Mbrojtja e fëmijëve nga pedofilët/ CRCA/ECPAT kërkon ndryshime ligjore për marrëdhëniet seksuale me të miturit

15 Qershor 2022, 14:46, Aktualitet CNA

Mbrojtja e fëmijëve nga pedofilët/ CRCA/ECPAT kërkon

CRCA/ECPAT Shqipëri, bën publike këtë javë propozimet e saj ligjore në mbrojtje të fëmijëve nga pedofilët dhe grabitqarët seksualë. Ajo kërkon ndryshimin e moshës seksuale në të cilën lejohet fillimi i marrëdhënieve seksuale, në 16 vjeç.

Organizata më e madhe në vend në mbrojtje të të drejtave të fëmijëve, iu drejtua sot me këtë propozim në një seancë dëgjimore Komisionit Parlamentar për Punën, Çështjet Sociale dhe Shëndetësinë.

Kodi Penal i Republikës së Shqipërisë në nenin 100 të tij përcakton moshën 14 vjeç si mosha kufi minimale në të cilën një adoleshent apo adoleshente mund të hyjë në marrëdhënie seksuale. Një ligj ky që mbron në raste pedofilie të rriturit që kryejnë marrëdhënie me të mitur.

Por në Shqipëri, kjo duket se kthehet në një situatë e cila favorizon grabitqarët seksuale dhe pedofilët, të cilët mund të mbështeten nëkëtë ligj për të detyruar apo për të kërkuar marrëdhënie seksuale edhe me fëmijët të moshës 14 vjeç, duke mos u penalizuar aspak nga ligji.

Përveç vendeve të lindjes në Europë, tashmë pothuaj të gjitha vendet e tjera e kanë rritur tashmë moshën minimale kufi të hyrjes në marrëdhënie seksuale në 15 dhe 16 vjeç.

Bazuar në këtë përvojë, CRCA/ECPAT Shqipëri ka nisur punën dhe ka përgatitur propozimet ligjore që do ti drejtohen Kuvendit për të ndryshuar Kodin Penal ekzistues.

Drejtori i CRCA/ECPAT Shqipëri, Altin Hazizaj, nënvizoi se: ”Fëmijët kanë nevojë për më shumë mbrojtje, siguri dhe kujdes në jetën e tyre, përfshi këtu edhe mbrojtje më të mirë nga ngacmimet dhe dhuna seksuale. Legjislacioni shqiptar duhet të jetë në linjë me kërkesat dhe standartet e Konventës së Lanzarote të Këshillit të Europës dhe direktivat e Bashkimit Europian”.

Në vendin tonë, rastet e abuzimit me marrëdhëniet seksuale me të mitur të moshë 14 vjeç e sipër, janë rritur dhe janë kthyer në një ndër problematikat kryesore për opinionin shqiptar. Nga ana tjetër grabitqarët seksualë kërkojnë gjithnjë e më tepër viktima të moshës 14 vjeç e sipër për të anashkaluar problemet me ligjin dhe pa u cilësuar aspak të tillë.