E fundit!

09:53 Aktualitet

Denoncimi: Qytetarët në radhë në Poliklinikën e Lushnjes

Deputeti i PD-së Saimir Korreshi ka denoncuar një tjetër p...

Ekspozita "ETNO ART"/ Kostumografja Lirika Pojani sjell 9 kostume tradicionale

25 Maj 2024, 09:15, Kulturë CNA

Lirika Pojani, një ndër kostumografet më të spikatura në Korçë, ka realizuar ëndrrën e saj, krijimin e një ekspozite me kostume tradicionale të juglindjes.

Me një eksperiencë shumëvjeçare, me shumë pasion, ajo ka punuar 9 veshje të ndryshme të zonave më të njohura të Qarkut të Korçës.

Me mjeshtëri të rrallë, me veshjet popullore të punuara deri në detajin më të vogël, Lirika ka arritur të shpalosë veprat e saj që tregojnë shumë për traditën dhe vlerat e mëdha që ka kjo zonë.

Ekspozita e quajtur "Etno Art" u prit me shumë kënaqësi nga qytetarët korçarë dhe artdashësit, të cilët u mrekulluan nga punimet e veçanta të Lirikës.

Lirika Pojani tregon se çfarë punimesh ka arritur të realizojë për një kohë shumë të gjatë, prej vitit 2011, ndërsa synimi i saj është vazhdimësia e këtij projekti dhe nxjerrja në dritë e kostumeve të vjetra edhe nga zona të tjera.

"Jam munduar të sjell Korçën, e cila ka shumë kostume. Kam sjellë gjithë qarkun, Dardhën që është simboli, sigurisht që nuk do të mungonte në kostume. Devollin, Oparin dhe jam në vazhdimësi sepse zona e Korçës ka shumë kostume të pashkelura. Duhet të gjejmë dhe të jenë fiks nga origjinali, zonjat e vjetra kanë ndërruar jetë dhe është e vështirë për t'i gjetur, por do të gërmojmë. Që në 2011 kam bërë kostumin tim të parë dhe vazhdoj edhe sot e kësaj dite me dashuri t'i bëj kostumet. I kam ndarë me njerëzit që donin të porosisnin, kurse sot unë e ndaj me të gjithë. Kjo ishte ëndrra ime në sirtar dhe unë ia dola", u shpreh ajo.

Kostumet janë punuar prej saj me dorë, por edhe me makineri për plotësimin e detajeve dhe për shpejtësinë për t'i realizuar më shpejt. Për Lirikën është shumë e vështirë të gjesh modelin, veçanërisht sjell në vëmendje rastin e një zonje të moçme, e cila ka nxjerrë nga sënduku i saj kostumin e Dardhës.

"Kostumet janë të punuara me dorë, por edhe me makineri. Detaje të ndryshme që duhen bërë, por edhe për shpejtësi sepse koha ka evoluar. Në përgjithësi pjesa më e madhe e punimeve janë me dorë. Kostumi i Dardhës është punuar siç ka qenë në ato vite në tre breza. Një zonjë e moçme, e ka mbajtur në sënduk, e ka nxjerrë më pas dhe aq e emocionuar kam qenë. E kishte mbështjellë me atë mënyrën e saj. Dua të them diçka shumë të rëndësishme, në kohët e sotme që kam punuar nuk mund të sjell shajakun e atyre viteve sepse janë zhdukur. Por kjo nuk do të thotë që nuk ka vlerë bashkë me materialin e shajakut që unë kam realizuar", tha ajo.

Lirika Pojani shpreh qëllimin e saj përmes kësaj ekspozite, për të rizgjuar traditën e pasur që ofron juglindja, si edhe përqafimin e kësaj tradite nga të rinjtë.

"Qëllimi im kryesor është të zgjoj ndjenjën e traditës që gjithkush e ka, të jeni të bindur, por më shumë te brezi i ri. Dua t'i afroj sepse kur e shikon kostumin të fal atë dashuri dhe atë kënaqësi që nuk ka të përshkruar. Brezi i ri të vijë ta shikojë, ta prekë dhe të krijojë elementë të kostumit, t'i përdorë dhe në veshje të përditshme, në festa dhe në 'party'. Nëse e bëj këtë, dhe do ta bëj, unë ia kam arritur", tha ajo.

"Etno Art" nga kostumografja korçare do të jetë tashmë një pikë kyçe e atraksioneve që ofron qyteti i Korçës. Mund të quhet me plot gojë një muze i realizuar me aq mjeshtëri dhe dashuri nga korçarja Lirika Pojani./CNA