DENONCIMI: Projekti i Parkut Divjakë-Karavasta do shkatërrojë faunën dhe florën

20 Shkurt 2024, 12:00, Politikë CNA

DENONCIMI: Projekti i Parkut Divjakë-Karavasta do shkatërrojë

Ina Zhupa

Deputetja e Partisë Demokratike, Ina Zhupa, deklaroi nga selia blu se ndryshimet në ligjin për zonat e mbrojtura, nuk kanë sjellë asnjë të mirë për vendin përkundrazi bëhet për interesat e klientëve të pushtetit për të ndërtuar dhe në këto zona.

Ajo u shpreh se "projekti shkatërrimtar në territorin e mbrojtur të Parkut Kombëtar Divjakë-Karavasta quhet Kingcoast Divjaka".

Sipas saj, fotografitë tregojnë se pishat do t’u hapin vend ndërtimeve, rrugëve me asfalt dhe vegjetacionit artificial.

"Praktikisht shkatërrimi i ekosistemit dhe i florës dhe faunës së veçantë të këtij parku. Harroni flamingon dhe pelikanin, apo pamjet e tjera mahnitëse. Një mushkëri për vendin do të shuhet me këtë projekt", u shpreh deputetja.

Në fund të fjalës së saj, ajo u bëri thirrje qytetarëve që të marrin pjesë në protestën e sotme të opozitës.

Deklarata e plotë:

Me investigimin e gazetarit Artan Rama, ra edhe fasada që mbulonte ndryshimet e ligjit të zonave të mbrojtura, që Partia Demokratike e ka kundërshtuar që ditën e parë.

Një ligj qartësisht me porosi, siç e kishim paralajmëruar, i cili nuk sjell asnjë të mirë për vendin, përkundrazi bëhet për interesat e klientëve të pushtetit për të ndërtuar dhe në këto zona. Shembulli konkret është ky projekt në Parkun Kombëtar Divjakë-Karavasta që do të ndërtohet pikërisht në zonë të mbrojtur që sot nuk lejohet. Pronarët e tij kanë pasur siguri që do ndryshohej ligji për ta se ndryshe nuk do të projektonin në zonë ku nuk mund të ndërtohej.

Projekti shkatërrimtar në territorin e mbrojtur të Parkut Kombëtar Divjakë-Karavasta quhet Kingcoast Divjaka. Fotografitë tregojnë se pishat do t’u hapin vend ndërtimeve, rrugëve me asfalt dhe vegjetacionit artificial. Praktikisht shkatërrimi i ekosistemit dhe i florës dhe faunës së veçantë të këtij parku. Harroni flamingon dhe pelikanin, apo pamjet e tjera mahnitëse. Një mushkëri për vendin do të shuhet me këtë projekt.

Mirëpo ky nuk është i vetmi projekt që do bëhet në zonat e mbrojtura sepse ligji që shkatërron zonat e mbrojtura në kundërshtim me rekomandimet e BE, në kundërshtim me shoqërinë civile dhe me interesin publik pritet të kalojë me shpejtësi këtë të enjte në kuvend do t'i hapë rrugë shkatërrimit të tyre në gjithë vendin. Nuk do kursehen që nga Dajti, e Kune Vain, Butrint, Pishë Poro, e çdo bukuri e zonë e mbrojtur sot. Deputetët socialistë do përdoren si kartonë sa herë ia kërkon partia.

Të dashur qytetarë,
Rama e trajton Shqipërinë si plaçkë që mund ta ndajë në copa për klientët “duke ngrënë qofte te Veranda”! Sot është dita që të protestojmë në orën 17:30 në bulevard, kundër këtyre ligjeve klienteliste që u marrin edhe ajrin qytetarëve, kundër shkatërrimit të bukurive natyrore të vendit, kundër masakrës mjedisore për beton, kundër humbjes së gjurmëve historike e kulturore. Të gjithë bashkë në protestë!/CNA