LEXO PA REKLAMA!

SHKARKO APP

Hekurudha Durrës-Rrogozhinë, hapet procedura 1.8 mln euro për shërbimet mbështetëse

1 Mars 2024, 07:54, Aktualitet CNA
Hekurudha Durrës-Rrogozhinë, hapet procedura 1.8 mln euro për
Foto ilustruese

Një tjetër projekt për hekurudhat duket se është afër nisjes së zbatimit.

Hekurudha Shqiptare njoftoi këto ditë se është në kërkim të një konsulenti që do të ndjekë zbatimin dhe monitorimin e projektit që lidhet me rehabilitimin e linjës Durrës-Rrogozhinë.

Në faqen Komisionit Evropian, Hekurudha Shqiptare publikoi çeljen e procedurës dhe detajet e nevojshme ku ndër të tjera edhe fondin limit që është 1.8 milionë euro pa TVSH. Afati për zbatimin e projektit sipas të dhënave në faqe llogaritet në 60 muaj.

“Shërbimet Mbështetëse dhe Mbrojtëse për Zbatimin e Projektit, për rehabilitimin e linjës hekurudhore midis Durrësit dhe Rrogozhinës. Shërbime konsulence në ndërtim – Shqipëri Përshkrimi: Punimet përfshijnë rikonstruksionin dhe elektrifikimin e rreth 40 km të linjës hekurudhore me një binar nga Durrësi në Rrogozhinë.

Enti Prokurues kërkon një firmë ose JV/konsorcium të kualifikuar dhe të aftë për të ofruar mbështetjen e zbatimit dhe ruajtjen e shërbimeve të monitorimit, “Shërbimet”, para, gjatë dhe pas ndërtimit. Vlera e parashikuar pa TVSH: 1.8 milionë euro.

Kohëzgjatja: 60 muaj. Afati i fundit për pranimin e ofertave: 20/04/2024 – 10:00:00” thuhet në njoftimin e bërë nga Hekurudha që është autoriteti kontraktor për projektin.

Në dhjetor të vitit të shkuar qeveria shqiptare arriti që të përfitonte një grant 62 milionë euro për ndërtimin e linjës hekurudhore Durrës-Rrogozhinë. Kostoja totale e projektit llogaritet në 120.5 milionë euro. Projekti merr rëndësi të veçantë pasi është pjesë e Korridorit VIII, një nga dhjetë korridoret e transportit Pan-Evropian.

Në dokumentet paraprake të publikuara për projektin nënvizohej se përveç të qenit pjesë e Korridorit VIII, ky segment përbën gjithashtu lidhjen e vetme hekurudhore midis pjesës Perëndimore, Lindore (Qafë Thanës dhe Pogradecit) dhe Jugore të Shqipërisë (qytetet Vlorë dhe Ballsh).

Zona e projektit përfshin tri bashki si Durrësi, Kavaja dhe Rrogozhina dhe për secilën prej tyre tashmë është bërë një vlerësim ndikimi i veçantë.

Vija hekurudhore e projektit ndjek atë ekzistuese dhe pas rehabilitimit parashikohet që trenat të kenë shpejtësi 120 kilometra/orë.

Rigjallërimi i sektorit hekurudhor ka përfshirë një sërë projektesh të tillë si Tiranë-Durrës që është në zbatim dhe pritet të finalizohet këtë vit, projekti Vorë-Hani i Hotit marrëveshja e financimit me BERZH që u nënshkrua këto ditë në Londër si dhe projekti për lidhjen me Kosovën./Monitor

Lajmet e fundit nga