E fundit!

08:16 Ekonomi

Izolimi rajonal, 22% e qytetarëve të Ballkanit nuk udhëtojnë fare te fqinjët

Pavarësisht përpjekjeve shumëvjeçare për bashkëpunim rajon...

"Jeta si një lojë shahu"/ Eduard Shalsi sjell në shqip librin e Garry Kasparov

25 Maj 2024, 11:47, Kulturë CNA

Eduard Shalsi është ndër politikanët më të njohur të së majtës, por këtë herë vjen në një profil krejt ndryshe, mbase edhe të panjohur për një pjesë të qytetarëve korçarë.

Ka qenë pikërisht libri "Jeta si një lojë shahu" e mjeshtrit të madh Kasparov, që e ka shtyrë Shalsin ta përkthejë këtë vepër.

Pasditen e së premtes, ai promovoi librin e përkthyer prej tij në ambientet e teatrit "Andon Zako Çajupi", me një pjesëmarrje të lartë të qytetarëve korçarë dhe mbështetësve e miqve të Shalsit.

Eduard Shalsi tregon se kënaqësinë që ia ka dhënë libri nuk mund ta krahasojë me kënaqësinë që i jep fakti se ky libër pasi lexohet, u shërben njerëzve të kuptojnë më mirë veten e tyre. Qytetin e Korçës, si vendlindjen e tij, Shalsi e ka pasur pikën e tij më të veçantë.

"Suksesi është fjalë e madhe, por kënaqësia që më ka dhënë libri, si edhe kënaqësia e jashtëzakonshme që po më jep fakti që libri pasi lexohet, u shërben njerëzve për të kuptuar më mirë veten e tyre, për të qenë më të vetëdijshëm për veprimet që bëjnë, për të caktuar objektiva, për të mos u trembur nga gabimet apo dështimet, edhe për të ecur përpara pasi janë rrëzuar, është i jashtëzakonshëm. Të them të drejtën, i pres me shumë kënaqësi ftesat nga qytete të ndryshme. Korçën e kisha merak, kam lindur këtu dhe ambienti i mbushur i teatrit më dha një kanëqësi të jashtëzakonshme", u shpreh ai.

Ndër të tjera, Shalsi jep një mesazh mjaft të vlefshëm sa u përket përgjegjësive që ne kemi në vendimet tona, kjo edhe për politikanët të cilët sipas tij, duhet të marrin vendime të drejta.

"Mendoj që secili prej nesh përpos detyrës dhe përgjegjësisë që ka dhe ne e kemi shumë më të madhe edhe për shkak se vendimet tona impaktojnë jo thjesht jetët tona personale, por shumë e shumë njerëz, të qenit i vetëdijshëm për pasojat e veprimeve apo vendimmarrjeve është një element nga ku duhet të nisë punën çdo politikan. Pra, vetëdija për rëndësinë që vendimmarrjet tona të përditshme kanë në jetën e shumë njerëzve, duhet të bëjë që përgjegjësia apo pagjumësia për të marrë vendimet e drejta, të jetë e jashtëzakonshme", tha ai.

Eduard Shalsi do të vijojë promovimin e librit "Jeta si një lojë shahu", duke e sjellë te lexuesit në të gjithë Shqipërinë. Përveçse një politikan i suksesshëm, duket se suksesin e radhës Shalsi po e tregon edhe në përkthim./CNA