web counter
LEXO PA REKLAMA!

SHKARKO APP

App Store
Google Play

E fundit!

x

Denoncimi i "Fiks Fare"/ Si sorollaten të sëmurët me kancer për të bërë rezonancë në spitalet shtetërore

21 Qershor 2022, 22:18, Denoncim CNA
Denoncimi i "Fiks Fare"/ Si sorollaten të sëmurët me
Foto ilustruese

Sorollatjet po bëhen në kulmin e debateve për ndryshimin e ligjit për “spitalet publike”, ku në Kuvend është dërguar një projektligj që parashikon se “qytetarët që duhet të marrin shërbime me shpejtësi duhet të paguajnë”.

Por, të sëmurët me sëmundjen e rëndë kanë filluar të enden sa në njërin spital shtetëror në tjetrin për të bërë vetëm një rezonancë.

Në redaksinë e emisionit investigativ “Fiks Fare” mbërriti një ankesë nga një qytetar nga Kuçova, i cili kishte një shqetësim familjar në lidhje me shërbimet në spitalet shtetërore.

“Bashkëshortja ime ka kryer një ndërhyrje kirurgjikale 7 vite më parë dhe duhet të bëjë kontrolle onkologjike. I rekomanduan që të bënte një Rezonancë Magnetike MRI. Kemi shkuar nga Kuçova në Spitalin Rajonal të Beratit dhe na thanë që s’bëhet në Berat, s’ka rezonancë” , thotë qytetari.

Më tej pohon se mjekët i kanë thënë se këto rezonanca bëhen në Spitalin Rajonal të Elbasanit. Mjekja i referoi në sistem në Spitalin e Elbasanit, i cili është 70 kilometra larg Spitalit të Beratit. Mjekja i ka thënë qytetarit se të gjithë pacientët e qarkut të Beratit, Dimalit, Kuçovës dhe Skraparit referohen në Elbasan.

“Mjekja na tha referimin për në Spitalin e Elbasanit. Shkuam atje. Por, edhe atje na thanë se s’bëhet as këtu, s’kemi bërë ndonjëherë. Por, Elbasani nuk na referoi dot në QSUT, pasi nuk i lejonte sistemi”,  thotë qytetari.

Së bashku me bashkëshorten e sëmurë, ata u kthyen në Berat. Takuan mjeken onkologe, e cila u tha se edhe ajo nuk e bënte dot referimin për në QSUT, pasi nuk i lejonte sistemi.

“Onkologia s’ka faj. Na tha që s’ma lejon sistemi për në Tiranë, por vetëm në Elbasan. Na dha një letër dore për në QSUT”, tregon qytetari, i cili shton se ka shkuar edhe në Tiranë, tek Onkologjia.

Punonjësit i kanë thënë se “s’ke referim, duhet të interesohesh te drejtoria e QSUT”. “Te drejtoria më thanë se fajin e ka sistemi por po ta bëjmë. Ma bënë gjoja me mik, por ma lanë për në fund të muajit gusht. Pasi u sorollata dy muaj, do të pres edhe dy muaj të tjerë për të bërë këtë rezonancë”, thotë qytetari.

Pas kësaj ankese, gazetarët e "Fiks Fare", ndjekin të njëjtat rrugë që ka ndjekur edhe qytetari. Fillimisht, udhëtojmë nga Kuçova për në Berat, e cila është rreth 20 kilometra, e cila zgjat rreth 30 minuta.

Gazetarja e "Fiks Fare" bisedon me punonjësit e Repartit të Onkologjisë në Spitalin Rajonal të Beratit, ku mëson se pacientët e të gjithë qarkut referohen në Elbasan. Më pas, gazetarët marrin rrugën për në Elbasan, e cila është e gjatë rreth 70 kilometra, rrugë e cila përshkohet për rreth 1 orë e 30 minuta.

Sërish interesohemi nëse në këtë spital kryhet apo jo Rezonanca Magnetike MRI.

Punonjësit pohojnë se “nuk kanë bërë asnjëherë Rezonancë Magnetike MRI. U kemi thënë atyre të Beratit që s’bëjmë skanerë MRI, po ata prapë na i sjellin”.

Ashtu si edhe qytetari, gazetarët kthehen mbrapsht dhe shkojnë sërish në Spitalin Rajonal të Beratit, i cili është 70 km larg.

Kësaj here, gazetarja bisedon me mjeken onkologe, e cila thotë se “s'na lejon sistemi që të bëjmë referimin për në Tiranë, por vetëm në Elbasan”.

Tashmë, qytetarët duhet të bëjnë 120 kilometra larg, mbi 2 orë e gjysmë rrugë që të shkojnë në Tiranë. “E kam bërë disa herë lart e poshtë, kemi humbur ditët e punës, shpenzime dhe lodhje pa fund”, thotë qytetari.

Po në Spitalet në Tiranë a bëhet kjo rezonancë?! "Fiksi" interesohet fillimisht te spitali Onkologjik në QSUT. Një punonjës i thotë gazetares se “duhet të lidhesh me një mjek që të të japë rekomandimin”.

Më pas, gazetarja interesohet te Drejtoria e QSUT. “Më kanë ardhur edhe raste të tjera me këtë problem. Nuk ia merrte sistemi. Fajin e ka ministria”, thonë punonjëset.

Të gjithë ia vënë fajin sistemit! Pra, nga Onkologjia e Beratit, reparti i skanerëve dhe rezonancave në Spitalin e Elbasanit apo tek Onkologjia dhe Drejtoria e QSUT-së. Në fund, ata që e paguajnë shtrenjtë janë qytetarët, që pas këtyre sorollatjeve, detyrohen që t’u drejtohen spitaleve private! "Fiksi" i dërgoi një kërkesë për informacion edhe Ministrisë së Shëndetësisë, por deri në transmetimin e këtij investigimi, ministria nuk ktheu përgjigje.

“Mua më ka shkuar më shumë rruga lart e poshtë sesa ta bëja te privati. Por këtu më takon dhe këtu do e bëj. Si rasti i familjes sime janë me qindra raste, të cilët po detyrohen që të paguajnë",  thotë qytetari.

Dhe, të gjitha këto sorollatje në kulmin e debateve për ndryshimin e ligjit “për spitalet publike”, ku në Kuvend është dërguar një projektligj që parashikonte pagesat e qytetarëve në spitalet shtetërore për një shërbim të shpejtë. Por, a ishte “shëndetësia është falas”, e cila ka filluar që tani të bëhet me pagesë?!/ tch





Lajmet e fundit nga