web counter
LEXO PA REKLAMA!

SHKARKO APP

App Store
Google Play

E fundit!

x

Një jetë kushtuar pikturës/ Mësuesi pogradecar rrëfen pasionin e tij

26 Nëntor 2024, 08:11, Qyteti im CNA

Islam Bakollari, i njohur ndryshe si "Lame", prej një jete i është përkushtuar pikturës e jo vetëm. Ai ushtron profesionin e mësuesit për një periudhë prej gati 3 dekadash. Momentalisht është mësues në fshatin Grunjas të Pogradecit, por çdo ditë që kthehet në shtëpinë e tij, ai futet në studio e nis të hedhë në telajo perceptimet e tij që mund të ketë hasur gjatë ditës.

Lamja është piktor i njohur në Pogradec, ndërsa CNA TV e ka zgjedhur për ta sjellë si një personazh të veçantë për shikuesit, pasi mban vlera të mëdha që duhet të njihen e të përçohen edhe te brezat e tjerë.

Piktura është arti i ndjenjës së shpirtit, prej nga ku buron edhe talenti që në fëmijëri.

I tillë ka qenë ky talent i shfaqur nga Lamja që në moshën 5-vjeçare, një pasion i lindur që fatmirësisht u pa nga mësuesit e tij në shkollë, e sot ka dhënë frytet e tij me ekspozitat e mrekullueshmë që Lamja ka realizuar.

Një jetë kushtuar pikturës/ Mësuesi pogradecar rrëfen

Me shumë kënaqësi, Islam Bakollari na ka pritur pranë studios së tij në Pogradec, atje ku kalon pasditen pasi kthehet nga shkolla ku jep mësim. Një studio e ngrohtë, mes punimeve të tij, aq e bukur në stilin që ka zgjedhur piktori ta arredojë, ndërsa nuk mungon as një kat më sipër ku pret vizitorë dhe ka krijuar një ekspozitë me shumë punë të mrekullueshme ndër vite.

Lamja këtë pasion duket se e ka trashëguar nga babai i tij, i cili ka qenë një ndërtues e lexues shumë i mirë, e për të është një dhunti që e ka pasur prej fëmijërisë.

"E kam nisur që në moshën 5-6-vjeçare, është pasion i lindur si të gjitha pasionet e tjera, jo vetëm arti, por edhe fotografia e të tjera. Fëmija në moshë minore i ka të gjitha dhuntitë, duhet dikush nga jashtë, një katalizator për t'i dhënë një shtysë nëse ka prirje në pikturë, muzikë dhe artet e tjera. Unë këtë e pata nga im atë, i cili nuk ka qenë piktor, por ka qenë një ndërtues, lexues shumë i mirë. Besoj se një lloj pasioni të fshehur e kam nga im atë."

Shumë fëmijë në moshë të vogël duhet patjetër të kenë mbështetjen e familjes apo të dikujt jashtë saj, në rast se kanë një dhunti dhe vetë s'mund ta konceptojnë dot në moshë minore. Për Lamen, ka qenë fat i madh që dy nga mësuesit e tij kanë arritur ta zbulojnë talentin për pikturën.

Një jetë kushtuar pikturës/ Mësuesi pogradecar rrëfen

"E zbuluan mësuesit. Kisha fatin e madh që dy mësuesit e mi i kam patur piktorë në klasë të gjashtë dhe klasë të tetë. Fjalën e kam për Kudret Durollarin, piktor në Pogradec, dhe Luan Topçiun, skulptor i cili sot është në Rumani."

Kujtim shumë i bukur për Lamen është koha kur sapo kishte nisur të vizatonte, ku edhe detyrat e shtëpisë i bënte me vizatime dhe kishte mijëra prej tyre që i kishte mbledhur deri në kohën kur duhet të vazhdonte studimet në shkollë të mesme. Ajo çka kishte ndodhur kur kthehet në shtëpi ishte e çuditshme.

"Së pari do t'ju tregoj një motiv shumë të bukur, unë detyrat e shtëpisë i bëja me vizatim që në fillore. Kur ika në shkollë të mesme lashë mijëra vizatime në shtëpi, e kur kthehem ishin të gjitha të djegura sepse ime më ndizte zjarrin dhe nuk u kushtonte rëndësi atyre çka bëja unë. Prej atyre vizatimeve, me kanë mbetur vetëm 2 fletë nga klasa e gjashtë."

