SPAK FOREVER!

27 Korrik 2023, 13:57, Editorial CNA

SPAK FOREVER!

SPAK-u ka goditur sot një nga grupet më të fuqishme kriminale në vend, thuajse të paprekshëm, me lidhje të forta që shkonin sa te prokuroria, te policia, njerëz, të cilët njihen publikisht si biznesmenë dhe mbështetës të PS-së.

Personat e arrestuar janë pjesë e një grupi kriminal, flitet për vrasje me pagesë, janë kapur në përgjime biseda, janë arrestuar persona jashtë dhe në Shqipëri, që shkojnë në nivelet më të larta.

Një nga ish-drejtorët më të rëndësishëm të Policisë së Shtetit, ish-drejtori i Forcës Operacionale, Oltion Bistri, është arrestuar së bashku me grupin kriminal.

Pra, policia e Shtetit deri para një jave ka pasur në kokën e saj një polic të inkriminuar. Një individ, i cili duket se ka bashkëpunuar me krimin.

Megaoperacioni/ Arrestohet biznesmeni i njohur dhe ish-drejtori i operacionales
27 Korrik, 08:31

Pra, SPAK-u hetonte BKH-në, hetonin edhe Oltion Bistri dhe Operacionalja që duhet të ndërhynin për të bërë arrestimet. Në fakt, ish-drejtori i Operacionales ka qenë bashkëpunëtor i tyre, sipas asaj që thotë vetë SPAK-u.

Nga ana tjetër, biznesmeni Pëllumb Gjoka njihet si një investitor strategjik i denoncuar nga ish-kryeministri Berisha për lidhjet e forta me PS-në.

SPAK FOREVER!

Grupi i Bajrave, një nga grupet më të forta, që shpesh është akuzuar nga Prokuroria, nga media, për vrasje për konflikte në Shkodër e shumë akuza kriminale, lidhet sa në Policinë e Shtetit aq sa tek investitori strategjik. Pëllumb Gjoka, i cili tashmë ka marrë edhe licencën e një hoteli dhe kazinove me 5 yje te pallatet 9-katëshe në qendër të kryeqytetit.

Goditja që ka bërë sot SPAK-u është një nga hapat më të fuqishëm që ka ndërmarrë kjo strukturë në lidhje me luftën ndaj krimit të organizuar, i cili shkon sa në biznesmenë, në politikanë dhe deri në nivelet më të larta të Policisë së Shtetit e deri te Prokurorët.

Goditja ndaj “të fortëve”/ Policia dhe SPAK-u fusin në "rrjetë" Astmer Bilalin e “Bajrave”
27 Korrik, 09:32

Ajo që ka ndodhur sot me SPAK-un është për të thirrur: “SPAK përgjithmonë!” Kështu duhet, kjo është ajo që presim të gjithë, një luftë frontale, të pandalshme, ndaj krimit të organizuar dhe ndaj gjithçkaje që mban peng Shqipërinë, shtetin shqiptar dhe politikën.

ME VAJTJEN E ALTIN DUMANIT NË KRYE TË SPAK, DUKET SE INSTITUCIONI I AKUZËS KA VEPRIME NË PAK MUAJ SA NUK KA PASUR QË KUR KA FILLUAR PUNËN.

ALTIN DUMANI DUHET DUARTROKITUR, ASHTU SIÇ E KEMI KRITIKUAR. VEPRIMET E SPAK, OPERACIONET NDAJ KRIMIT TË ORGANIZUAR TREGOJNË SE PUNA NDAJ E KËTIJ INSTITUCIONI DO TË KETË PËRPARIM.

Në fakt, arrestimi i disa personave në operacionin e sotëm nxjerr zbuluar në përgjime dhjetëra politikanë, gazetarë, njerëz të rëndësishmë të fushës së medias, të cilët kanë lidhje të forta me personat që janë ndaluar, të cilët influencën e tyre e kanë ushtruar jo vetëm te krimi, por te media, politika dhe te biznesi.

Hetimet e SPAK-ut/ Në përgjime edhe gazetarë të njohur
27 Korrik, 13:34

Në rast se telefonatat e përgjuara të biznesmenit dhe të tjerëve janë në një afat kohor që përpara zgjedhjeve, ajo që mund të jetë më e papritura e gjithë hetimit do të jetë rënia e zgjedhjeve në Shkodër, pasi biznesmeni Pëllumb Gjoka njihet si një nga mbështetësit dhe sponsorët kryesorë të PS-së.

Nga ana tjetër, do të dalin detaje për lidhjet e medias me këto personazhe të botës së krimit dhe deri te politika, ku lidhjet shkojnë në nivelet më të larta të zyrtarëve të shtetit shqiptar.

Pra, ky është rasti për të thënë se historia mediatike e Arben Ahmetajt do të duket si historia e një “maceje”, ndërsa “tigrat” e vërtetë do t’i shohim te ky operacion i SPAK-ut.

Hetimet për inceneratorët vazhdojnë nga ana tjeter, por edhe ndaj tyre pritet së shpejti nga SPAK-u të ketë veprime konkrete për zbardhjen e plotë të një afere korruptive, më e madhja e këtyre 30 viteve, prandaj duhet thënë sërish: “SPAK forever!”, sepse me luftën ndaj krimit, me luftën ndaj korrupsionit është institucioni që po u jep shpresë shqiptarëve se më në fund ka një luftë të vërtetë ndaj krimit në Shqipëri./ CNA