Invalidët në Korçë përballen me vonesa/ Shpërblimi i premtuar nga qeveria nuk shpërndahet

31 Dhjetor 2024, 15:47, Qyteti im CNA

Shpërblimi i akorduar nga qeveria për invalidët dhe shoqëruesit e tyre prej 150 mijë lekësh të vjetër, nuk është mundur të shpërndahet në qytetin e Korccës, ccka ka sjellë pakënaqësi tek personat që kanë këtë status.

Këta të fundit prej ditës së djeshme kanë shkuar pranë Postës Shqiptare për të marrë bonusin, por ky institucion i ka drejtuar drejt bashkisë së qytetit duke u thënë se nuk u janë dërguar listat e përfituesve.

E njëjta situatë është krijuar edhe sot pranë të dyja institucioneve, ku invalidët kanë pritur në rradhë për të marrë bonusin e premtuar por sërish nuk kanë mundur ta përfitojnë.

"Kemi vajtur që dje atje në posta për të marrë bonusin dhe na thanë do i japim në orën 2. Pastaj na thanë do ti japim nesër në orën 8 në mëngjes. Tani na thonë s'na kanë ardhur listat. Shumë të zhgënjyer ndihemi. Shkoni në bashki na thonë, bashkia thotë i kemi dërguar."

Në këtë ditë ku pritet të ketë festë në çdo familje të Korçës e më gjerë, duket se tavolina e mbrëmjes së fundvitit nuk do të jetë ashtu siç ishte menduar në fillim.

Njëra prej grave invalide tregon se ndihet mjaft e zhgënjyer për këtë sorrollatje që po u bëhet dy ditët e fundit, ndërsa shprehet e keqardhur që sdo të mund të festojë këtë darkë.

"Erdhëm dje, do ti merrni për një orë na thanë. Pritëm e nuk na dhanë. Erdhëm përsëri sot, na thanë për gjysëm ore do i hedhim. Po rrinim atje (në posta) e u detyruam të vinim këtu (në bashkia). Ne s'kemi. Ne ato lek presim. Si do ta festojmë? Këmbët tona do hamë. Jemi shumë të zhgënjyer. Shpërblimet i ka caktuar qeveria, jepe. Na thonë do ti merrni, kemi fëmijë invalidë në shtëpi, i kemi lënë atje ndërsa presim."

Njëri nga përfaqësuesit e grupit të invalidëve, pas komunikimit me kryetarin e bashkisë, ka lajmëruar se problemi i kësaj situate qëndron në drejtorinë e thesarit ku është hedhur i gjithë fondi, por mund të tërhiqen vetëm pas 24 orësh.

"Kryetari i bashkisë më sqaroi se këta i kanë hedhur si para në drejtorinë e thesarit por këta të fundit, nga sistemi që është shumë i zgjatur pas 24 orëve, s'ka mundësi ti japin sot paratë. Mbetet ti marrim pas Vitit të Ri."

Në këtë ditë feste, invalidët duket se nuk do të mund të festojnë si gjithë të tjerët, duke pritur që ditën e nesërme të mund të marrin bonusin e vendosur nga qeveria për ta./CNA