web counter
LEXO PA REKLAMA!

SHKARKO APP

App Store
Google Play

E fundit!

x

Rama “shkund” Prokurorinë e Tiranës/ “Është tallur me ligjin dhe qytetarët për çështjen e 21 Janarit”

24 Nëntor 2023, 14:05, Politikë CNA
Rama “shkund” Prokurorinë e Tiranës/
Kryeministri Edi Rama

Kryeministri Edi Rama ka sulmuar Prokurorinë e Tiranës në lidhje me hetimet për ngjarjen e 21 Janarit, kur u vranë në bulevard 4 protestues.

Duke komentuar vendimin e gjykatës së Strasburgut, Rama tha se Prokuroria e Tiranës është tallur me ligjin, Kushtetutën dhe familjarët e viktimave dhe me qytetarët.

Ai ngriti pretendimet se prokuroria ka trajtuar si një leckë një provë të re të dalë për 21 Janarin para disa muajsh.

“Historia na mëson se krimet vonojnë për t’u zbardhur, por nuk mbeten kurrë pa u zbardhur. Prokuroria e Tiranës është tallur me kushtetutën, me ligjin dhe natyrisht pastaj edhe me dhimbjen e të drejtën e familjarëve të viktimave, por edhe të gjithë shoqërisë për të njohur deri në fund të vërtetën dhe e ka trajtuar si një leckë një provë të re të dalë para disa muajsh. Është koha që drejtësia e re të reagojë, pasi qysh se ky krim ka marrë rrugët e prokurorive dhe gjykatave të vendit ka ndryshuar struktura e sistemit të drejtësisë dhe personalitetet apo profilet e zyrtarëve të lartë hetohen nga një tjetër strukturë.

Leximi i vendimit të gjykatës është si të lexosh një rrëfim të stërpërsëritur prej nesh në vite dhe vendosja e gishtit drejtpërdrejtë te autoritetet ekzekutive të kohës është e shkruar e zeza mbi të bardhë. Jo vetëm për krimin e vrasjes që ka mbetur pa autor, sepse vrasja nuk ka nisur nga tërheqja e këmbëzës së automatikut, por nga urdhri i cili ka ardhur nga maja, por nga ana tjetër gjykata vë gishtin dhe te krimi i pengimit të drejtësisë.

Është e qartë se autoritetet ekzekutive më të larta të vendit kanë penguar në mënyrën më brutale dhe kriminale drejtësinë që të reagojë dhe veprojë në kohë reale për të nisur zbardhjen e këtij krimi. Nuk ka asnjë forcë që mund të pengojë zbardhjen përfundimtare të krimit shtëror të 21 janarit, por mund të vazhdojë të vonohet dhe për këtë arsye jam këtu duke shprehur këto konsiderata sepse është jashtëzakonisht e rëndësishme për moralin e sistemit të drejtësisë, për moralin e reformën në drejtësi, institucioneve të reja të drejtësisë që të mos vazhdojë kalvari i familjeve të viktimave”, theksoi ndër të tjera kreu i qeverisë./ CNA





Lajmet e fundit nga