Kur zbulon “konspiracionin botëror” nga kafenetë e Tiranës

17 Korrik 2022, 11:10, Opinione Erion Dasho

Kur zbulon “konspiracionin botëror” nga kafenetë e

Erion Dasho

Gjatë pandemisë jam çuditur me një grup mjekësh, të cilët u përpoqën të "binin në sy" duke u rreshtuar në anën e nxitësve të teorive konspirative rreth COVID-it.

Këta mjekë e gjetën frymëzimin te disa ish-mjekë perëndimorë, të cilët prej kohësh kishin krijuar përplasje me atë që quhet "mjekësia tradicionale" apo e rregulluar me ligje e rregulla etike.

I quaj "ish-mjekë" sepse pjesës më të madhe të tyre, pasi luftuan vite me radhë për të promovuar ide radikale dhe pothuajse gjithmonë të rrezikshme, u janë hequr licencat, janë përjashtuar nga shoqatat apo komunitetet mjekësore, etj.

Fatkeqësisht, sot në epokën e "informacionit të lirë" çdo person ka mundësi të gjejë një kanal komunikimi për të shprehur mendimin e vet.

Këta ish-mjekë shfrytëzuan pandeminë për të rimarrë vëmendje dhe për të infektuar edhe kolegë të tjerë në promovimin e ideve të tyre të dëmshme, duke nisur nga vendosja në dyshim e ekzistencës së pandemisë, deri te lufta e paprinciptë kundër vaksinës.

Rezultati i dukshëm? Disa ndjekës më shumë në rrjetet sociale dhe ndoshta edhe "pompim" i vetëbesimit personal.

Rezultati i padukshëm? Me qindra, për të mos thënë mijëra vdekje qytetarësh, të cilat do të ishin shmangur sikur komuniteti i profesionistëve mjekësorë të kishte folur vetëm me gjuhën e shkencës.

***

Çfarë na mësoi pandemia?

Shumë, por në këtë shkrim do të ndalem vetëm në 2-3 mësimet kryesore të saj.

Së pari, u kuptua qartë se publiku nuk është më "i bindur" qoftë edhe ndaj të vërtetave që lidhen direkt me shëndetin dhe jetën e vet.

Edhe sot ka komentues të rrjeteve sociale që përdorin termin "plandemi" duke injoruar faktin se 20 mijë shqiptarë vdiqën në dy vjet dhe për herë të parë në historinë e kombit shqiptar numri i vdekjeve kaloi atë të lindjeve.

Individë të shumtë, të frustruar me të drejtë me qeverisjen e keqe, kundërshtojnë çdo komunikim që vjen nga kanale zyrtare në emër të lirisë, të drejtave të njeriut dhe zgjedhjes së lirë.

Pasojat ishin mosbesimi tek ekzistenca e një pandemie, mosbindja ndaj masave parandaluese dhe moskryerja e vaksinës jetëshpëtuese. E përkthyer fatkeqësisht në sëmundje, shtrime në spital dhe vdekje.

Së dyti, na mësoi se shëndeti është kthyer jo vetëm në çështje sociale, ekonomike, financiare, ligjore, etike, etj., siç ka qënë prej shekujsh, por gjithmonë e më tepër edhe në çështje politike.

Nga Amerika e fuqishme, te Shqipëria rrumpallë qytetarët e ndjenë për "detyrë politike" të rreshtoheshin në llogore politike edhe lidhur me një çështje thellësisht shëndetësore si vaksinimi.

Sot është provuar katërcipërisht se vaksinimi shpëton jetë dhe nuk i ka kurrsesi rreziqet imagjinare që ju veshën në fillimet e fushatës së vaksinimit anti-COVID.

Dhe megjithatë, vazhdojnë të dalin në media përfaqësues të "koalicionit anti-konspiracion" për të folur sërish dhe sërish për plandeminë, vaksinat vrasëse, etj., etj.

***

Sigurisht që bota ka patur dhe do të ketë konspiracione. E tillë është natyra e njeriut dhe ligjet e shoqërisë njerëzore.

Por në shekullin e 21-të, është çmenduri të besosh se "dikush" hodhi me qëllim në qarkullim një virus të modifikuar, se "dikush" shpiku një vaksinë për të sterilizuar apo shkatërruar gjenetikisht njerëzimin!!!

Të akuzosh çdo mjek apo person tjetër publik që mbron faktet dhe rrjedhën logjike të ngjarjeve si "të shitur", "të korruptuar", etj., tregon se ka kaluar çdo limit.

Të dashur anti-konspiracionistë!

Jam dakord me ju që bota ka patur, ka dhe do të ketë konspiracione. Vetëm se konspiracionet e sotëm do të zbulohen nga nipët tanë pas 50 e kusur vjetësh, atëherë kur skadojnë afatet e ruajtes së arkivave sekrete.

Të zbulosh nga kafenetë apo studiot televizive të Tiranës, "konspiracionet botërore" është e pamundur. Deklaratat tuaja, qofshi mjekë apo qytetarë çfarëdo ju bëjnë thjesht qesharakë dhe personazhë të disa mediave që janë të gatshëm të promovojnë idetë tuaja për ca shikime apo klikime më tepër.

Merruni me punën tuaj të nderuar!

Sepse duke u marrë me punën tuaj kontribuoni shumë më mirë në përparimin e asaj shoqërie të cilën pretendoni se e keni për zemër.

Dhe mos merrni më njerëz në qafë!

Lërini të qetë shqiptarët të vaksinohen, sepse mbrojnë shëndetin dhe jetën e tyre, sikundër gjermanët, fancezët, italianët dhe europianët e tjerë...