web counter
LEXO PA REKLAMA!

SHKARKO APP

App Store
Google Play

E fundit!

x

Historike në Lin/ Bashkëpunimi zvicerano-shqiptar zbulon vendbanimin më të vjetër në Europë

27 Qershor 2025, 15:15, Qyteti im CNA

Historike në Lin/ Bashkëpunimi zvicerano-shqiptar zbulon vendbanimin

Në fshatin piktoresk të Linit, buzë liqenit të Ohrit, vijon bashkëpunimi ndërkombëtar mes ekspertëve zviceranë dhe arkeologëve shqiptarë, në një projekt kërkimesh arkeologjike që po sjell zbulesa mbresëlënëse për historinë e hershme të këtij vendbanimi.

Ambasadorja e Zvicrës në Shqipëri, znj. Ruth Huber, ishte sot në Lin ku vlerësoi punën disa vjeçare të ekspertëve të Universitetit të Bernit në bashkëpunim me arkeologët shqiptarë.

 

"Për ne si ambasadë e Zvicrës në Shqipëri është shumë i rëndësishëm bashkëpunimi i ekspertëve të arkeologjisë nga universiteti i Bernit me arkeologë të Shqipërisë, me një bashkëpunim që po zhvillohet tashmë prej disa vitesh. Kanë bërë shumë zbulime të rëndësishme për historinë e vjetër të këtij liqeni të vjetër të Ohrit në Pogradec. Për ne është shumë mirë që shohim këtë lloj bashkëpunimi mes ekspertëve, me trajnime të përbashkëta dhe shkëmbim njohurish, që tregon se ka një potencial të madh turizmi. Unë jam shumë e lumtur që jam këtu në Lin”, tha Huber.

 

Ambasadorja Huber theksoi se projekti është një iniciativë e Universitetit të Bernit dhe jo e financuar drejtpërdrejt nga ambasada, ndërsa kujtoi se Zvicra vijon të jetë një nga mbështetësit më të mëdhenj të zhvillimit në Shqipëri.

 

"Pikë së pari dua të them se aktiviteti këtu nuk është financuar nga ambasada e Zvicrës, por është përfshirë universiteti i Bern. Ambasada zvicerane në Shqipëri ka një përfshirje të madhe me programe në fusha të ndryshme me Shqipërinë. Jemi ende financues të fuqishëm për Shqipërinë, nuk ka një reduktim specifik për agrikulturën. Një nga projektet më të mëdha që kemi mbështetur për 12 vite po përmbyllet tani, është një përfundim i planifikuar i projektit 12-vjeçar për punësimin e të rinjve, turizmin, agrikulturën. Siç e shihni, projekti ynë ka qenë shumë i gjerë edhe në kohë, në mbështetjen e procesit të zhvillimit edhe institucional për kohë të gjatë", u shpreh ambasadorja.

 

Ambasadorja ka komentuar edhe integrimin e Shqipërisë në BE, duke rikujtuar mbështetjen e Zvicrës për rrugëtimin e shtetit shqiptar drejt Europës.

 

"Zvicra nuk është anëtare e BE-së, por shohim që integrimi i Shqipërisë në Europë është një prioritet i qartë i qeverisë shqiptare. Me programin tonë për zhvillim ne mbështesim integrimin në BE. Shpresojmë që në fusha të ndryshme që ne mbështesim për zhvillimin e mëtejshëm, kontribuojmë që Shqipëria të arrijë standardet e kërkuara dhe ato që duhen për integrimin në BE. Duam të forcojmë institucionet e ndryshme të shtetit shqiptar dhe shohim një progres shumë të shpejtë", deklaroi ambasadorja Huber.

 

Nga ana tjetër, drejtuesi i projektit, arkeologu Adrian Anastasi, bëri të ditur se gërmimet janë ende në fazë aktive, me fokus sondazhe në tokë dhe nën ujë.

 

"Nuk ka përfunduar faza e parë, e cila mbaron në 15 korrik, por jemi në mes të punës. Jemi shumë të kënaqur për atë që po bëjmë. Strategjia e ndërhyrjes këtë vit ka qenë me një sondazh në tokë dhe dy sondazhe nën ujë. Kemi në përfundim sondazhin e nënujit të parë, ndërkohë që jemi në përfundim edhe të sondazhin nëntokë. Kemi gjetur material të bollshëm arkeologjik, qoftë në nivelin e qeramikës, qoftë të veglave të punës, të kockave, të gurit. Janë marrë analizat për të kryer studime më të thelluara në nivel kampionesh dhe jemi shumë të kënaqur se në nivel planimetrie, me këto ndërhyrje që kemi pas shpinës sime, ne arrijmë të lidhim të gjithë këto planimetri dhe jemi pak a shumë në fazën kur tani, nëpërmjet metodologjive të avancuara siç është dentrokronologjia, të fillojmë të krijojmë idetë e strukturave të banimit. Kjo është edhe pjesa më e rëndësishme e këtij gërmimi të këtij viti", tha arkeologu.

 

Zbulimi më i fundit është një gardh i madh mbrojtës prej druri, nën ujë, është dëshmi e një periudhe të dytë banimi që shtrihet në një hark kohor nga 8000 deri në 4000 vjet më parë.

 

"Ndërkohë që sa u përket kërkimeve nën ujë, kemi identifikuar një gardh të madh druri mbrojtës, i cili është një tregues i një faze tjetër brenda kronologjisë të 2000 viteve, nga 8000-4000 vite para. Jemi të kënaqur me rezultatet që kemi marrë gjatë këtyre gërmimeve", tregoi arkeologu Anastasi.

 

Profesor Albert Hafner nga Universiteti i Bernit, i cili viziton Linin për herë të katërt, konfirmon rëndësinë e jashtëzakonshme të kësaj zone.

 

"Është hera e 4-t për mua në Lin dhe jam shumë i lumtur që jam këtu. Është një vend i bukur, peizazh i bukur dhe fshati i Linit është jashtëzakonisht i ruajtur. Gërmimet kanë mundësuar përsëri rezultate shumë të mira, mund të konfirmojmë se ky është vendbanimi më i vjetër në Europë me materiale druri dhe organike të konservuara dhe është shumë special sepse gjetjet janë shumë premtuese dhe ne e dimë që për 2000 vite njerëzit kanë jetuar këtu mes vitit 6000-4000 para lindjes së krishtit, parashikoj dhjetëra fshatra ose më shumë", tha Hafner.

 

Zbulimet arkeologjike në Lin po shkruajnë një faqe të re të historisë së lashtë në Ballkan, duke vendosur Shqipërinë në hartën ndërkombëtare të kërkimeve shkencore dhe trashëgimisë kulturore./ CNA





Lajmet e fundit nga