Protesta për Klan Kosovën/ Ish-kreu i AMA-s: Po për mungesën e kanaleve pa pagesë kush ankohet

31 Korrik 2023, 16:52, Aktualitet CNA

Protesta për Klan Kosovën/ Ish-kreu i AMA-s: Po për mungesën

Ish-kreu i AMA-s, Gentian Sala

Këtë të hënë, gazetarët e Kosovës protestuan në përkrahje të televizionit “Klan Kosova” në Prishtinë, pas vendimit të Ministrisë së Industrisë për të pezulluar licencën e televizionit.

Pas kësaj proteste ka ardhur një reagim nga ish-kreu i AMA-s, Gentian Sala.

Me anë të një statusi në rrjetet sociale, ai deklaron se gazetarët ankohen për Klan Kosovën, por askush nuk flet për të drejtën kushtetuese të informimit bazë e pa pagesë të qytetarëve të Kosovës.

Sala deklaron se ndryshe nga Shqipëria që ka 13 kanale shtetërore pa pagesë dhe ka një sërë platformash transmetimi, Kosova ofron vetëm një kanal shtetëror pa pagesë.

“Shumë mirë bëjnë gazetarët në Kosovë që gjejnë kohë e ankohen pse një TV Kombëtar e quan Gjakovën e Pejën, pjesë të Serbisë… po për të drejtën kushtetuese të informimit bazë e pa pagesë të qytetarëve të Kosovës, kush duhet të ankohet? Po bëj vetëm një krahasim me Shqipërinë… që gjithsesi nuk është rasti ideal i së drejtës së informimit. Kanale pa pagesë në Shqipëri janë 35-40, në varësi nga zona. Në Kosovë vetëm 3 kanale, në formatin analog (cilësi e dobët dhe dalë nga përdorimi në gjithë Europën). Në Shqipëri mbulimi me sinjal i mbi 95% të popullsisë dhe mbi 90% i territorit. Në Kosovë, i më pak se 50% i popullsisë, më pak 30% të territorit.

Në Shqipëri mbizotërojnë 3 lloje platformash transmetimi, numerike, me kabëll, OTT dhe me disa aktorë Kombëtarë, Klan, Top Channel, Vizion+, Digitalb, Tring, Abcom (Vodafone), Digicom, Telecom. Në Kosovë vetëm teknologjia kabllore, me aktorë Telekom, Art Motion, IPKO, Tekom Serbia (ky i fundit as Rtk nuk e ka në platform…detyrimi ligjor). Pra thelbi është... a mundet një familje në nevojë të shikojë kanale PA Pagesë në KS. Në Shqipëri këtë të drejtë kushtetuese e gëzojnë rreth 30% e popullsisë (vetëm qeveria shpërndau 80.000 aparate numerike për shtresat në nevojë) dhe mijëra biznese (hoteleri, restorante, bare etj). Operatori publik në Shqipëri, RTSH ofron 13 kanale pa pagesë, RTK ofron 1 kanal pa pagesë”, thekson ish-kreu i AMA-s./ CNA.al