E fundit!

12:07 Opinione Ardi Stefa

Ndryshimi mund të presë edhe pak...

Paraqitja e fytyrave të reja në politikë është gjithmonë l...

"Himne hiri" nga Ana Bushgjokaj/ Zoga: Recital ndryshe, plot mesazhe dhe zë kumbues

19 Janar 2025, 11:08, Qyteti im CNA

"Himne hiri" nga Ana Bushgjokaj/ Zoga: Recital ndryshe, plot mesazhe

"Himne hiri" titullohet albumi i parë i Ana Bushgjokës. E cilësuar nga kritika si pjesë e zërave më të mirë rinorë, Ana, i parapriu albumit me recitalin që mblodhi në teatrin "Migjeni" miq dhe të afërm të saj.

"Himne hiri" përmbledh këngë të vjetra të krishtera, si dhe himne të mëvonshme që Ana i ka shqipëruar. Jo vetëm zë, por edhe mjeshtëri në piano e sollën Anën afër publikut.

"Një mbrëmje shumë e veçantë. Sërish kam emocione, ndonjëherë emocionet rrinë. Një publik shumë i mirë, duartrokitje fantastike për të cilat jam shumë falënderuese. Këto këngë kishin mesazh për paqen, për dashurinë dhe për mirësinë e cila kalon përtej çdo gjëje. Është e vështirë, por kur përkushtohesh në rrugën e duhur besoj çdo gjë është e arritshme," u shpreh këngëtarja Ana Bushgjokaj.

Por sa e lidhur është Ana me besimin, të cilit vendosi t'i kushtojë një album?

"Jam shumë e lidhur, mendoj që është gjëja më e rëndësishme në jetën time. Edhe këtë gjë dona të transmetoja tek albumi, që pavarësisht 'background'-it të personave që po e ndjekin, ta pëlqejnë, ta kuptojnë e të thonë po e dëgjoj e pëlqej këtë këngë. Gjithmonë kam bërë muzikë prej shpirtit e prej zemrës, por nuk u them jo mundësive të ndryshme, ama deri më tani nuk jam pa arsye me ba muzikë komerciale. Mua më pëlqen me ba muzikë, ndaj shpresoj të bëj muzikë edhe këtë vit e derisa të kem jetë."

Për udhëheqësin artistik, mjeshtrin Ilir Zoga, ky recital ishte shumë ndryshe i sjellë me pasion e plot finesë.

“Një recital krejt ndryshe. Unë kam qenë prezent edhe në punën në studio me Anën për këtë aktivitet dhe është për t’u përgëzuar shumë iniciativa e saj, idetë e mrekullueshme dhe pse jo edhe krijimet e saj. Me të vërtetë një koncert shumë elegant, i sjellë me shumë finesë dhe me një mjeshtëri nga Ana që zotëron një talent edhe në vokal, por edhe në aspektin më të gjerë edhe në krijimtari dhe pse jo edhe në orkestrimet e materialeve. Është e vërtetë që futet tek arti serioz dhe natyrshëm që ka nevojë për artin serioz. Biles ka nevojë shumë për edukimin e brezit të ri që të mësohen dhe të kultivohen me një muzikë serioze, një muzikë mbi baza shumë të shëndosha artistike. Them se është i domosdoshëm”.

Përmes këtij recitali Ana kishte qëllim të depërtonte në zemrat e artdashësve me zë, muzikë të mirë dhe mesazh besimi e force për të gjithë./CNA