Fituesi i mbi 50 çmimeve/ Kush është Agim Doçi, poeti i hiteve

24 Qershor 2024, 09:00, Kulturë CNA

Agim Doçi

Këtë të hënë është shuar Agim Doçi, një nga poetët më të njohur dhe më të respektuar.

Ai mbylli përgjithmonë sytë në QSUT, pasi pësoi hemorragji cerebrale. Homazhet në nder të Doçit do të mbahen të martën, po ashtu edhe ceremonia e varrimit.

Pësoi hemorragji cerebrale/ Ndërron jetë poeti Agim Doçi
24 Qershor, 07:54

Por kush është Agim Doçi?

Poeti është fituesi i mbi 50 çmimeve, ndër to dhe dy herë përfaqësues me tekstet e tij në Eurovizion.

Në Eurovizion kanë shkuar me këngët e tij Anjeza Shahini dhe Kejsi Tola.

I cilësuar si një poet kolos dhe një ndër mendjet më të mprehta shqiptare, Agim Doçi ka lindur më 9 maj 1948. Ai është diplomuar për Inxhinieri, por kishte një pasion të rrallë për letërsinë. Agim Doçi ka punuar si inxhinier në Montimet Industriale duke marrë pjesë në shumë objekte të rëndësishme si Fabrika çimentosh, Metalurgjik, Superfosfat Laç, Poligrafik Tiranë etj.

Agim Doçi

Në vitet e fundit të '80 ka punuar pranë Kombinatit të Drurit "Misto Mame" si kryeinxhinier për energjinë. Në 1989 dënohet duke u caktuar të punojë me tri turne në fabriken e letër-kartonit. Përfshihet në lëvizjet e dhjetorit 1990.

Agim Doçi ka krijuar më shumë se 3.000 tekste të këngëve që janë kënduar nëpër festivalet shqiptare dhe vijojë të dëgjohen edhe në ditët e sotme.

Ai ka shkruar dhjetëra këngë patriotike, ndër të cilat “A vritet pafajësia”, “Ti Shqipëri më jep nder” të kënduar nga Kastriot Tusha dhe Manjola Nallbani, “Ku je Kosovë”, “Jam ushtar në UÇK” e shumë të tjera.

Ndër këngët që dëgjohen ende mund të rendisim “Mos ja prishni lumturinë”, “E duam lumturinë”, “Ma ke prishë gjumin e natës”, “Humba Pranverën”, etj.

Agim Doçi

Ndër këngëtarët me të cilët bashkëpunoi janë dhe Aurela Gaçe, Parashqevi Simaku, Leonora Jakupi, Myfarete Laze, Bleona Qereti, Albërije Hadërgjonaj, Françesk Radi, Kastriot Tusha, Luiz Ejlli, e shumë e shumë të tjerë.

Gjithashtu, ai ka botuar disa libra me poezi si “Hajde dru me pre”, “Rrëzuar mbi vetminë", “Rituali i kryqëzimit”.

Për kontributin e tij të pashoq, Presidenti i ndjerë, Bujar Nishani, i dha titullin “Mjeshtër i Madh”./ CNA