Memorandum për mbrojtjen e natyrës/ Pjesë e marrëveshjes, edhe Prespa e Devolli

7 Dhjetor 2024, 14:51, Qyteti im CNA

Memorandum për mbrojtjen e natyrës/ Pjesë e marrëveshjes,

Dy bashki të juglindjes, përkatësisht Prespa dhe Devolli, së bashku me një bashki të Greqisë dhe të Maqedonisë së Veriut kanë nënshkruar Memorandumin e Mirëkuptimit dhe Bashkëpunimit, si bashkitë mes të cilave ndahet baseni i liqeneve të Prespës.

Qëllimi i këtij memorandumi është rritja e nivelit të mbrojtjes të kësaj pasurie natyrore. Pavarësisht ekzistencës së marrëveshjeve ndërqeveritare, prej vitesh liqenet dhe mjedisi përreth tyre janë dëmtuar nga faktorë të ndryshëm, ndërsa tani 4 kryebashkiakët kanë marrë angazhimin për të hedhur hapa konkretë drejt përmirësimit të situatës, të cilat konsistojnë në unifikimin e sezonit të peshkimit, uljen e ndotjes dhe ruajtjen e trashëgimisë.

Kryebashkiaku i Pustecit, Pali Kolefski tregoi për CNA Tv se kjo marrëveshje i cakton kësaj bashkie dy projekte, më konkretisht në kanalizimet e ujërave të zeza dhe ujin e pijshëm në të gjitha fshatrat e kësaj bashkie.

"Pjesa kryesore që përfshin kjo marrëveshje është ruajtja e gjithë natyrës dhe liqeneve të Prespës. Kryesorja ishte kjo, bashkë me ruajtjen e trashëgimisë kulturore dhe materiale të kufirit mes Maqedonisë së Veriut, Shqipërisë dhe Greqisë. Mendoj se interesi kryesor që përfitojmë ne, me këtë marrëveshje bashkëpunimi, jemi shpallur fitues në dy projekte. Në njërin, Bashkia Pustec do të ketë menaxhimin e gjithë projektit, ndërsa në të dytin do implementohet nga drejtoria e ujësjellës kanalizimeve, shpresojmë që të jemi të suksesshëm edhe këtu", tha Kolefski.

Memorandum për mbrojtjen e natyrës/ Pjesë e marrëveshjes,

Kryebashkiaku i Pustecit, Pali Kolefski

Ai deklaroi se të treja shtetet i bashkon liqeni i Prespës, ndërsa ky memorandum do të ndihmojë në sinkronizimin e ruajtjes së liqenit nga ndotja por edhe zhvillimin e peshkimit.

"Aspektet janë të shumta, përmendim peshkimin në liqenin e Prespës nga të treja shtetet dhe kjo do ndihmojë në sinkronizimin për ruajtjen e liqenit nga ndotja por edhe peshkimin në vetvete. Për shembull, ndalimi i peshkimit në Maqedoni të jetë nga 1 Maji deri në fund Maji, dhe e njëjta gjë të jetë në të gjitha bashkitë."

Pjesa shqiptare është më e pastra sa i përket nivelit të ndotjeve për shkak se nuk ka ndotje nga pesticide apo nga materiale industriale. Sipas Kolefskit, Bashkia është përqëndruar në kanalizimet e ujërave të zeza në të gjitha fshatrat, pasi mund të konsiderohen si ndotje potenciale për liqenin.

"Angazhimi më i madh është ulja e ndotjeve, pjesa shqiptare është më e pastra sepse ne si bashki nuk kemi ndotje të tipit bujqësor, pesticide ose nga industria. Këtu jemi përqëndruar në kanalizimet e ujërave të zeza, përjashto fshatrat Pustec e Zaroshkë që është projekti, ne kemi aplikuar edhe për kanalizimet e zeza për të gjitha fshatrat e tjera. Mund të them që vetëm kjo është ndotje potenciale për liqenin e Prespës. Është liqen me ujë të pijshëm që duhet ta ruajmë të gjithë e të jemi të përgjegjshëm", theksoi ai.

Të gjitha bashkitë synojnë që përmes projekteve të përbashkëta të arrijnë një zhvillim të qëndrueshëm në rajonin e Liqeneve të Prespës, i cili është një pasuri natyrore dhe kulturore e veçantë./ CNA