Lehtësimi i lëvizjes në doganën e Qafë-Thanës/ Takim mes zyrtarëve vendorë të Pogradecit dhe Strugës

19 Qershor 2026, 15:04, Qyteti im CNA

Ditën e sotme është mbajtur një takim mes zyrtarëve vendore të Pogradecit dhe Strugës, me pjesëmarrjen e zëvendësministrit të brendshëm të Maqedonisë së Veriut lidhur me hapat që po ndiqen për lehtësimin e lëvizjes në pikën e kalimit kufitar të Qafë Thanës.

Prej disa vitesh, në këtë doganë radhët e mjeteve sidomos gjatë sezonit turistik bëhen kilometrike ndërsa marrëveshja e firmosur tanimë nga ana e palës maqedonase që pret një VKM nga ana e palës shqiptare, synon që të shkurtojë kohën e pritjes përmes vetëm një kontrolli në hyrje dhe dalje.

“Para disa ditësh në parlamentin e Maqedonisë së Veriut kaloi marrëveshja, para se të kalojë implementi po flasim çfarë duhet të bëhet për lëvizjen e njerëzve dhe mallrave. Dëgjuam idetë e ndryshme jo vetëm për qarkullimin tokësor por e lëvizjen në ujërat e Ohrit. Do nisim planet e tjera për zbatimin”, tha zëvendësministri i Brendshëm i Maqedonisë së Veriut, Astrit Iseni.

Prefektja e Korçës, Florinda Zegullaj tha se është kryer një inspektim me ministrin e Punëve të Brendshme të RMV-së.

“Kemi patur një inspektim, ministrin e punëve të brendshme, janë njohur me problematikat me këtë pikë kufitare dhe jane shprehur se kjo marrëveshje do ratifikohet e nga Shqipëria, pra hyrje hyrje, me një sistem. Mos ketë vonesa në këtë doganë”, tha prefektja e qarkut Korçë, Florinda Zegullaj.

Përpos lëvizjes në kohë të përshpejtuar nëpërmjet Qafë Thanës, kryetarët e bashkive Strugë dhe Pogradec thane se janë drejt fundit diskutimet dhe procedurat për lëvizjen nëpërmjet liqenit të Ohrit të njerëzve dhe mallrave.

Kryebashkiaku i Pogradecit, Ilir Xhakolli tha se liqeni nuk i ndan dy shtetet, por i bashkon që të përdorin të gjitha resurset.

“Kemi bërë përpjekje maksimale që kjo të funksionoje sepse është një ëndërr e qytetarëve tanë, nga të dyja krahët, ky liqen nuk është një liqen që na ndan por që na bashkon që të përdorim të gjithë resusret tona për zhvillimin e turizmit dhe ekonomisë së tyre”, u shpreh kryetari i Bashkisë së Pogradecit, Ilir Xhakolli.

“Ne mendojmë se duhet të realizohet pasi përveç pjesës që jemi afër por dukemi larg, të bëhet e mundur lëvizja e turistëve që jep vlerë të shtuar turizmit mes linjës ujore por e asaj tokësore. Ndaj jemi këtu, shpresojme që të bëhet e mundur të shpejtohet ky proces”, tha kryetari i Bashkisë Strugë, Mendi Qyra.

Vetëm gjatë sezonit turistik në pikën e kalimit kufitar të Qafë Thanës hyjnë e dalin rreth 1 milion njerëz, pra një marrëveshje e tillë synon që kjo lëvizje të jetë më e lehtë gjatë sezonit turistik duke funksionuar më një sistem të përbashkët njëjtë si me Kosovën.