web counter
LEXO PA REKLAMA!

SHKARKO APP

App Store
Google Play

E fundit!

x

NËNA BËN KOPJE...

19 Maj 2024, 12:43, Kulturë Agim Xhafka

NËNA BËN KOPJE...

Nëna qysh kur u martua 18 vjeç e derisa doli në pension punoi me normë. Në fillim jorganpunuese e më pas prestare tek NPV ose rrobaqepësia e holandezit. Shtronte copat e pardesyve dhe më pas i priste sipas kallëpeve. Një ditë na tha në shtëpi:

-Sot kam bërë kaq ecejake për të palosur dokun sa mund të shkoja më këmbë nga Korça në Maliq e kthim.

Dhe kur vinte në shtëpi nuk gjente rehat. Se duhej bërë gatimi, pastrimi e në darkë ulej në dysheme e bënte jorganë për nuset që e porositnin. Akoma nuk gjej shpjegim se si mbijetonte ai shpirt e ai trup. Në këto beteja, babai i shton një ngarkesë tjetër:

-O grua, ti e ke bërë të mesmen. Jep ca provime dhe mbaron ekonomikun natën. Unë jam mësues i jashtëm atje e të ndihmoj.

Nëna qeshi e përdori fjalët e saj tallëse:

-Qenke i llaftarisur ti.

Por ajo babain e kishte perëndi. Një ditë i kërkoi librin dhe i tha t'ia nënvizonte çfarë do mësonte. Më pas bleu shtatë fletore me vija, i preu në katër pjesë horizontal dhe 28 minifletoret m'i dha mua t'i mbushja me nënvizimet qe bëri babai. Nuk ia prisha se mbase kështu i mëson më shpejt, mendova. Një ditë nëna më tha:

-Pyetmë për ato 28 tezat e provimit!

-Folë për pyetjen gjashtë!-ia nisa.

Prisja të bilbilonte, por ajo futi dorën tek xhepi i djathtë i pardesysë e numëroi zë ulët:

-Një,dy...pesë, gjashtë.

Nxori ato që i kisha shkruar unë. Kur po qeshja se ia kuptova hilen, më tha:

-Në rregull. Pyet prapë.

-22.-i thashë.

Futi dorën tek xhepi i brendshëm majtas i pardesysë dhe doli teza 22.

Ditën e provimit ishte e qetë dhe e qeshur. Ne në ankth. Nga dreka hyri në shtëpi me kokën lart.

-Hë?-e pyeti vëllai.

-Ishin të lehta fare. E kam tharë dhjetën.

Pas dy orësh babai erdhi i mërzitur.

-Ngeli?-i thashë.

-Mori 8.

Pastaj përqafoi mamanë dhe dëgjova:

-Më fal! U nisa për mirë. Por dhe ti mos më respekto edhe në budallallëqe.

Nëna u bë ekonomiste, ama veç në letra. Punëtore mbeti deri në pension. Ato fletore kopje me shkrimin tim qenë provim për babain.

Nëna nuk e mbante dot edhe atë ngarkesë në barrën e madhe mbi shpinë. Ndaj me lezet dashuror nuk ia bëri dysh fjalën babait. Ia plotësoi lezetshëm, si ai vrapi në dimër që bënim në kuzhinën e vockël ngaqë jashtë ishte ngricë. Ecnim e ecnim, por ama në shtëpi ngecnim.../ CNA





Lajmet e fundit nga