E fundit!

11:39 Aktualitet

Rama ka ndërhyrë për Ballukun?/ Braho-opozitës: Paraqitini provat në SPAK

Deputetja Elda Hoti në Komisionin për Nismat Qytetare ka d...

Studimi/ Cilët janë shoferët më të këqinj në Europë?!

7 Qershor 2022, 20:25, Kuriozitete CNA

Studimi/ Cilët janë shoferët më të këqinj në

Foto ilustruese

Një studim i porositur nga operatori rrugor francez, Vinci Autoroutes, ka bërë disa zbulime mjaft interesante këtë fillimsezoni veror.

Duhet thënë se këtë radhë, shqiptarët ia hodhën paq!

Kjo sepse studimi i pagëzuar ‘Barometri Europian i Shoferëve të Përgjegjshëm’ përfshiu vetëm 11 shtete të BE-së.

12,4000 europianët e intervistuar gjatë muajit maj të këtij viti, u pyetën rreth perceptimit të tyre mbi shoferët vendas në raport me fqinjët e tyre të tjerë në BE.

Rezultatet ishin goxha interesante.

Përgjatë të gjithë kontinentit, plot 79% e të anketuarve kishin një perceptim negativ për sa i përket performancës në timon të bashkëqytetarëve të tyre.

Nga të gjitha shtetet pjesëmarrëse ama, Greqia ishte ajo që spikati më së shumti.

Plot 91% e shoferëve grekë i gjykonin negativisht shoferët e shteteve të tjera.

Por në të njëjtën kohë, grekët ishin ata që raportuan shifrat më të larta të ‘sjelljes së pacivilizuar’ edhe nga bashkëqytetarët e tyre.

Kjo sjellje përfshinte të sharat, të bërtiturat, rëniet e borisë, afrimin e tepërt dhe parakalimin e parregullt, përdorimin e celularit apo edhe daljet nga mjeti për t’u ballafaquar me shoferët e tjerë.

Grekët morën rezultatet më të larta për sa u përket shoferëve ‘gjaknxehtë’ – duke u përputhur hera-herës deri në detaj me fqinjët e tyre në veri.

Spanjollët dhe britanikët duket se ishin shoferët më pak gjykues ndaj shteteve të tjera, ndërsa gjermanët ishin ata që ndanin pikëpamjen më pozitive për bashkëqytetarët e tyre.

Spanjollët ishin më ‘të përgjegjshmit’ për sa i përket përdorimit të telefonit gjatë udhëtimit me makinë.

Sakaq, për sa u përket shoferëve më të zhurmshëm dhe atyre më të stresuar, Belgjika zuri vendin e parë.

Vetëm 47% e shoferëve belgë pranuan se ndiheshin të qetë dhe të relaksuar kur ngisnin makinën – përqindja më e ulët nga të gjitha shtetet e tjera.

Krahasuar me Holandën – plot 2 në 3 shoferë ndiheshin të relaksuar në timon.

Sidoqoftë, holandezët u renditën të parët për sa i përket ngatërrimit të korsisë së biçikletave, ku 2 në 5 shoferë pranuan se kishin parkuar gabimisht në një korsi biçikletash./CNA.al