Pas më shumë se 20 vitesh pritje/ Nis ndërtimi i Muzeut të Dritëro Agollit në Devoll

20 Qershor 2025, 16:29, Qyteti im CNA

Pas më shumë se 20 vitesh pritje/ Nis ndërtimi i Muzeut të

Në zemër të Devollit, aty ku u lind dhe u formua një prej kolosëve të letrave shqipe, ka nisur më në fund ndërtimi i Muzeut të Dritëro Agollit, një projekt i shumëpritur dhe thellësisht simbolik për të gjithë komunitetin dhe më gjerë.

Muzeu do të shërbejë si një vend nderimi për jetën, krijimtarinë dhe kontributin e jashtëzakonshëm të Dritëro Agollit, një autor që jo vetëm e pasuroi letërsinë shqipe, por edhe bëri të njohur emrin e Devollit brenda dhe jashtë kufijve.

Pas më shumë se 20 vitesh pritje/ Nis ndërtimi i Muzeut të

Kryetar i Bashkisë Devoll, Eduard Duro shprehet se kjo vepër do t’i japë vlerën që i takon kolosit nga Devolli të letrave shqipe.

“Është një vepër e cila do t’i japë vlerën që i takon kolosit të letrave shqipe dhe atij që ne na ka nderuar si zonë, i cili është aset i mbarë vendit. Shpresoj që këto punime të ecin me ritmin e duhur e unë për këtë jam shumë optimist, brenda 6 muajve ne të kemi gati godinën dhe më pas të vazhdojmë përpjekjet e mëtejshme për muzealizimin e godinës, pasi duhet dhe një grup pune i veçantë për këtë pjesë. Shpresojmë që kjo vepër të shërbejë si një aset i shpalljes së kulturës devollite dhe vlerat që karakterizojnë popullin e Devollit. Kemi shumë për të shpalosur në Devollin e Sipërm dhe kjo të bëhet një atraksion dhe të jetë i vizitueshëm, jo vetëm nga nxënësit e shkollave, pasi do të jetë një kurrikul në programet mësimore të tyre, por të jetë e vizitueshme edhe nga turistë të huaj të cilët janë të njohur me figurën e Dritëro Agollit, pasi vepra e tij është përkthyer në shumë gjuhë të botës”,-tha Duro.

Pas më shumë se 20 vitesh pritje/ Nis ndërtimi i Muzeut të

Kryetar i Këshillit të Qarkut Korçë, Erion Nexhipi tha se ky projekt përfaqëson një nga emblemat e kulturës shqiptare, Dritëro Agollit, që nuk i takon vetëm Devollit.

“Në bashkëpunim me Bashkinë Devoll, ne iniciuam këtë projekt vitin e kaluar, punuam për të përmirësuar projektin e krijuar para disa viteve, gjetëm financimin dhe pas proçedurave ligjore kemi filluar punimet për realizimin e këtij investimi. Ky projekt përfaqëson një nga emblemat e kulturës shqiptare, Dritëro Agollit, që nuk i takon vetëm Devollit. I takon rajonit, Shqipërisë, mbase edhe enciklopedisë botërore të kulturës. Besoj se me atë dashuri që ka filluar, ky projekt do të realizohet e do të përfaqësojë në mënyrë dinjitoze këtë figurë të jashtëzakonshme të vendit tonë”,-tha Nexhipi.

Pas më shumë se 20 vitesh pritje/ Nis ndërtimi i Muzeut të

I projektuar për vite me radhë, por i vonuar për arsye të ndryshme, ky muze po merr më në fund formë, duke u kthyer në një dëshmi konkrete të vlerësimit për trashëgiminë kulturore dhe për figurën e pavdekshme të shkrimtarit. Edhe miqtë dhe bashkëkohësit e tij kanë shprehur emocion dhe entuziazëm për realizimin e kësaj nisme.

Pas më shumë se 20 vitesh pritje/ Nis ndërtimi i Muzeut të

Një nga miqtë e Dritëroit, Endri Fifo tregoi se ky muze realizon edhe një dëshirë të vetë devollinjve.

“Dritëro Agolli ka qenë dhe mbetet miku im, një nga figurat qëndrore të poezisë shqiptare dhe detyrimisht ndjej një kënaqësi sepse Dritëroin gjithmonë e kam patur mik, i kam bërë edhe këngë kur ishte gjallë dhe kur e ka dëgjuar, më ka përqafuar e më ka thënë: "Faleminderit, nuk do ta harroj gjithë jetën.". Është realizuar një dëshirë e gjithë devollinjve, por nuk mbaron me kaq. Dritëroi ka patur ëndërr që të ngrihet edhe një monument për punën në mes të Bilishtit. Është kënaqësi e madhe, personalisht për mua e për familjen time, që Dritëroit po i bëhet ky vlerësim dhe nuk është vetëm kaq. Do të jetë një atraksion turistik sepse shumë vizitorë kërkojnë të vijnë e të shohin muzeun e tij në Devoll”,-tha Fifo.

Vlera totale e kontratës kap shifrën mbi 15 milion lekë pa TVSH, ndërsa me TVSH arrin rreth 19 milion lekë. Punimet pritet të zgjasin 6 muaj nga momenti i dorëzimit të sheshit të ndërtimit dhe nënshkrimit të procesverbalit për fillimin e punimeve./CNA