Emocione, muzikë dhe ëndrra/ Festa e maturantëve në Devoll

5 Korrik 2025, 10:43, Qyteti im CNA

120 maturantë të shkollave të mesme të Bashkisë Devoll kanë festuar natën e tyre të paharrueshme, në përmbyllje të një kapitulli të rëndësishëm dhe nisjes së një etape të re në jetë.

Pedonalja e qytetit të Bilishtit u kthye në një skenë të vërtetë festive, ku muzika, emocionet dhe urimet ishin kryefjala e mbrëmjes.

Bashkia Devoll organizoi gjithçka me kujdes të veçantë për të krijuar një atmosferë sa më të bukur për të rinjtë.

Një numër i madh qytetarësh morën pjesë për të uruar maturantët, ndërsa performancat e artistëve Klajdi Haruni dhe Bruno ndezën atmosferën edhe më tej, duke bërë që festa të zgjasë deri në orët e vona të mbrëmjes.

Në një mesazh për të rinjtë, kryetari i Bashkisë Devoll, Eduard Duro, uroi maturantët për rrugëtimin e deritanishëm dhe për sukses në kapitullin e ri që i pret.

"Sot është dita ku pjesa e maturantëve të Maturës 2025 fillon udhëtimin e tyre të ri. Unë i'u uroj të gjithë maturantëve, jo vetëm atyre të Bilishtit por të gjithë bashkisë Devoll, suksese në rrugën e tyre të gjatë dhe të bukur. Çdo arritje e tyre do të jetë e mrekullueshme sepse janë e ardhmja e këtij vendi."

Vetë maturantët nuk e fshehën emocionin dhe gëzimin për këtë ditë simbolike, duke u shprehur krenarë që arritën ta përmbyllnin me sukses këtë kapitull të jetës së tyre.

"Sot jam shumë e emocionuar për faktin se gjimnazi mbaroi dhe po fillon një jetë e re për ne. Jam shumë e lumtur që jam këtu sot dhe po festoj me gjithë shokët e mi. Ende nuk e kam vendosur, por besoj se do të zgjedh degën që kam dëshirë dhe do t'ia dal."

"Sot nuk e di si ta shpjegoj, por është një ndjenjë që s'kam për ta përjetuar asnjëherë në jetën time. Rrugëtimi ka qenë shumë i vështirë, por me mbështetje të shokëve, mësuesve dhe familjes kam arritur t'ia dal deri këtu ku jam sot. Akoma nuk e di çfarë dege do të zgjedh, por do bëj kujdes shumë të madh kur ta zgjedh atë sepse kjo do më diktojë gjithë jetën time dhe çfarë do të ndjek."

"I emocionuar, por më shumë i gëzuar që arritëm në këtë pikë. Në disa faza ka qenë e vështirë, sidomos në fillimet e vitit të parë, pjesa e emocioneve, stresi, por ia arritëm. Degën që do të zgjedh e kam vendosur, por qëllimi kryesor për të ardhmen është t'ia dal e të kujtohem përpara se të iki. Fatkeqësisht do të më duhet të largohem, s'do të mund të jetoj në Shqipëri. Nuk është se ka shumë shanse për mua të vazhdoj një jetesë, le të themi jo ekselente, por të mirë."

Me emocione të sinqerta, ëndrra që sapo nisin dhe premtime për të ardhmen, festa e maturantëve në Devoll u shndërrua në një kujtim të paharrueshëm për secilin prej tyre. Një natë që nuk shënoi vetëm fundin e gjimnazit, por edhe fillimin e një kapitulli të ri, me shpresën se secili do të ecë përpara me guxim, dije dhe pasion./ CNA