web counter
LEXO PA REKLAMA!

SHKARKO APP

App Store
Google Play

Basha: Rama do t’i kontrollojë, mbështes SPAK-un dhe BKH-në

21 Shkurt 2024, 11:53, Politikë CNA

Basha: Rama do t’i kontrollojë, mbështes SPAK-un dhe BKH-në

Lulzim Basha, në një deklaratë për mediat, ngriti sërish akuza ndaj qeverisë dhe kryeministrit Edi Rama për tentativat e këtij të fundit për të kontrolluar drejtësinë.

Ashtu siç edhe është denoncuar nga CNA, Basha tha se Rama është shqetësuar nga kontrollet e SPAK-ut dhe të BKH-së.

“Qeveria e Edi Ramës ka propozuar të amnistojë zyrtarët e korruptuar të dënuar apo nën hetim nga SPAK-u dhe të dënuar nga GJKKO. Është skandaloze që të përdorësh Amnistinë Penale, e cila kryhet për arsye humanitare ndaj një kategorie të dënuarish për vepra të thjeshta që të nxjerrësh nga burgu apo të anulosh hetimet për zyrtarët e korruptuar të Edi Ramës. Kjo nuk është asgjë më pak sesa një ndërhyrje te Gjyqësori apo te Reforma në Drejtësi. Ndërkohë që nga njëra anë partnerët ndërkombëtarë dhe vetë shqiptarët vendosin theksin te fundi i pandëshkueshmërisë, mesazhi që Rama dhe qeveria e tij japin në kohën që janë treguar me gisht ndërkombëtarisht, por dhe nga vetë pjesëtarët dhe ish-pjesëtarët e tyre që një qeveri tërësisht të korruptuar, është se ata që i dënon gjykata i liron qeveria me votat në parlament.

Nuk është kjo ndërhyrja e parë e Edi Ramës në Reformën në Drejtësi. Ka muaj që ka paralajmëruar komisione kundër SPAK-ut dhe vetëm pak ditë më parë është ankuar se Byroja Kombëtare e Hetimeve po shqetëson ministrat dhe zyrtarët e tij me hetimet që po bën. Është e qartë që Edi Rama i trembet drejtësisë, është bërë pishman për Reformën në Drejtësi, ka menduar se do të vazhdonte ta kontrollonte në tërësi SPAK-un dhe tani që të paktën segmente të caktuara të SPAK-ut duket qartë se po veprojnë në autonomi të plotë dhe në përputhje me ligjin, ai po bën gjithçka për të ndërhyrë dhe për të vendosur edhe njëherë pandëshkueshmërinë dhe mburojat qeveritare në funksion të pandëshkueshmërisë”, u shpreh ai.

Basha tha se në këtë situatë do të mbështesë prokurorët, BKH-në dhe SPAK-un, të cilët i inkurajoi të mos ndalin punën.

“Edi Rama dhe qeveria e tij e korruptuar kanë frikë nga drejtësia, duan t’i mbyllin gojën drejtësisë. Partia Demokratike inkurajon prokurorët, BKH-në, prokurorët e SPAK-ut, GJKKO-në, të vazhdojnë me profesionalitet punën e tyre. Pa diskutim që këtu do të vinin punët. Një drejtësi e reformuar ka për detyrë, në radhë të parë, të hetojë, të çojë para ligjit dhe të dënojë korrupsionin qeveritar dhe nuk ka dyshim që një drejtësi e reformuar është në konflikt interesi me një qeveri të korruptuar”, theksoi kreu i PD-së së "Vulës"./ CNA





Lajmet e fundit nga