E fundit!

18:24 Aktualitet

Nis protesta e gjashtë në Tiranë kundër qeverisë

Mbahet ditën e sotme protesta e radhës kundër qeverisë në ...

“Kalaja e Sapës”/ Restoranti që rikthen gatimin tradicional të zonës

2 Korrik 2025, 15:38, Qyteti im CNA

“Kalaja e Sapës”/ Restoranti që rikthen gatimin

Thuajse tri dekada më parë, Roza Hila nga fshati Nënshatë i Vaut të Dejës, la zonën ku u rrit për t'u zhvendosur në Lezhë, si qytet me më shumë mundësi për rritjen e fëmijëve. Por lidhjet me vendin e saj nuk i shkëputi asnjëherë. Përpara dy vitesh vendosi të rikthehej për të çelur restorantin e saj. Vendosi ta quante “Kalaja e Sapës”, në nder edhe të emrit të zonës së Sapës.

“Kalaja e Sapës”/ Restoranti që rikthen gatimin

“Unë jam nga Nënshati, jam lindur dhe rritur këtu dhe po ashtu jam e martuar në Nënshatë. Në rrugëtimin tonë të jetës, si shkak i kushteve të vështira këtu, 25 vite më parë, ne ikëm në Lezhë për të jetuar duke menduar për fëmijët. Atje punuam dhe jetuam dhe këtu në Nënshatë kishim tokën tonë, tokën e të parëve, tokën e burrit. Normalisht që lindi ideja duke parë që agroturizmi po merr një zhvillim të madh dhe duke pasur tokën dhe këtë hapësirë të bukur bashkë me prodhimet, ne menduam që ta hapnim duke pasur në mendje të ardhmen për djalin tonë”,-tregon Lula Hila, pronare e restorantit "Kalaja e Sapës".

“Kalaja e Sapës”/ Restoranti që rikthen gatimin

Lula tregon edhe për vështirësitë e para.

“Ka dy vite që e kam hapur, me pak vështirësi sepse ishin kushte të vështira. Idenë e kishim shumë më përpara, por ishte e pamundur asokohe. Edhe pse jam në fillim, idetë i kam të qarta, edhe pse mundësitë janë që nuk na lejojnë fiks të zhvillohemi si duam ne, por duke shpresuar dhe me ide të mira të mund të arrij në pikën që dua.

Kalaja e Sapës, është emri i fshatit tim të dikurshëm, flasim para 960 vitesh. Vite më vonë më pas fshati është zhvendosur më poshtë. Në fakt Kalaja e Sapës thuhet se ka qenë një qytet dhe për shkak të luftrave, pastaj njerëzit kanë lëvizur duke mbërritur këtu ku jemi sot. Është ndryshuar edhe si emër i fshatit, por agroturizmi ynë nga ajo histori e ka marrë emrin që i kemi vendosur”,-tha Lula.

Fillimi mbetet i vështirë, por kjo nuk është arsye që Lula të tërhiqet. Tashmë krahas krijimit të klientelës, te "Kalaja e Sapës" vijnë turistë nga vende të ndryshme të botës, duke pëlqyer jo vetëm zonën e bukur të Nënshatit, por edhe gatimet tradicionale që servir Lula.

“Vitin e parë e kam pasur të them të drejtën shumë më të vështirë, por tani çdo ditë e më mirë. Normalisht që ka ndryshime, jo të forta, por ka ndryshim dhe kanë filluar që të vijnë turistë. Vijnë nga Gjermania, Italia, por ata kërkojnë edhe vend fjetjeje, por unë për momentin ende nuk e kam marrë atë hap, edhe pse jam drejt asaj dhe besoj se do ta zgjidhim.

Më shumë funksionon me porosi, por ka edhe të rastësishëm sepse kemi vendosur një poster në rrugë dhe kthejnë te ne. Mendoj se deri tani kanë mbetur të kënaqur sepse kuzhinën e njoh shumë mirë. Të gjitha janë bio duke filluar nga mishi i viçit, mishi i derrit, pulat i mbaj vetë sepse kam bërë një fermë të konsiderueshme pulash. Pastaj edhe prodhimet e tjera duke nisur nga djathi dhe të gjitha me radhë janë të zonës, të gjitha i bëjmë vetë.

Ajo që pëlqehet më shumë është mishi i derrit i pjekur në skarë, por edhe mishi i viçit dhe pulat bio janë të preferuara. Gatimet bëhen me dru sepse këtu jam mes druve. Mishin e pjekim më shumë, pastaj ushqimet e tjera janë të përgjithshme, por të zonës. Të them të drejtën, rruga është gjëja më e vështirë dhe unë jam marrë vetë me sistemin e saj aq sa kam pasur mundësi. Problemi më i madh mbetet rruga, e cila është funksionale, por jo në kushtet e duhura dhe për mua është një pengesë e fortë”,-tregon Lula.

“Kalaja e Sapës”/ Restoranti që rikthen gatimin

Por përse duhet të vijnë vizitorët te Kalaja e Sapës?

“Turistët duhet të vijnë sepse duke ardhur dhe duke qëndruar tek unë, përveç gatimeve tradicionale dhe ushqimeve bio që kemi, ne kemi krijuar edhe një mundësi tjetër, një rrugë që nis nga restoranti ynë te shtegu i Shën Mëhillit dhe duke u lidhur me dioqezën e Sapës ku ndodhen murgeshat. Vizitorët mund ta eksplorojnë dhe është një shteg i bukur malor dhe në fund është pjesa e qytezës së dikurshme”,-tha Lula.

Në një kohë kur gjithnjë e më shumë kërkojmë të rikthehemi te natyra, zona e Sapës na kujton se bukuria, paqja dhe historia shpesh gjenden shumë më afër sesa mendojmë. Me peizazhe që të lënë pa frymë, me gjurmët e një qytetërimi të lashtë dhe mikpritjen që të mbush zemrën, kjo zonë mbetet një thesar i pazbuluar që pret të vizitohet nga çdo udhëtar. Sapa nuk është thjesht një destinacion, është një përvojë që mbetet gjatë në kujtesë dhe që të fton të rikthehesh sërish. E bashkë me të edhe restoranti që qëndron si kurorë mbi fshat./CNA