Kapen “mat” katër shqiptarë në Angli/ Bastisen dy shtëpi bari

21 Qershor 2022, 19:22, Aktualitet CNA

Kapen “mat” katër shqiptarë në Angli/ Bastisen dy

Droga e kapur

Dy kushërinj shqiptarë kanë rënë në prangat e policisë britanike, pasi janë kapur me dhjetëra mijëra paund kanabis, teksa po udhëtonin me makinë në autostradën A38, në drejtim të Plymouth.

Bëhet fjalë për kushërinjtë Fatmir Kurmekaj, 34 vjeç, nga High Wycombe dhe Fatjon Kurmekaj, 36 vjeç, nga The Crescent.

Shqiptarëve u janë gjetur grupe çelësash, të cilët ishin të lidhur me një numër pronash në Plymouth, dy prej të cilave ishin konvertuar në “shtëpi bari”.

Si rezultat i informacionit të mbledhur, oficerët nga Ekipi i Policisë Proaktive të Plymouth kryen bastisje në dy prona, në Kingsley Road në Mutley dhe Warleigh Avenue në Keyham.

Në këto prona u gjetën bimë të shumta kanabisi dhe nga një person roje në secilën. Emigranti shqiptar Teslim Muhmutag, i gjetur në pronën e Kingsley Road u burgos për shtatë muaj, ndërsa Adrian Kurmekaj me 30 muaj burgim.

Në Warleigh Avenue u gjetën 109 bimë narkotike që peshojnë mes 4.8 kg dhe 7 kg, që mund të ketë një vlerë nga 3,500 deri në 8,000 Euro për kilogram. Mediat ndërkombëtare shkruajnë se nëse do të shitej në tregun e zi, droga do të kapte vlerën mes 34,000 dhe 50,000 Eurove dhe nëse shitet me gramë mund të kapte vlerën midis 50,000 dhe 70,000 Euro.

Nga hetimet u zbulua se me 3 korrik 2021, Adrian Kurmekaj i dërgoi një mesazh Fatjonit ku diskutohej për të bërë gati "18 kilogramë e gjysmë për të mërkurën", ndërsa ky i fundit i ishte përgjigjur se "po pinte një birrë mate, mora 8 për ty, nesër do të ketë pjesën tjetër. Edhe paratë”.

Nga 1 maji deri në 26 gusht, Teslim Muhmutag ka bërë tri telefonata me Adrian Kurmekajn dhe asnjë me Fatmirin dhe Fatjonin. Megjithatë, Adriani ka bërë 738 ndërveprime me Fatmirin dhe Fatjonin në atë kohë.

Fatmiri ka mohuar të kishte dijeni për “shtëpitë e barit” dhe të kishte përfshirje në krim. Ai pretendoi se po udhëtonte për në Plymouth për të lënë një makinë, por nuk ishte në gjendje të jepte emrin e personit të cilit po ia dorëzonte. Ai gjithashtu fillimisht mohoi se Adrian Kurmekaj ishte kushëriri i tij dhe nuk mund të shpjegonte pse Adrian Kurmekaj kishte foto të tij në celularin e tij.

Policia zbuloi se Fatmiri ka pasur kontakt me Adrianin 320 herë në periudhën maj-gusht 2021 dhe se ai ka qenë në kontakt me Fatjonin mbi 550 herë në të njëjtën periudhë.

Nga autoritetet britanike ka rezultuar se Fatjoni ka dhënë një deklaratë të përgatitur kur u intervistua nga policia, duke mohuar se ishte një tregtar droge.

Nga ana tjetër, Fatmiri u përshkrua si një shqiptar, i cili kishte mbërritur në Britani në vitin 2018 dhe erdhi në Plymouth vetëm shtatë muaj para arrestimit të tij.

Ai tha se prodhimi i kanabisit ishte duke u zhvilluar shumë kohë përpara se të vinte në Plymouth dhe nuk kishte asnjë provë për një mënyrë jetese luksoze apo komunikime që sugjeronin se ai ishte një organizator i operacionit.

Avokati i shqiptarit pranoi se ka pasur komunikim mes Adrianit, Fatmirit dhe Fatjonit, por sipas tij ishin komunikime normale mes familjarëve dhe jo porosi nga operatorët e drogës.

Ata janë shpallur fajtorë për prodhimin e kanabisit të klasit B dhe dënimet e tyre pritej të jepeshin dje nga Gjykata e Plymouth Crown.

Për shkak se në deklaratat e prokurorëve dhe avokatëve mbrojtës kishte një “ndryshim thelbësor”, gjykatësi i çështjes ka thirrur një seancë dëgjimore.

Ai tha se ndërkohë Fatmiri dhe Fatjoni do të qëndrojnë në paraburgim, ndërsa nuk ka caktuar ende një datë për seancën e radhës./ B.A. - CNA.al