Islam Bakollari është piktor i portretit, ndonëse në fillime ka punuar edhe skulpturën në baltë e në gur, ai sërish nuk ndahet nga piktura. Kur e pyesim nëse është e vështirë të pikturosh, Lamja thotë se kjo është pyetje shumë e vështirë ndërsa thekson se piktura të fut në një dimension tjetër, ku flet ndjenja dhe ngjyra.

"Te portreti, te kompozimi. Para pikturës në fakt kam pasur skulpturën, po të shikoni këtu janë disa punime të miat të bëra në gur. E kam nisur me baltën, më pas ka qenë vizatimi.

Kjo është pyetja më e vështirë që më bën. Në qoftë se nuk ndien, nuk pikturon dot. S'kam përgjigje tjetër. Piktura të bën të hysh në një dimension tjetër, kur pikturoj unë humbas, jam jashtëtokësor sepse flet ndjenja. Flet ngjyra, ngjyra është ndjenjë."

Ndër të tjera, Lamja veçon faktin se shumë emocione ndodhen brenda një vizatimi, të cilin e konsideron naiv, ashtu si fëmija që fillon e hedh në fletë atë që ka brenda vetes.

Një jetë kushtuar pikturës/ Mësuesi pogradecar rrëfen

"Më dhimbsen sot ato lloj pikturash që isha amator në fillimet e mia, prapë kam një vizatim shumë të rregullt. Atje janë emocionet, ai vizatim më duket naiv. Zakonisht arti modern nuk kthehet, mbetet naiviteti, ajo që kanë fëmijët në mendje për të vizatuar."

Ajo çka bie menjëherë në sy në momentin që futesh në studion e Islam Bakollarit është pikërisht portreti i babait të tij, i vendosur në qoshe, por që zë vendin më të veçantë nga të gjitha pikturat e realizuara. Lamja e tregon këtë histori për të gjithë shikuesit e CNA TV, me shumë emocion ndonëse babai i tij sot nuk jeton më, por mbetet gjithmonë i gjallë atje në atë portret të realizuar mjeshtërisht.

"Ka një histori mjaft të bukur. Nga viti 2002, 2005 u lidha me një galeri private. Çoja një seri pikturash, 20% e mbante galeria, kjo pikturë është shitur 250$. Pas një jave kthehet sërish. Babai më pyeti 'O djalë, më shite?', kjo më bëri që t'i kthej lekët atij që e bleu. Pas 6 muajsh, im atë vdiq dhe këtë ia kam vendosur te varri. Kjo pikturë hyn te punët e mia më të realizuara."

Islam Bakollari mund të jetë mbase ndër të paktët piktorë që kanë arritur të realizojnë disa ekspozita në Pogradec e qytete të tjera. Lamja tregon se shumë pak mund ta dinë që ai ka organizuar plot 8 ekspozita personale, në Pogradec, Korçë dhe Elbasan, duke treguar edhe bashkëpunimin e mirë mes piktorëve të tjerë kombëtarë e më gjerë.

"Jam një ndër piktorët më të kompletuar, janë 8 ekspozita personale, pak e dinë këtë. Ekspozitën e parë e kam bërë në Elbasan, me piktorët elbasanllinj në Galerinë e Arteve në Elbasan. Nuk kishte kënaqësi më të madhe që unë, një amator, të marr pjesë me profesionistët. Ekspozita e dytë është në Pogradec e më pas në Korçë, në 1989 në konferencën e talenteve të reja. Në kohën kur u arratis Kadareja unë kam qenë në Korçë, pjesë e talenteve të reja nga të rinjtë. Ekspozita ime e fundit është një ekspozitë grafike ilustrative e romanit 'Pesha e Kohës', i një autori pogradecar, Istref Haxhillari. Kjo ishte ekspozita e fundit në Pogradec. Jam ingranuar edhe me piktorë të tjerë kombëtarë e ndërkombëtarë."

Islam Bakollari, piktori pogradecar me origjinë nga zona e Mokrës, nuk e ka ndalur pasionin e tij për pikturën, duke u bërë edhe një nga artistët që ka realizuar disa piktura murale në qytet dhe në shkollën e fshatit ku ai punon momentalisht. Një tjetër dhunti kjo e piktorit, i cili po përgatitet të realizojë edhe ekspozitën e tij të radhës. Arti e piktura mbeten gjallë për sa kohë që vendi ynë ka artistë me zemër të madhe si Islam Bakollari, i cili sot është një ndër artistët që bëjnë krenarë të gjithë Pogradecin./ CNA





Lajmet e fundit nga