E fundit!

13:19 Aktualitet

Braho “shuplakë” politikës: Më vjen mirë që SPAK është i papëlqyer nga të dyja kahet

Kreu i SPAK, Klodjan Braho i ka dhënë një shuplakë politik...

Pesë vjet nga Dekriminalizimi/ Politika ende flirton me të inkriminuarit për vota

9 Shkurt 2021, 20:19, Politikë CNA

Pesë vjet nga miratimi në parlament, ligji i Dekriminalizmit, pavarësisht rezultateve, ende nuk ka mbyllur historinë e kandidatëve me të shkuar kriminale në politikë shqiptare. Prej 10 ditësh, ambasadorja amerikane Yuri Kim ka bërë thirrje për pastërtinë e kandidatëve pjesëmarrës në zgjedhje. Përmes një statusi në Twitter ajo ka kërkuar që Tom Doshi të mos kandidojë në zgjedhjet e 25 prillit. Kim ka ripublikuar deklaratën e Departamentit Amerikan të Shtetit, i cili vendosi në ?listën e zezë? deputetin e Partisë Social-Demokrate.

Në listën e Departamentit të Shtetit Amerikan për personat që u ndalohet hyrja në SHBA, krahas Doshit gjendet dhe emri i ish-kryetarit të Bashkisë së Durrësit, Vangjush Dako dhe ish-prokurorit të përgjithshëm Adriatik Llalla.

Në mars të 2015 deputeti Tom Doshi u arrestua me akuzën e kallëzimit të rremë, lidhur me akuzat e tij se ndaj tij ka pasur një përpjekje për atentat ku përfshihet edhe kryetari i atëhershëm i Kuvendit Ilir Meta. Gjatë 2017 prokuroria kërkoi nga KQZ heqjen e mandatit të tij për shkak të një dënimi të marrë përpara vitit 1990, por KQZ e refuzoi kërkesën.

Thirrjes së ambasadores i është përgjigjur vetëm kryeministri, duke thënë se partitë nuk kanë mekanizma verifikimi përveç ligjit dhe se nuk mund të kthehen në dhoma torturash për të zbuluar të shkuarën e kandidatëve të tyre.

Si rezultati i zbatimit të këtij ligjit kanë dhënë dorëheqjen tre deputetë, ju hoq mandati 4 të tjerëve, u larguan mbi 150 zyrtarëve të lartë e të mesëm në nivelet e qeverisjes, tre kryetarë bashkie, më shumë se 200 këshilltarë lokalë dhe rreth 500 zyrtarë të nivelit të mesëm e të lartë.

I pari që dha dorëheqjen nga mandati parlamentar ishte deputeti i PS, Arben Ndoka. Ai akuzohej se ishte dënuar në Itali në fillim të viteve ?90 me akuzën e favorizimit të prostitucionit. Në nëntor 2015 dha dorëheqje dhe dorëzoi mandatin edhe deputeti Mark Frroku.

Ai akuzohej për një vrasje të fillimit të viteve ?90 në Belgjikë. Të njëjtin fat pati dhe deputeti Armando Prenga, i përfshirë në një skandal të dhunshëm në vitin 2015, me pasojë plagosjen e dy personave.

Me kërkesë të Prokurorisë KQZ u hoqi mandatin parlamentar deputetëve Shkëlqim Selami (LSI) dhe Dashamir Tahiri (PDIU), për arsye që lidhen me dekriminalizimin.

KQZ mori nga Prokuroria kërkesën për heqjen e mandatit edhe për deputetët Aqif Rakipi (PDIU) dhe Gledion Rehovica (LSI), për shkak të deklarimeve të rreme dhe papajtueshmërinë me kriteret e ligjit të dekriminalizimit. Dy deputetët e humbën mandatin me vendim të KQZ.

Në radhët e drejtimit të Bashkive, Elvis Roshi, Agim Kajmaku dhe Valdrin Pjetri do të ishin gjithashtu pre e ligjit të dekriminalizimit./CNA.al