web counter
LEXO PA REKLAMA!

SHKARKO APP

App Store
Google Play

E fundit!

x

Skandal në "Fiks Fare"/ Pikat statike të vendosura në pallate shesin ujë industrial si ujë të pijshëm

30 Qershor 2022, 21:11, Denoncim CNA
Skandal në "Fiks Fare"/ Pikat statike të vendosura në
Denoncimi i "Fiks Fare"

"Fiks Fare" denoncoi mbrëmjen e së enjtes një mashtrim që ndodh me qytetarët duke u shitur ujin industrial për ujë të pijshëm. Pikat statike të ujit të vendosura nëpër qytetin e Tiranës, ku çdo qytetar duke futur një xheton, mbush bidonin me uji, të reklamuara si burimi “Krullia” apo “Shën Gjergji” nuk tregtojnë ujë të pijshëm.

Rreth 50 pika të tilla tregtojnë ujë çdo ditë nën mashtrimin se është ujë i pijshëm, ndërkohë tregtojnë ujë industrial, duke rrezikuar kështu jetën e mijëra banorëve.

Institucionet që kanë përgjegjësinë për të kryer kontrollet për të mos lejuar diçka të tillë, jo vetëm që nuk e kanë bërë, por sipas dëshmive që emisioni "Fiks Fare" siguroi kanë marrë para nga abuzuesit.

Aktualisht në kryeqytet shitja e ujit në mënyrë joligjore bëhet në dy mënyra. Nëpërmjet autobotëve dhe pikave statike të vetëshërbimit që i shohim në çdo zonë të Tiranës. Emisioni "Fiks Fare" për të vërtetuar këtë abuzim fillimisht ka xhiruar për ditë me radhë autobotët që mbushin çisternat me ujë në zonën e Dajtit dhe Lanabregasit, madje edhe në linjën kryesore të ujësjellësit Tiranë. Më pas zbresin në qytet dhe e tregtojnë si ujë burimi jo vetëm në autobot, por edhe në pika statike vetëshërbimi, ku reklamohet ujë burimi dhe i mikrofiltruar.

"Fiksi" xhiroi me kamer të fshehtë shoferët që thonë se uji mbushet në burim, ndërkohë "Fiksi" faktoi që uji në autobot është marrë nga tubi i UKT-së. Gazetarët e "Fiksit" dalin në terren bashkë me drejtorin e UKT-së, z. Elton Kacidhja, në Dajt dhe Lanabregas ku "Fiksi" evidentoi ndërhyrjet në rrjetin e ujësjellës-kanalizimeve. Drejtori Kacidhja bashkë me Task Forcën në terren morën përsipër dërgimin para ligjit të personave që e kanë shkelur atë. Ndërkohë që z.Kacidhja inspektonte në një pikë, bashkëpunëtorët e "Fiksit" evidentuan një autobot që mbushej me ujë në ato momente brenda oborrit të një shtëpie. Task Forca shkoi aty dhe vërtetoi se autoboti mbushej në rrjetin e UKT-së. Familjet që shisnin ujë te botet kishin zero konsum në sahatet e tyre dhe ndërkohë lidhjet i kishin bërë në rrjet në mënyrë të paligjshme. Kështu që një person u shoqërua për në komisariat, ndërsa për dy të tjerë u pre urdhër-arresti sipas OPGj-së.

Por përveç autobotëve janë edhe 50 pika statike ku me xhetona që futen në bankomat qytetarët blejnë ujë. Gazetarët e "Fiksit" shkojnë pranë një pike të tillë me Task Forcën pranë UKT-së dhe me një inspektor të Inspektoriatit Shëndetësor Shtetëror, ata pohojnë se nuk është përgjegjësi e tyre tregtimi i ujit në këtë formë.

Inspektori i Inspektoriatit Shëndetësor Shtetëror thotë gjithashtu se asnjë nga këto pika nuk është pajisur me akt higjieno-sanitar. ISHSH thotë se në këto pika tregtohet ujë i patrajtuar. Sipas verifikimeve të kryera në pikat statike uji është industrial dhe jo i pijshëm. Pas këtij momenti gazetarët e "Fiksit" kërkuan një përgjigje në Autoritetin Kombëtar të Ushqimit ku zyrtarisht u tha se nuk i kanë inspektuar këto pika, pasi për ta aty nuk tregtohet uji i pijshëm.

Por jo vetëm kaq, gazetarët kërkuan përgjigje dhe në institucione të tjera, ku Policia Bashkiake Tiranë tha se përgjigjej vetëm për hapësirat publike, e ndërkohë Agjencia e Menaxhimit të Burimeve Ujore, e cila ka pajisur këto subjekte me leje për të shfrytëzuar burim, thotë se përgjigjet për burimin jo për konsumatorin. Leja që kanë marrë subjektet për shfrytëzimin e burimit është me ujë industrial, pra jo të pijshëm. Inspektori i AMBU, Marjus Seiti, shpjegoi për gazetarët se atij i intereson shëndeti i burimit, jo i konsumatorit, pasi nuk është ai institucioni që thotë nëse uji është i pijshëm apo jo.

Por çfarë ka ndodhur që të gjitha institucionet shtetërore dorëzohen para një paligjshmërie?

Për njërin prej administratorëve të pikave statike ka qenë jo e lehtë, pasi sipas tij është dashur që të gjitha këto institucione t’i paguajë dhe ai të vijojë aktivitetin, ndërkohë konsumatori rrezikon jetën çdo ditë./tch





Lajmet e fundit nga