Basha “lëshon” zëdhënësen e tij/ I “vjen zëri” për inceneratorët dhe sterilizimin

24 Gusht 2023, 15:02, Politikë CNA

Basha “lëshon” zëdhënësen e tij/ I “vjen

Lulzim Basha ka lëshuar zëdhënësen e tij, Mirela Karabinën, për të folur për dy aferat korruptive, inceneratorët dhe sterilizimin.

Në deklaratën për mediat, Karabina i drejton gishtin kryeministrit Edi Rama si përgjegjësi kryesor për këto dy afera.

Karabina thotë se Rama duhet të mbajë përgjegjësi për të gjithë strukturën shtetërore të vjedhjes dhe korrupsionit të ngritur mbi inceneratorët, promovimin e politikave të dështuara që nuk kishin për qëllim përmirësimin e jetës së qytetarëve, por veshjen dhe justifikimin politik të një skeme të pastër shpërdorimi të fondeve të shtetit shqiptar.

“Për 8 vjet rresht, Kryeministri Rama dhe qeveria e drejtuar prej tij kanë mbrojtur me pathos politikën e incenerimit të mbetjeve dhe projektet 'e mëdha' të kësaj qeverie në këtë sektor.

Këto projekte, që u provuan nëpërmjet hetimeve të SPAK-ut se, janë skema korrupsioni të ideuara, drejtuara dhe administruara nga nivelet më të larta të hierarkisë qeveritare, u kanë kushtuar shtetasve shqiptarë 450 milionë euro.

Me dështimin e skemës së korrupsionit të inceneratorëve, qeverisë së 'përgjegjësive personale', i ka lindur nevoja për një skemë të re të zhvatjes së parave të taksapaguesve shqiptarë.

Sipas të dhënave të disponuara nga Partia Demokratike, e të bëra publike edhe nga BIRN rezulton se Ilir Beqja, një tjetër zyrtar i lartë i qeverisjes që pritet së shpejti të mbajë përgjegjësi personale, në drejtimin e Agjencisë Shtetërore të Programimit Strategjik dhe Koordinimit të Ndihmës (SASPAC), e cila është në varësi të drejtpërdrejtë të Kryeministrit Rama, i ka propozuar Qeverisë dy projekte për Qarqet Elbasan dhe Fier.

Këto dy projekte të cilësuara si 'Unike me rëndësi kombëtare' parashikojnë të vjelin nga buxheti i shtetit shumën prej 113 milionë eurosh, shumë e cila ndahet në 50 milionë euro për Qarkun Elbasan dhe 63 milionë euro për Qarkun Fier.

Për të dy këto qarqe nga Qeveria e 'përgjegjësisë personale' vetëm për projektet e inceneratorëve janë shpenzuar rreth 60 milionë euro.

Nga vjedhja tashmë e provuar e këtyre shumave kanë përfunduar në dyert e drejtësisë zëvendëskryeministra, ministra, deputetë e funksionarë të tjerë të administratës shtetërore.

Një skemë e re vjedhjeje po lind nga dora e personit të dyshuar për korrupsionin me sterilizimin dhe 'check up'-in, Ilir Beqja përpara se të futet në kategorinë e atyre që mbajnë përgjegjësi personale, po i jep Edi Ramës mundësinë e ndërtimit të projekteve të reja, të cilat sipas standardit të kësaj qeverie do të jenë vjedhje të reja mbi rrënojat e vjedhjeve të vjetra.

Edi Rama sot duhet të mbajë përgjegjësi për të gjithë strukturën shtetërore të vjedhjes dhe korrupsionit të ngritur mbi inceneratorët, duhet të mbajë përgjegjësi për promovimin e politikave të dështuara që nuk kishin për qëllim përmirësimin e jetës së qytetarëve, por veshjen dhe justifikimin politik të një skeme të pastër shpërdorimi të fondeve të shtetit shqiptar.

Sot është më i domosdoshëm se kurrë miratimin i ligjit për vettingun e politikanëve, si dhe miratimi i një pakete ligjore kundër krimit dhe korrupsionit qeveritar, duke i hequr çdo pengesë dhe dhënë mbështetje të pakushtëzuar SPAK-ut dhe organeve të drejtësisë për dënimin e korrupsionit edhe për sekuestrimin e pasurive që vijnë prej tij”, ka thënë Karabina./ CNA.al