E fundit!

16:41 Aktualitet

Marshim dhe thirrje kundër qeverisë/ Mbahet sot protesta e 45-të në Tiranë

Ditën e sotme mbahet protesta e 45-të qytetare kundër qeve...

Polici dhunoi të moshuarit! Gjyqtarja çon deri në fund misionin, mban anën e tij

22 Qershor 2022, 21:24, Denoncim CNA

Polici dhunoi të moshuarit! Gjyqtarja çon deri në fund

Emisioni "Stop"

Në 26 maj të një viti më parë, Bana Muca, emigrante prej 25 vitesh në Itali, denoncoi në “Stop” dhunën, që kanë pësuar prindërit e saj 69 dhe 72 vjeç nga një bashkëfshatar i tyre, Bukurosh Zagrati, polic në Peshkopi. Konflikti ka nisur për një pjesë betoni, që të moshuarit kishin bërë para portës së tyre. Rexhep dhe Emrije Muça treguan për dhunën nga ana e Bukurosh Zagratit. Duke qenë se ishin në shtëpi vetëm me nusen e djalit dhe fëmijët e vegjël, të moshuarit lajmëruan djalin dhe vajzën në Itali, të cilët u nisën me urgjencë për të asistuar prindërit në fshatin Steravec në Peshkopi.

Të nesërmen u drejtuan për të bërë kallëzim në polici për Bukuroshin. Në ambientet e komisariatit të Peshkopisë, të moshuarit qëndruan 14 orë para se t’u merrej kallëzimi. Në të njëjtën kohë, Bukuroshi montonte çështjen, duke sajuar histori, sikur dy pleqtë mbanin armë në shtëpi. "Stop” komunikoi me Bukurosh Zagratin, i cili mohoi dhunën ndaj dy të moshuarve. Prokurori i çështjes, Rifat Kojku, nuk bëri asgjë për të zbardhur ngjarjen.

Një vit e gjysmë nga konflikti me të moshuarit djali i të moshuarve konfliktohet me Bukuroshin dhe ky i fundit mbeti i plagosur, ndërsa djali përfundoi në burg. I pyetur për këtë pasojë të moszbardhjes së dosjes prokurori Rifat Kojku tha se kjo është Shqipëria që nuk ka për t’u bërë kurrë, ndaj të mos lodhemi kot.

“Ishte shumë arrogante, shumë bullizuese. Jo në konform të etikës së gjyqtarit”, tha avokati Arben Llangozi.

Dy çështjet me Bukuroshin u ndanë dhe gjyqtarja Nertila Kape, e cila haptazi procesin e dhunës ndaj të moshuarve e zvarriti, ndërsa procesin e Ardian Muçës e gjykoi më shpejt. Gjyqtarja nuk ka pranuar bërjen e akt-ekspertimit të ri, pasi aktet e përdorura në proces ishin bazuar në fotografi mbi trupin e fashuar, jo mbi plagë.

Gjyqtarja, Nertila Kape: Ti kërkon kohë për t'u njohur me aktin, atëherë gjykata vlerëson që meqë janë dhe mjekët prezentë, mos të pranojë kërkesën për t’ju vënë në dispozicion. A ka mundësi të ulesh se s’po më lë të mbaroj. Unë po shprehem me një vendim, e bëre kërkesën?! Kërkon kohë për aktin, gjykata vendos të mos e pranojë këtë kërkesë meqë mjekët janë prezentë.

Avokatja: Unë doja të njihesha me aktin, që dhe d.m.th ta studioj dosjen.

Gjyqtarja, Nertila Kape: Po pra, me këtë do të merremi!

Avokatja: Po pra po, po unë s’është se e njoh dosjen.

Gjyqtarja, Nertila Kape: E do me vete në shtëpi? Tani për aktin u shpreh gjykata dhe tani a ka mundësi të mos e diskutosh më. U shpreha me vendim të ndërmjetëm, pra që do ta relatojnë doktorë, ke të drejtën e ankimit të vendimit të ndërmjetëm bashkë me vendimin përfundimtar në Apelin Tiranë.

Bukurosh Zagrati pretendon që plagët kanë qenë vdekjeprurëse. Ai pretendon se ka qenë në gjendje kome si pasojë e një goditjeje me thikë. Por si ka mundësi që Zagrati ka lëvizur me makinë drejt policisë dhe nuk ka qenë në spital?

Megjithatë çuditë e gjyqtares nuk përfundojnë. Për procesin e dhunës së të moshuarve ajo pranon kërkesën e Bukurosh Zagratit për bërjen e një akt-ekspertimi të ri.

“Në bazë të K.P.P, fakti që po paraqet një kërkesë për përjashtimin e trupit gjykues, nuk e pengon trupin gjykues ose pjesëmarrësit e tjerë në gjykimin, që të vazhdojë gjykim, nuk mund të merret vendim deri në momentin që do të gjykohet kërkesa juaj, por gjykimi do të vazhdojë”, u shpreh gjykatësja.

Avokati tha se misioni që kishte marrë gjyqtarja u arrit. Pasi dënoi djalin e të dhunuarve nga polici, dha dorëheqjen nga procesi i parë dhe kjo dorëheqje është pranuar.

Gjyqtarja Nertila Kape: Ashtu siç e relatuam edhe më përpara trupi gjykues është tërhequr në dhomë këshillimi për të shpallur vendimin pavarësisht kësaj kërkese të paraqitur për përjashtim.

Avokatja: N.q.s kërkesa për përjashtim pranohet, si i bie me vendimin?

Gjyqtarja Nertila Kape: Pavarësisht paraqitjes së kërkesës për përjashtim, kemi vendosur që të shpallim, pasi jemi tërhequr dhe jemi kthyer në seancë dhe relatuam, shkakun e shtyrjes deklarimin fajtor të të pandehurit Adrian (Muça) Shaji, për kryerjen e veprës penale vrasje e mbetur në tentativë, dënimin e tij me 11 vite burgim.

“Gjykata ka marrë vendim pa pritur të gjykohej kërkesa për përjashtim sepse mesa duket kishin frikë se do të përjashtohej gjyqtari dhe kishin frikë se nuk do çonin në fund rezultatin e premtuar. U dënua pa u parë procesi i përjashtimit. Vendimi është i pavlefshëm sepse bie ndesh me një sërë nenesh të kodit të procedurës penale”, tha avokati./tvklan.al