Përse Lulzim Basha nuk i do beqarët?!

10 Shkurt 2021, 10:38, Politikë CNA

Dy ditë më parë, e ftuar në një nga emsionet e pasdites për të folur rreth PR-it të liderve politikë në këtë fushatë elektorale, gazetarja Zefina Hasani, eksperte fushe ndër të tjera dhe autore e një sërë programesh të suksesshme në vend, analizoi dhe strategjinë e komunikimit të liderit të opozitës Basha duke u ndalur në videon më të fundit të postuar në rrjetet sociale nga bashkëshortja e tij, zonja Aurela Basha, ku ai shfaqet duke gatuar në kuzhinën e shtëpisë.

Zonja Hasani nuk tha asgjë më shumë e asgjë më pak nga ajo që kanë shprehur shumica e njerëzve, qofshin këta publike apo individë që kanë reaguar në rrjetet sociale. Ajo me qetësi argumentoi se kjo video apo dhe postime të tjera të tij, kanë krijuar debate per faktin e vetëm se nuk ishin të mirëmenduara në detaje, si për shëmbull, fakti që zoti Basha gatuante me këpucë veshur etj. Pra detaje të vogla të cilat vinin në pikpyetje spontanitetin e veprimit dhe videos.

Menjëherë pas këtyre komenteve, në rrjet apo në portalet pranë opozitës nisën një sërë sulmesh të ulta ndaj gazetarës Hasani. Servilet e Lulit, u turren në rrjet duke ironizuar zonjën Hasani se si një beqare na merrka vesh dhe nga PR-i (se ç?lidhje ka beqaria me këtë, një Zot e merr vesh). Duhet thënë se këta, pra servilet, një ndër arsyet pse ajo parti është në këtë derexhe, e bëjnë gratis këtë punë.

Ndërsa portalet pranë opozitës, duke u munduar të bëjnë shërbimin e tyre, mbase dhe duke vënë ndonjë gjobë të vogël, rikujtuan faktin se zonja Hasani punoka për kompaninë e zotit Theodhori Cami, pronar i EuroNews Albania, duke e lidhur këtë të fundit me Erjon Veliajn. Harruan këtu që në fakt, bashkëshortja e zotit Cami është anëtare e këshillit kombëtar të PD si dhe ish zëdhënëse e kësaj partie. Edhe këto shkrime, vinin theksin te beqaria e zonjës Hasani si një mënyre për të ironizuar dhe minimizuar kritikën e saj.

Që të gjitha këto sulme ishin të koordinuara nga bërthama dixhitale e PD, kjo sdo shumë për tu kuptuar. Mjafton të shihje lumin e komenteve të dala nga call centeri që paguhet nga kunati i Lulzimit.

Sigurisht sulmi mbi beqarinë e gazetares Hasani bën habi, pasi mjafton të kujtosh faktin që një nga bashkëpunëtorët e afërta të Lulzim Bashës, drejtoresha e tij e zyres së shtypit, ish gazetarja Elona Meço është beqare. Edhe sekretari i përgjithshëm, nr 2 i partise zoti Gazment Bardhi është beqar. Atëherë lind pyetja: Çfarë ka Basha me beqarët? Pse i sulmon ai ato? Nuk i do ai votat e beqarëve në vend? Beqarët qenkan një kategori problematike në PD?

Ne si CNA i sugjerojmë zotit Basha të mos sulmojë asnjë kategori, pasi për të përmbysur regjimin e Edi Ramës opozitës i duhet çdo votë, edhe ato të beqarëve në vend!/CNA.al