtëzakonshme që pata mundësinë të përfaqësoj veten, talentin tim, qarkun tim, dhe shtetin tim. Jam krenar që jam shqiptar.”

Për drejtuesin e Këshillit të Qarkut Korçë, Erjon Nexhipi, pjesëmarrësit në këtë panair kanë pasur një interes të madh për rajonin e juglindjes. Të tria ditët kanë qenë intensive dhe me takime frytdhënëse, të cilat tashmë kanë sjellë një tjetër punë që duhet ndjekur në ditët e muajt në vijim për të finalizuar një prurje të turistëve në rajon.

Përfundon panairi “Philoxenia”/ Tri ditë promovim i
Drejtuesi i Këshillit të Qarkut Korçë, Erjon Nexhipi

“Ishin tri ditë intensive dhe entuziaste, të mbushura me aktivitet pa ndërprerje. Interesi që pati për stendën e rajonit të Korçës dhe për aktivitetet që zhvilluam gjatë këtyre ditëve ishte i jashtëzakonshëm. Tur-operatorë nga pothuajse gjithë bota u interesuan për produktin turistik të rajonit të Korçës. Takimet ishin shumë frytdhënëse. Kjo është një punë që duhet ndjekur çdo ditë dhe në muajt në vijim, në mënyrë që të finalizohet me një prurje më të madhe turistike në rajonin tonë. Një punë e tillë kërkon angazhim dhe dua të falënderoj veçanërisht bashkitë dhe bizneset turistike të rajonit të Korçës, të cilat kanë qenë të përkushtuara për të promovuar produktet e tyre dhe për të prezantuar sa më mirë potencialin turistik të rajonit.”

Përfundon panairi “Philoxenia”/ Tri ditë promovim i

Panairi Ndërkombëtar i Turizmit “Philoxenia” është eventi më i madh i këtij lloji që u zhvillua për herë të 39-të në Selanik të Greqisë. Ky event ka për qëllim prezantimin e vendeve të ndryshme të botës për të rritur numrin e vizitorëve në çdo shtet, e për t’i njohur ata me zonat më të bukura. Shqipëria u përfaqësua këtë edicion për herë të dytë, me rajonin e Korçës ku të gjitha bashkitë e saj promovuan atraksionet më të bukura turistike, përfshirë këtu trashëgiminë kulturore e historike, hotelet e bujtinat, fshatrat turistike e destinacionet e qarkut që çdo vit e më shumë po tërheqin vëmendjen e vizitorëve./ CNA TV

Përfundon panairi “Philoxenia”/ Tri ditë promovim i

Përfundon panairi “Philoxenia”/ Tri ditë promovim i





Lajmet e fundit nga