"Nuk zgjidh problemet ekonomike dhe nuk rrit sigurinë"/ Opozita në Islandë kundër anëtarësimit në BE

25 Qershor 2026, 09:48, Kosova & Bota CNA

"Nuk zgjidh problemet ekonomike dhe nuk rrit sigurinë"/ Opozita

Kryetarja e opozitës në Islandë, Gudrun Hafsteinsdottir, është shprehur kundër rifillimit të negociatave për anëtarësimin e vendit në Bashkimin Europian, duke argumentuar se anëtarësimi nuk do të zgjidhte problemet ekonomike të Islandës dhe as nuk do të forconte sigurinë kombëtare.

Në një intervistë për "Reuters", ajo deklaroi se siguria e Islandës mbështetet te NATO dhe te marrëveshja dypalëshe e mbrojtjes me Shtetet e Bashkuara të Amerikës.

“BE-ja nuk e zëvendëson NATO-n dhe anëtarësimi në BE nuk është një mburojë magjike kundër rreziqeve gjeopolitike”, tha Hafsteinsdottir.

Më 29 gusht, qytetarët islandezë do të votojnë në një referendum që nuk ka të bëjë drejtpërdrejt me anëtarësimin në BE, por me rifillimin e negociatave të ndërprera në vitin 2013, kur në pushtet erdhi një qeveri euroskeptike. Çdo marrëveshje e mundshme për anëtarësim do të duhet të miratohet më pas në një referendum të dytë.

Sipas një sondazhi të fundit, 44.5% e islandezëve mbështesin rifillimin e bisedimeve me BE-në, ndërsa 39.4% janë kundër dhe 14.6% mbeten të pavendosur. Megjithatë, shumica e qytetarëve vazhdojnë të kundërshtojnë anëtarësimin e plotë në union.

Nga ana tjetër, ministri i Financave i Islandës, Dadi Mar Kristofersson, argumenton se anëtarësimi në BE do ta ndihmonte vendin të përballej me presionet gjeopolitike dhe me koston e lartë të jetesës.

Hafsteinsdottir kundërshton këtë argument, duke theksuar se problemet ekonomike të Islandës janë strukturore dhe nuk mund të zgjidhen përmes anëtarësimit në BE. Sipas saj, tregu i vogël dhe i izoluar, mungesa e konkurrencës në sektorë si ushqimi dhe strehimi, si dhe inflacioni i lartë dhe normat e interesit pas pandemisë, janë sfidat kryesore të ekonomisë islandeze.

Një tjetër çështje e ndjeshme mbetet peshkimi, një nga shtyllat kryesore të ekonomisë dhe identitetit kombëtar të Islandës. Sektori druhet se përfshirja në Politikën e Përbashkët të Peshkimit të BE-së mund të hapë ujërat islandeze për flotat e huaja.

“Peshkimi është në ADN-në tonë, është pjesë e pavarësisë sonë. Është krejtësisht e papranueshme të ndajmë rezervat tona të peshkut me vende të tjera. Këtë nuk do ta pranojmë kurrë”, deklaroi ajo. /CNA