Një maturë e pamaturuar, model i arsimit dhe edukimit fiktiv

19 Korrik 2022, 10:56, Opinione Qemal Çejku

Një maturë e pamaturuar, model i arsimit dhe edukimit fiktiv

Foto Ilustruese

Prej disa vitesh, të rinjtë shqiptarë po diplomohen si një brez mature i pamaturuar, në të gjitha kurrikulat dhe zhvillimin e tyre edukativo-arsimor.

Për këtë nivel shqetësues të arsimit të mesëm, përgjegjëse është kryekëput Ministria e Arsimit dhe Rinisë, e cila ka krijuar modelin vertikal autoritar që harton, dikton dhe zbaton në terren politika joeficiente.

Pa dashur të shtoj edhe një tjetër analizë krahasimore me vendet e rajonit (sepse me BE-në jemi vite dritë larg), dua të nxjerr disa konsiderata të miat nga monitorimi me kujdes i zhvillimit të konkursit të maturës:

1- Dëshmi e një niveli dramatik të njohurive të cunguara në gjuhën shqipe dhe atë të letërsisë. Si dy shtylla të botëkuptimit dhe njohurive kulturore të të rinjve, testi i maturës në këtë drejtim provoi se mësuesit në këto kurrikula dhe programi mësimor që është hartuar nga ekspertët partiakë, vuajnë nga boshllëqe të mëdha të përgatitjes profesionale.

2- Modelet e teksteve të importuara shtuan edhe më shumë produktet OMGj të arsimit parauniversitar mes të rinjve tanë. Tekste shkencore të marra jashtë vendit me arsyen që të kemi tekste moderne, por në fakt në morëm tekste të përdorura në shkolla profesionale apo shtete të Afrikës, duke shkatërruar lëndët shkencore me traditë në Shqipëri, Matematika, Fizika apo Biologjia.

Të përkthyera keq, me shumë lapsuse frojdiane, librat e tenderave të botuesve, kontribuan edhe më shumë në keqarsimimin dhe edukimin e brezit të maturantëve.

3- Rezultatet dekurajuese të testit të shkencave të sakta konfirmuan një mungesë totale të orientimit, shpjegimit të punës laboratorike, dhe qasjes në TIK të maturantëve sërish nga një plejadë arsimore që më së shumti shërben për patronazhistë dhe punë partie, sesa për edukatorë dhe arsimtarë të nivelit parauniversitar.

4- Testet e maturës dëshmuan ndër të tjera se Ministrisë së Arsimit i ka dështuar çdo skemë dhe strategji për aftësimin e mësuesve dhe integrimin e tyre në standardet europiane. Nisma e re e propagandës rilindase për të testuar nivelin e mësuesve ishte diversioni i radhës në politikat "përça e sundo" brenda sistemit me dy qëllime; heqja e përgjegjësise politike nga vetja e ministres për:

A. çdo dështim në arsimin parauniversitar

B. hapja e shtigjeve të reja për punësimin e plotë të çdo militanti e patronazhisti në sistemin më me strategji të një shteti demokratik.

Një presion i tillë psiko-social pati pasojat e veta tek procesi i shpjegimit të lëndëve dhe mësuesisë në tërësi, gjë që u përkthye në modele të dobëta dhe krejt fiktive të maturantëve.

5- Nisma tjetër “Tri lëndë në 6 orë”, edhe pse e nisur me zhurmë e "show" politik, në fakt që në fillim nuk nxiti asnjë optimizëm te mësuesit dhe vetë nxënësit. Nga ekspertët formula “dy lëndë dhe dy tema të reja për 90 minuta”, vetëm se prodhoi edhe më shumë fiktivitet dhe pasivitet në skemën e dështuar të arsimit të gjimnazistëve, të cilëve u është dëmtuar me kohë vëmendja dhe përkushtimi ndaj shkollës.

6- Shkëputja nga auditorët për shkak të pandemisë solli pasoja fatale në formimin e maturantëve edhe të këtij viti pasi arsimi online dështoi në të gjitha akset e tij.

Vetëm Shqipëria nuk arriti të kishte një sistem të unifikuar mësimor dhe me probleme të shumta në aksesimin e programeve online nga nxënësit, pasi një pjesë e madhe e tyre nuk zotëronte infrastrukturën dhe mjetet e duhura të TIK.

7- Në të gjitha studimet ndërkombëtare si: Banka Botërore, UNESCO etj i kanë kërkuar qeverive që të zbatohej një strategji e korrigjimit të mungesave që nxënësit kishin nga pasojat e pandemisë, të përshtaten dhe kurrikula, të hartohet strategji e re për arsimit, në mënyrë që të konsiderohet plotësisht prioritet kombëtar.

8- Matura 2022 përsëriti të njëjtin skenar të shëmtuar atë të publikimit të tezave duke na e sjellë si një parathënie të kapitujve pasues të falimentimit të sistemit.

Askush nuk dha dorëheqjen, askush nuk kërkoi ndjesë, askush nuk mbajti përgjegjësi ndërkohë që maturantët morën shkundjen e parë, të fortë të një padrejtësie, madje që shkakton çdo ditë kjo qeverisje.

Nxënësi i mirë u vlerësua me notë kalimtare dhe mbetësit iu vendos notë e lartë. Teatrit absurd të arsimit edhe këtë herë iu rrëzua perdja, por populli sërish mbeti spektatori i zhgënjyer dhe më së shumti ata të sakrifikuarit e përjetshëm; prindërit, familjet e maturantëve.

Epilogu i një procesi të gjatë sfidues i sistemit parauniversitar dhe këtë vit u mbyll i dështuar, por mbi të gjitha i trishtuar pasi auditorët e Universitetit do shtohen me studentë fiktivë, pa përgatitje të duhura pa ambicie të lindur.

Jo për faj të tyre, por për një fatalitet të shkaktuar nga politika dhe qeveria më dritëshkurtër në historinë qindravjeçare të arsimit dhe dijes së kombit shqiptar./CNA.al