E fundit!

11:47 Aktualitet

Video/ Bllokohet lëvizja në sheshin "Skënderbej", qytetarët të revoltuar, debatojnë me efektivët

Ditën e sotme në sheshin “Skënderbej” është zhvilluar fest...

Denoncim- Skandali me ngritjen e gurores në Tropojë/ Fabrika e asfaltit po ndërtohet pranë shtëpive

29 Qershor 2022, 22:19, Denoncim CNA

Denoncim- Skandali me ngritjen e gurores në Tropojë/ Fabrika e

Foto ilustruese

Ndërtimet e fabrikave pranë zonave të banuara kanë sjellë probleme e shqetësime herë pas here. Në redaksinë e CNA.al ka mbërritur një denoncim. Një banor i Tropojës denoncon se pranë banesave në zonën e Fierzës në Tropojë, po ndërtohet një fabrikë asfalti.

Për qytetarin, ndërtimi i kësaj fabrike është në shkelje të ligjit. I njëjti rast është trajtuar edhe disa muaj më parë në emisionin investigativ "Stop" e me sa duket nuk ka marrë zgjidhje.

Banorët shpreheshin se kjo industri sjell dëm edhe për agroturizmin, që funksionon prej vitesh në këtë zonë.

“Stop”, në investigimin e tij në atë kohë, zbuloi se një tjetër detaj, që shton dyshimet për biznesin e gurores dhe asfaltit në Fierzë, është falsifikimi i adresës së këtij biznesi.

Në letra shkruhet se do të ndërtohet në Luginën e Kolgecajve, kur në terren do të ndërtohet në Luginën e Fierzës.

Por skandali nuk përfundon këtu. Pronari i këtij biznesi është djali i xhaxhait të kryetarit të bashkisë, Rexhë Byberi, dhe drita jeshile e ngritjes së grurores i është dhënë pa votat e plota të Këshillit Bashkiak të Tropojës.

Këshilli Bashkiak ka miratuar ngritjen e biznesit vetëm me 9 vota, të cilat janë të pamjaftueshme për të marrë vendimin.

Deklaratat kontradiktore të nënkryetarit dhe kryetarit të Bashkisë Tropojë shtojnë dyshimet, se ky projekt është i kompromentuar.

Një vit më parë një tjetër kushëri i kryebashkiakut kishte aplikuar për këtë aktivitet, por ai ishte bllokuar nga institucionet.

Pasi u largua grupi i xhirimit i “Stop”, të nesërmen Këshilli Bashkiak Tropojë miratoi me 11 vota ndërtimin e këtij biznesi.

Emisioni “Stop” informoi institucionet përkatëse, të cilat do të japin verdiktin përfundimtar për këtë projekt, Ministrinë e Infrastrukturës, të Mjedisit dhe Agjencinë Kombëtare të Mjedisit.

Pavarësisht denoncimeve të qytetarëve institucionet vijojnë planin e tyre duke mos i dhënë zgjidhje zërit të banorëve të zonës./ A.E-CNA.al