E fundit!

11:05 Aktualitet

Aeroporti i Vlorës/ Pacolli: Vendimi i Gjykatës së Lartë tregon horrorin që është bërë mbi mua, u kërcënuam me jetë

Pas zbardhjes së vendimit të Gjykatës së Lartë për çështje...

Karnavalet e Pojanit/ Tradita e trashëguar nga të rinjtë ndër breza

7 Janar 2025, 13:56, Qyteti im CNA

Karnavalet e Pojanit/ Tradita e trashëguar nga të rinjtë

"Riti i Rrugeçërve" është tradita shumëvjeçare që mbahet gjallë vit pas viti në Pojan të Maliqit. Karnavalet e Pojanit të përfaqësuara nga ky rit zhvillohet çdo 7 Janar në këtë zonë, si një rit pagan mijëravjeçar, një ditë pas kremtimit të Ujit të Bekuar. Banorë të zonës janë mbledhur në qendrën e fshatit, të shumtë në numër, duke pritur "rrugeçërit" të cilët shkuan në çdo banesë ku sipas traditës thuhet se largojnë të keqen.

Të veçanta ngelen kostumet e frikshme që janë ruajtur brez pas brezi dhe me fanatizëm nga banorët, por ka patur edhe të rinj që kanë përgatitur kostume të tyre. Këto festime në mënyrë simbolike largojnë të keqen, frikën dhe ironizojnë aktualitetin ku jetojmë.

Disa nga personazhet e këtij riti janë plaku me plakën, nusja me dhëndrrin, ariu e shumë të tjerë që përcjellin mesazhe të ndryshme. Vetë këto personazhe kanë treguar të veçantat e personazheve që kanë sjellë në këtë rit, duke thënë se ky rit largon të keqen dhe sjell mbarësi.

"Unë jam plaku. Është udhëheqësi i të gjithëve, hap rrugën i pari. Kam edhe plakën që më ndihmon nga mbrapa. Është doktori që në momentin që sëmuret plaku me plakën i ndihmon. Largon të keqen dhe sjellin mbarësi."

"Është festë pagane e trashëguar brez pas brezi dhe ne mundohemi që të vazhdojmë traditën. Unë jam plaka, kemi ariun, Markon, doktorin. Roli i plakës është të ruaj plakun mos ma marrin."

"Ju urojmë gëzuar dhe një vit i mbarë. Ne rikthehemi vit pas viti si personazhe. Nuk është e vështirë ti bësh këto personazhe. U mblodhëm dhe më pas shkuam shtëpi më shtëpi."

Për organizatorin e kësaj feste, Xhafer Gjyshllari, nuk kanë munguar falenderimet për të rinjtë që kanë veshur kostumet e ruajtura brez pas brezi ndërsa ka thënë se vitin e ardhshëm do të jetë një organizim më i madh ku do të përfshijnë edhe fëmijë të vegjël.

"Kjo festë ka shumë vite para, e mbaj mend që në 1952 që jam lindur kjo festë është bërë dhe Pojani e ka ruajtur për bukuri të zotit dhe tani ne po e shtrijmë akoma më shumë. Ti japim prioritet më shumë kësaj feste që të mbajmë gjallë traditat e vjetra të fshatit tonë. Personazhet do ti falenderoj sepse nuk lodhen, sivjet është mirë se s'po bie as shi as borë, por kanë kaluar shqetësime edhe në borë e shi dhe kështu qofshin të bashkuar. Kanë mundësi akoma më shumë që vitin që vjen ju do ta shikoni me të tjera veshje. Duke organizuar dhe grupe të tjera për të qenë 4-5 grupe, ku edhe të vegjëlit e të mëdhenjtë të japin më shumë gjallëri."

Fshati Pojan i Bashkisë Maliq e trashëgon këtë festë prej qindra vitesh. Organizohet një ditë pas ujit të bekuar dhe siç e do zakoni, shoqërohet me veshje tradicionale si dhe me valle e këngë duke sjellë kështu një atmosferë festive në rrugët e fshatit./ CNA