E fundit!

12:08 Aktualitet

Protestat/ Rama: Askush nuk mund ta ndalë rrugën e Shqipërisë drejt BE-së

Kryeministri Edi Rama në një intervistë të dhënë për gazet...

"80 vjet arsim në gjuhën amtare maqedonase në Shqipëri"/ Dimitrievski nga Korça: Moment i rëndësishëm

19 Dhjetor 2024, 16:23, Qyteti im CNA

Zëvendës ministri i jashtëm i RMV-së, Dimitrievski

Paraditen e sotme u zhvillua Konferenca Shkencore e quajtur "80 vjet arsim në gjuhën amtare maqedonase në Shqipëri". Kjo konferencë u mbajt në ambjentet e universitetit Fan Noli në Korçë, ku pjesëmarrës ishin drejtues të këtij institucioni, pedagogë, ndërsa i është bashkuar edhe zëvendës ministri i jashtëm i Maqedonisë së Veriut, Zoran Dimitrievski.

Në një deklaratë për mediat, Dimitrievski është shprehur se ky 80 vjetor është një moment i rëndësishëm sa i përket ruajtjes së kulturës e gjuhës, si edhe marrëdhëniet e mira fqinje. Sipas tij, njohja dhe mbështetja e të drejtave të pakicave, forcon lidhjet mes dy vendeve dhe nxit bashkëpunimin rajonal.

"Ky është një moment i rëndësishëm që thekson rëndësinë e ruajtjes së kulturës dhe gjuhës, si dhe marrëdhëniet e mira fqinjësore. Festimi i 80 viteve të mësimdhënies së gjuhës maqedonase në Shqipëri është një dëshmi e lidhjeve kulturore të qëndrueshme dhe respektit të ndërsjellë midis dy vendeve. Njohja dhe mbështetja e të drejtave të pakicave, si mundësia për të mësuar dhe ruajtur gjuhën amtare, forcon lidhjet midis vendeve dhe nxit bashkëpunimin rajonal."

Zëvendës ministri i jashtëm i RMV-së, ka komentuar lidhur me përdorimin zyrtar të gjuhës shqipe në Maqedoninë e Veriut, duke e lidhur me marrëdhëniet ndëretnikendhe përqindjen e konsiderueshme të shqiptarëve në shtetin maqedonas.

"Në Maqedoninë e Veriut, çështja e përdorimit zyrtar të gjuhës shqipe lidhet me marrëdhëniet ndëretnike dhe të drejtat e pakicave. Shqiptarët përbëjnë një përqindje të konsiderueshme të popullsisë, dhe përdorimi i gjuhës shqipe si gjuhë zyrtare është një element i rëndësishëm për të garantuar sigurinë dhe barazinë e tyre. Këto klauzola, që përmendni, janë krijuar për të rregulluar përdorimin e gjuhës shqipe në kontekste specifike, si në uniformat e policisë dhe ushtrisë, në kartëmonedha, ose në raste të caktuara në gjykata."

Ndër të tjera, Dimitrievski thekson se nuk pritet që gjykata kushtetuese të miratojë vendime që cënojnë përdorimin zyrtar të shqipes, pasi kjo do të ndikonte në harmoninë shoqërore në vend. Ai thotë se duhet një ekuilibër për ruajtjen e bashkëjetesës në vend, ku shqiptarët në Maqedoninë e Veriut të ndihen të sigurt.

"Megjithatë, nuk pritet që Gjykata Kushtetuese të miratojë vendime që cënojnë përdorimin zyrtar të gjuhës shqipe, pasi një veprim i tillë do të dëmtonte marrëdhëniet ndëretnike dhe harmoninë shoqërore në vend. Është e rëndësishme që shqiptarët në Maqedoninë e Veriut të ndihen të sigurt dhe të respektohen për të drejtat e tyre gjuhësore. Në të njëjtën kohë, është po aq e rëndësishme që të gjithë qytetarët të vlerësojnë dhe respektojnë gjuhën maqedonase si gjuhë shtetërore dhe zyrtare. Një ekuilibër i tillë është themelor për ruajtjen e stabilitetit dhe bashkëjetesës në vend.

Sa i takon marrëveshjeve mendoj se të gjitha marrëveshjet që ekzistojnë në Maqedoninë e Veriut, si Marrëveshja e Ohrit ndërmjet maqedonasve dhe shqiptarëve, si dhe marrëveshjet e tjera me Republikën e Greqisë dhe Republikën e Bullgarisë, duhet të vlerësohen nga të gjitha palët, në fakt, nga të gjithë pjesëmarrësit."

Kjo konferencë shkencore u zhvillua në Korccë me bashkëpunimin e institucioneve homologe, mes vendit tonë dhe Maqedonisë së Veriut, duke nxjerrë në pah marrëdhëniet e mira mes dy vendeve si edhe bashkëjetesën në harmoni të tyre./CNA