Nuk ndalen “tentakulat” e inceneratorëve/ LSI-ja i kërkon llogari UKT-së
7 Qershor 2022, 13:21, PolitikëCNA
Foto ilustruese
Nënkryetari i LSI-së, Petrit Vasili, hedh dyshime të forta se kompania ITS, e Klodian Zotos, e cila qëndron me majën e piramidës së kompanive që kanë marrë me koncesion inceneratorët, ka shtrirë “tentakulat” edhe në UKT.
Në një postim në rrjetet sociale, Vasili i është drejtuar me një letër Ujësjellës Kanalizimeve Tiranë, ku kërkon informacion në lidhje me tenderat për blerje matësish nga 2016-ta e në vazhdim dhe sa tendera janë fituar nga ITS.
“Në vazhdim të zbulimit të oktapodit të inceneratorëve! ((Dokumenti)
I jam drejtuar me letër zyrtare Drejtorisë së Ujësjellës Kanalizimeve të Tiranës, ku i kërkoj informacion lidhur me tendera për matësa të fituar nga kompania ITS me aksioner kryesor Klodian Zoton e inceneratorëve.
Është e qartë, por po qartësohet edhe më mirë se oktapodi i inceneratorëve ka shtrirë këmbët gjithandej në parate publike, që administron Rilindja.
Këto do të ishin të tjera fakte të rënda që lidhen me oktapodin e inceneratorëve, pas faktit kur Bashkia e Tiranës dhe Qeveria, të cilat në shpërdorim flagrant të detyrës dhe të interesit publik lanë peng tokën shtetërore dhe pronat, që Kompania e Inceneratorëve të merrte 8 milion euro kredi ndërkohë, që ishte nën hetim nga SPAK.
Apo kur Bashkia e Tiranës mori 12 automjete për përdorim nga Kompania e Inceneratorëve të Tiranës me sebepin e pandemisë, kur kjo kompani s'kishte asnjë lidhje me shitjen apo dhënien me qira të automjeteve.
Shpresoj që këta të Drejtorisë së Ujësjellës Kanalizimeve të jenë të sinqertë në përgjigjen e tyre, për të miren e tyre dhe të interesit publik!”-shkruan Vasili.
Por, LSI mesa duket po kopjon denoncimet e CNA.al. Kujtojmë këtu se në lidhje me shtrirjen e tentakulave të inceneratorëve, edhe tek Ujësjellësit, CNA.al ka publikuar fakte dhe dokumente që në prej disa muajsh.
CNA.al ka kryer një investigim të zgjeruar në lidhje me futjen e Klodian Zotos, tek ujësjellësat nëpërmjet instalimit të një sistemi elektronik të matësave. Të cilin mund ta lexoni në linkun më poshtë.
