Ndarja nga jeta e At Antonio Bellusci-t/ Kush ishte kolosi i Arbërisë?

20 Qershor 2024, 13:11, Kulturë CNA

At Antonio Bellusci

At Antonio Bellusci është ndarë nga jeta në moshën 90-vjeçare, pasi prej shumë kohësh vuante nga një sëmundje e rëndë.

At Antonio ishte kolosi i Arbërisë, qytetar dhe bir i Kosovës dhe Shqipërisë, vëllai i të gjithë shqiptarëve, që i kushtoi tërë jetën e tij dhe energjinë e fundit botës Arbërore.

At Antonio Bellusci lindi në Frasnitë, qytezë arbëreshe, më 15 shtator 1934. Përfundoi Studimet Universitare në Filozofi pranë Kolegjit greko-bizantin në Romë.

U shugurua prift në 1962. At Bellusci ishte studiues, hulumtues i botës arbëreshe dhe asaj arvanitase.

Profesor Doktor Bellusci është autor i 25 veprave shkencore mbi kulturën, etnografinë arbëreshe. Hulumtues për rreth 40 vjet tek arvanitasit e Greqisë, të cilët i ka përmbledhur në dy vepra.

Është autor i listës së 920 fshatrave arvanitase me toponimet e tyre origjinale, ku janë regjistruar dhe incizuar më tepër se 3000 persona. Mik i ngushtë i Arisidh Kollja, Vagjel LLjapi, Jorgo Miha e shumë arvanitas të tjerë, që ruajtën dhe ruajnë identitetin e tyre arbëror.

I vetmi pjesëmarrës arbëresh në Kuvendin Ilir më 1972. Themelues i revistës “Vatra jonë”, 1963. Themelues i revistës Internacionale “Lidhja”, 1980. Themelues i Qendrës albanologjike, 1980. Themelues i Bibliotekës A. Bellusci 1960.

Hapi shkollën e parë për fëmijët shqiptarë në diasporë pranë bibliotekës së tij në vitin 1994. Mbrojtësi i Çështjes së Kosovës, duke qenë i pari që në 1989, kur Kosova dikutohej ende për Shkelje të të Drejtave të Njeriut, ai hodhi tezën "Kosova Republikë!"

Ishte i pari që në vitet 1998-1999 luftën ndaj Kosovës e konsideroi një gjenocid, dhe i dedikoi po në këtë vit artikuj, por edhe kopertinën e revistës së tij “Lidhja” kësaj tragjedie bërë popullit kosovar.

At Antonio Bellusci

Puna dhe veprimtaria e tij është nderuar me:

-Medalje Presidenciale nga Presidentja e Kosovës, Vjosa Osmani

-Medalja "Naim Frashëri" me urdhër të Presidentit të Republikës së Shqipërisë

-Medalja "Lidhja e Prizrenit" nga Presidenti Ibraim Rrugova

-Medalja e Nënë Terezës.

At Bellusci ishte i vetmi Anëtar Nderi i Lobit Lidhja shqiptaro-amerikane themeluar nga ish-senatori amerikan, arbëreshi Dioguardi për çështjen e Kosovës.

At Bellusci në thjeshtësinë e dashurinë e tij punoi për ruajtjen e gjuhës, kulturës tek arbëreshët e Italisë, zgjoi ndjenjat arbërore të arvanitasve, përforcoi dhe rriti ndërgjegjen kombëtare te shqiptarët e Shqipërisë, Kosovës, Maqedonisë, Malit të Zi, si edhe Diasporës shqiptare kudo që ndodhen shqiptarë që të mos e harrojnë gjuhën shqipe.

Çdo gjë që rrethonte botën arbërore At Bellusci është atje, i palodhur, energjik, si një gurrë e pashtershme për kombin arbëror./ CNA