Ministria i vuri kyçin/ Drejtuesit e kolegjit turk: Do të ndjekim rrugën ligjore

23 Shtator 2022, 10:38, Aktualitet CNA

Ministria i vuri kyçin/ Drejtuesit e kolegjit turk: Do të ndjekim

Pas vendimit për mbylljen e shkollave "Turgut Ozal" ka reaguar edhe përfaqësia e këtij institucioni arsimor.

Ata shprehen se ky kolegj është i licencuar që prej vitit 1998, ndërkohë që nga viti 2004 ata zhvillojnë mësim në ambiente moderne.

"Të rishikohet vendimi. Do të ndjekim rrugën ligjore. Inspektimet rutinë janë bërë. Kërkojmë një plan nga ministria. Që në vitin 2004 kemi kryer mësim në ambiente moderne, pasi kopshti ynë është me standarde moderne. Ministria e Arsimit nuk ka respektuar ligjin. Do të mbeten 253 fëmijë pa kopsht. Duhet që të rishikohet vendimi. Nuk ka asnjë miratim nga ligji, kopshti është i licencuar që në vitin 1998", - u shprehën përfaqësuesit e kopshtit.

Pak më herët ishte ministrja e Arsimit, Evis Kushi, e cila shprehu se krahas aludimeve për mbylljen e kësaj shkolle, e vërteta është se shkolla ka shkelur disa dispozita ligjore.

"Nisur nga interesimi dhe spekulimet në lidhje me shkaqet që çuan në heqjen e licencës dhe mbylljen e shkollës jopublike 'Mehmet Akif Ersoy', sqarojmë se ky vendim është rezultat i konstatimit nga Ministria e Arsimit dhe Sportit të një sërë shkeljeve të legjislacionit në fuqi nga zotëruesit e licencës në fjalë.
1. Kanë filluar procesin mësimor 2022-2023 në një vendndodhje dhe mjedise të tjera, të pamiratuara nga MAS, pra pa certifikimin ligjor përkatës të standardeve të godinës.
2. Nuk i kanë plotësuar më tej kriteret ligjore, edhe pse nga ana e MAS është kryer dy herë verifikimi i tyre.
3. Në kushtet e ushtrimit të veprimtarisë jashtë kritereve përkatëse licenca duhet të revokohet.
Ministria e Arsimit dhe Sportit në çdo rast ka përgjegjësinë për garantimin e standardeve, sigurisë dhe mirëqenies së nxënësve. Prandaj, në respekt të ligjit dhe në mbështetje të 160 nxënësve dhe të familjeve të tyre, do të marrë të gjitha masat e nevojshme për të transferuar nxënësit në shkolla që përmbushin kriteret dhe standardet e funksionimit.
Ndërkohë, Ministria e Arsimit dhe Sportit nënvizon se revokimi i licencës në fjalë nuk ka asnjë lidhje me spekulimet e ndryshme rreth shkaqeve të këtij vendimi.
Gjithashtu, Ministria e Arsimit dhe Sportit sqaron të gjithë të interesuarit për këtë çështje, se në këtë fillimviti shkollor nuk janë vënë re raste të tjera shkeljesh të së njëjtës natyrë dhe kriteret e standardet ligjore janë të përmbushura për të gjithë nxënësit e tjerë të shkollave jopublike."- deklaroi më herët ministrja Kushi./CNA.al