web counter
LEXO PA REKLAMA!

SHKARKO APP

App Store
Google Play

E fundit!

x

Festa e Lakrorit në Polenë/ Nga duart e amvisave, në zemrën e fshatit

20 Korrik 2025, 10:12, Qyteti im CNA



Në zemër të fshatit Polenë, në një atmosferë festive dhe plot aromë të lakrorit në saç, rikthehet një nga traditat më të dashura të juglindjes shqiptare. "Festa e Lakrorit", tashmë e kthyer në traditë prej më shumë se një dekade, mbledh çdo vit gra, burra, të rinj dhe turistë për të kremtuar bashkë një nga gatimet më përfaqësuese të zonës. Festa e Lakrorit nuk është një ngjarje thjesht festive. Është një kujtim i gjallë i një jete të dikurshme, ku çdo pjatë përgatitej në shtëpi, me dorë, me durim dhe me përkushtim. Këtu, gratë e fshatit janë ruajtëset e kësaj trashëgimie të rrallë.

Festa e Lakrorit në Polenë/ Nga duart e amvisave, në zemrën

"Unë kam pesë vite që marr pjesë në këtë festë. I bëjmë lakrorët me qepë e domate, me gjizë, me lëmpjeta, me kos. Kam nisur që 12 vjeç, e mësova nga mamaja, do ndihmoja në shtëpi, e kisha edhe me qejf. Të dielave konsumohej lakrori kur ishim në koperativë se ai ishte kushti, kurse tani të shtunën mund të them. Ka që porositin nga telefoni dhe gratë e fshatit ua bëjnë. Vijnë porositin edhe turistë."

 

Kjo nuk është thjesht një traditë që ruhet nga të moshuarit. Në Polenë, brezat e rinj rriten me lakrorin si pjesë e identitetit të tyre kulturor. Gatuar me dashuri në gjirin e familjes, ai mbetet lidhja më e fortë mes së kaluarës dhe të ardhmes.

Festa e Lakrorit në Polenë/ Nga duart e amvisave, në zemrën

"Jam studente në universitetin e Korçës. Traditën e kemi ruajtur në familjet tona këtu në Polenë. Që kur ishim të vogla, mua dhe motrën time na ka mbajtur mamaja afër dhe e kemi parë se si gatuante lakrorin. Shpresojmë që këtë traditë ta ruajmë dhe në familjet tona në të ardhmen."

Festa e Lakrorit në Polenë/ Nga duart e amvisave, në zemrën

Në këtë festë, nuk janë vetëm gratë që gatuajnë. Burrat përgatisin zjarrin, saçin, dhe kujdesen për pjekjen, që lakrori të dalë siç duhet, i pjekur ngadalë nga të gjitha anët.

Festa e Lakrorit në Polenë/ Nga duart e amvisave, në zemrën

 

"Në Polenë është traditë e hershme festa e lakrorit. Ka mbi 10 vite. Në Polenë çdo familje e ka traditë lakrorin, si për nder. Roli i burrave është të bëjnë gati saçin dhe për pjekje. Duhet ti rrish mbi kokë që të mos digjet, e të bëhet një nga të gjitha anët."

Festa e Lakrorit në Polenë/ Nga duart e amvisave, në zemrën

Lakrori nuk është thjesht një ushqim. Në çdo petë të holluar, në çdo saç që ngrohet, fshihet kujtesa e një populli që di të ruajë rrënjët dhe të jetojë me shije.

 

"Lakrori më i kërkuar është me gjizë me vezë edhe ai me qepë e domate. Të gjitha shkojnë por këto të dyja i preferojnë më shumë. Vijnë nga rrethi i Pogradecit dhe ai i Korçës, sot kanë ardhur edhe nga Prishtina."

 

"Unë jam mbesë nga Polena, kam mamanë nga këtu. I uroj polenakëve ta gëzojnë ditën e sotme, të kenë gjithmonë gëzime dhe festa. Lakrorin e mësova ta bëj që kur isha e vogël, di edhe ta pjek se kemi patur saç në shtëpi."

 

Në Polenë, çdo petë e holluar me dorë është një rrëfim. Çdo saç i nxehur mbi zjarr është një kujtim. Dhe çdo lakror që ndahet me të tjerët, është një premtim që kjo traditë nuk do të shuhet. Sepse në Polenë, lakrori nuk është thjesht ushqim por trashëgimi. Një festë që nuk mbaron me fundin e ditës, por vazhdon të jetojë në çdo shtëpi, në çdo brez, në çdo kujtim./CNA

 

 

 





Lajmet e fundit nga