E fundit!

12:08 Aktualitet

Protestat/ Rama: Askush nuk mund ta ndalë rrugën e Shqipërisë drejt BE-së

Kryeministri Edi Rama në një intervistë të dhënë për gazet...

"Krahina Autonome e Korçës"/ Ceremoni në 108 vjetorin e shpalljes

10 Dhjetor 2024, 19:54, Qyteti im CNA

"Krahina Autonome e Korçës"/ Ceremoni në 108 vjetorin

Në 108-vjetorin e shpalljes së Korçës "Krahinë Autonome", Këshilli i Qarkut organizoi një sërë aktivitetesh kushtuar ngjarjes më të rëndësishme që shënoi historinë e vendit.

Në 10 dhjetor të vitit 1916 u themelua Republika Autonome Shqiptare e Korçës, pas rënies së qytetit nën kontrollin e francezëve gjatë Luftës së Parë Botërore që zgjati deri në vitin 1920.

Në këtë ditë të shënuar u zhvillua ceremonia solemne pranë bustit të Themistokli Gërmenjit ku u nderua figura e tij patriotike nga drejtues të institucioneve të Korçës, partive politike, drejtues të bashkive të qarkut dhe familjarë të dëshmorëve.

Kryetari i Këshillit të Qarkut, Erjon Nexhipi, tregon se në këtë ditë janë planifikuar një sërë aktivitetesh, ku përfshihen konferencat historike për këtë ngjarje, ekspozitat, festivali folklorik e më tej.

"Krahina Autonome e Korçës"/ Ceremoni në 108 vjetorin

"Shpallja e Krahinës Autonome të Korçës ishte një nga ngjarjet që shënoi historinë e vendit. Këtë vit kemi parashikuar një sërë aktivitetesh, ku përfshihen konferenca historike për këtë ngjarje, ceremoninë solemne te busti i Themistokli Gërmenjit, me ekspozitën e koleksionistëve të kësaj periudhe. Më pas do të vijojmë me aktivitetet me grupet folklorike të Rajonit, për ta finalizuar me Festivalin Rajonal Folklorik, të cilin synojmë ta kthejmë në traditë të përvitshme."

Për koleksionistin Mirgen Shamblli, ekspozita e sotme është një nga ekspozitat ku shumë dokumente e materiale po publikohen për herë të parë. Ai tregon se tematika është e gjerë, duke nisur me krijimin e çetave patriotike, shpalljen e Krahinës Autonome, e deri tek ushtria franceze, kartëmonedhat e pullat e postës. Koleksionisti korçar do të veçonte Varrin Monumental të Themistokli Gërmenjit, të cilit i është dedikuar si piedestal nga qyteti i Korçës.

"Krahina Autonome e Korçës"/ Ceremoni në 108 vjetorin

"Thuajse të gjitha dokumentet dhe fotografitë e sjella në këtë ekspozitë publikohen për herë të parë. Materialet fillojnë nga krijimi i çetave patriotike, vazhdon me shpalljen e Krahinës Autonome. Tematika zgjerohet me ushtrinë franceze, shqiptare, kartëmonedha, pulla të postës, të taksave. Mund të themi që Krahina Autonome e Korçës funksiononte si një shtet i vogël gjatë periudhës së Luftës së Parë Botërore. Nga ekspozita, materialet e së cilës i kam mbledhur gjatë 20 viteve, do të veçoja varrin monumental të Themistokli Gërmenjit, dedikuar nga qyteti i Korçës."

Për Ardi Karanxhën, koordinatorin e COD, ekspozita përmban dokumente që i përkasin një periudhe katërvjeçare që nis prej vitit 1916 e deri në 1920 ku përfshin edhe përfundimin e Luftës së Parë. Ndër të tjera, në këtë ekspozitë janë shfaqur edhe artefakte personale të Themistokli Gërmenjit dhe bashkautorëve të tjerë të kësaj Republike.

"Krahina Autonome e Korçës"/ Ceremoni në 108 vjetorin

"Dokumentet i përkasin një periudhe 4-vjeçare që nga themelimi i krahinës autonome të Korçës, deri në vitin 1920 që korrespondon me dy vite pas përfundimit të Luftës së Parë. Përmban dokumente shkrimore, fotografike ose artefakte të tjera të ndryshme si harta që tregojnë disa lloje dimensionesh të themelimit, fotografi ushtarake, rregullore të sjelljes, e deri tek artefakte personale të Themistokli Gërmenjit dhe bashkautorëve të kësaj Republike."

Në 108-vjetorin e shpalljes së Korçës krahinë autonome, pas ceremonisë solemne të nderimit të Themistokli Gërmenjit dhe ekspozitës së koleksionistëve, u zhvillua edhe parada e grupeve folklorike të juglindjes, të cilët shfaqën traditën me veshjet popullore të zonave përkatëse. Ekspozita u mbajt pranë ambienteve të Shtëpisë së Flamurit, ndërsa pasditen e sotme do të ketë edhe një festival rajonal folklorik, i cili do të kthehet në një traditë në Korçë./ CNA