Velipoja, e preferuar këtë sezon/ Pushuesit vlerësojnë plazhin, mikpritjen dhe ushqimin

5 Korrik 2025, 15:17, Qyteti im CNA

Velipoja, e preferuar këtë sezon/ Pushuesit vlerësojnë

Çdo vit, mijëra pushues nga e gjithë Shqipëria dhe rajoni frekuentojnë bregdetin e Velipojës për të shijuar natyrën, ushqimin tradicional dhe mikpritjen karakteristike që e dallon këtë perlë të Adriatikut.

Këtë sezon, Velipoja vjen edhe më e përmirësuar, duke ofruar 34 hapësira publike përgjatë vijës bregdetare.

Pushuesit, të cilët prej vitesh frekuentojne këtë plazh, e kanë mirëpritur këtë ndryshim.

“Velipoja është plazh shumë i mirë. Për mua është plazhi më i shëndetshëm”, tha një pushues.

“Hapësirat publike janë përmirësuar shumë në Velipojë sepse unë vij 16 vite rresht në këtë plazh”, u shpreh një tjetër pushues.

“Për pensionistët dhe shtresat e tjera sociale hapësirat publike këtu në Velipojë këtë vit janë shumë të mira. Përse të paguajmë çadrën 5 apo 7 euro, pse të mos shfrytëzohet deti edhe për ne, shumë mirë që ka hapësira për ne. Ne na pëlqen shumë dhe nuk e ndërrojmë Velipojën me asgjë. Edhe shkodranët që vijnë pse të paguajnë çadrën kur munden të vijnë me familjet e tyre dhe të bëjnë plazh e ta shfrytëzojnë, kjo është një pasuri nga Zoti që na e ka dhënë. Këtu ushqimi është shumë i mirë, uji i pastër”, tha një tjetër pushues.

“Mua Velipoja më duket çdo herë e më mirë. E mira dihet që nuk ka kufi, por është shumë në rregull. Mua më pëlqen dhe është viti i tretë që vij në Velipojë”, u shpreh pushuesi.

“Hapësirat publike janë më të mëdha këtë vit dhe po rrimë më lirshëm. Shumë mirë është Velipoja. Duhen vendet edhe për ne sepse jo të gjithë kanë para për çadrat me pagesë dhe nuk mund të shkojnë atje”, tha turisti.

“Më pëlqen shumë Velipoja dhe kam qejf shumë me ardh këtu. Është shumë vend i bukur, më pëlqejnë lojërat për ne fëmijët, uji shumë i mirë që më pëlqen”, deklaroi turisti.

Ndërkohë, rruga panoramike Shëngjin–Velipojë ka sjellë një tjetër vlerë të shtuar, duke e bërë zonën më të aksesueshme dhe të lidhur me rrjetin turistik të veriut.

Që në muajin qershor, Velipoja ka njohur një rritje të ndjeshme të fluksit të pushuesve dhe të rezervimeve në sektorin e hotelerisë, duke e kthyer këtë perlë bregdetare në një magnet të vërtetë për turizmin veror shqiptar./ CNA