U kthye nga emigrimi dhe hapi bujtinë në Voskopojë/ Panajot Falo: Vendimi i duhur

5 Mars 2025, 19:55, Qyteti im CNA

U kthye nga emigrimi dhe hapi bujtinë në Voskopojë/ Panajot Falo:

Panajot Falo tregon rrugëtimin e tij nga emigracioni në hapjen e bujtinës “George” në Voskopojë. Bujtinë, të cilën e ka hapur në shtëpinë e prindërve të tij.

Panajoti thotë se pas 30 vitesh emigracion në Zakinthos të Greqisë ai dhe bashkëshortja e tij vendosën të ktheheshin në vendlindje dhe të hapnin biznesin e tyre.

Ai shprehet se në 4-5 vitet e fundit Voskopoja ka pësuar një ndryshim shumë të madh dhe vendimin e tij për t’u kthyer, Panajoti e quan të duhurin.

“Ditën e parë që kam ikur nga Voskopoja thashë këmba ime nuk shkel më. U gabova. Vendi yt, shtëpia jote është shumë e shtrenjtë. Në vitet 1990-’91, Voskopoja ishte në një gjendje të vështirë. Si gjithë të tjerët ne morëm rrugën e emigracionit, bashkë me gruan vendosëm të ikim në emigracion. Shkuam në një ishull të bukur të Greqisë, në Zakinthos. Atje filluam punuam. Koha ishte shumë e gjatë, 30 vjet, atje lindën dhe fëmijët, u rritën, studiuan. Puna ishte shumë e vështirë, ne ishim të rinj dhe punonim ditë e natë. Punoja në ndërtim, bëja vila guri në ishull. Gruaja punonte në një restorant ndihmëskuzhiniere. U rritën fëmijët, u rritëm dhe ne dhe një ditë vendosëm të ktheheshim në Voskopojë. Shikoja Voskopojën që filloi të ecte përpara. Gjithmonë mendoja që një ditë do kthehem dhe thamë që të hap në vendin tim dhe e bëmë. Me shumë sakrifica po ia arritëm qëllimit.

Jam shumë i kënaqur, në radhë të parë se jam në shtëpinë time, nuk më drejton njeri. Kur je në një moshë të re të pëlqen emigracioni, të pëlqen të dalësh, të punosh, të bësh ca më shumë lekë se sa në vendin tënd. I duron të gjitha, edhe të të shajnë. I duron dhe kur nuk i ecën puna mirë tjetrit. Kur kalon mosha duhet të kesh punën tënde që të punosh me ndershmëri, të mos i ulësh kokën tjetrit. Unë e di ç’është emigracioni. Mundohen shkojnë në Gjermani, punojnë punë të vështira, paguajnë qiranë, kur vjen puna nuk u mbeten aq sa në Shqipëri. Katër-pesë vitet e fundit një ndryshim shumë i madh në Voskopojë. Vendimi im ishte i duhur në një vend të duhur. Kam investuar në shtëpinë time, çdo gjë që prek, që shikoj më kujton prindërit, fëmijërinë. S’ka më mirë se vendi yt”, u shpreh pronari i bujtinës “George”.

Eksperiencën e Panajot Falos e ka bërë publike në rrjetet sociale kryeministri Edi Rama si dhe kreu i grupit parlamentar të PS, Niko Peleshi/ CNA